МУҲИМ ИЖТИМОИЙ-СИЁСИЙ ТАДБИРНИ демократизм ва ошкоралик тамойиллари асосида ўтказайлик

Ўзбекистонда демократлаштириш ва фуқаролик жамиятини қуриш баробарида бугунги турмушимизга инсон қадр-қиммати, ҳуқуқ ва эркинликлари ва ижтимоий адолат масалаларига янгича муносабатлар, янгича қарашлар шаклланмоқда. Жамият ҳаётидаги бу жараёнлар ҳар биримиздан ижтимоий фаоллик ва юксак масъулият талаб қилади.

Маълумки ҳар бир шахс оилада камол топади. Инсоннинг онги ва дунёқарашининг шаклланишида оилалар, оилалардан таркиб топган маҳалланинг ўрни беқиёсдир. Ҳар биримизнинг турмуш тарзимиз маҳаллага – ўзимиз яшаётган муҳитга боғлиқ экан, бу дахлдорликнинг ҳам ўзига яраша масъулиятини ҳис қила олишимиз лозим.

Бу масъулият фуқаролар йиғинлари ва уларнинг маслаҳатчиларининг ваколат муддати шу йил ноябр-декабрь ойларида тугаши муносабати билан мамлакатимизда фуқароларнинг ўзини ўзи бошқариш органларига навбатдаги сайловни ўтказишга тайёргарлик кўрилаётган айни кунларда айниқса яққол намоён бўлмоқда.

Ўзбекистон Республикаси Олий Мажлиси Сенати Кенгашининг шу йил 12 сентябрда бўлиб ўтган мажлисида "Фуқаролар йиғинлари раислари ва уларнинг маслаҳатчилари сайловига тайёргарлик кўриш ва уни ўтказиш тўғрисида”ги қарори қабул қилинди. Мажлисда қайд этилганидек, ўтган давр мобайнида ўтказиб келинган фуқаролар йиғинлари раислари ва уларнинг маслаҳатчилари сайлови фуқароларнинг ҳуқуқий онгини ва сиёсий-ҳуқуқий маданиятини ошириш, маҳаллий аҳамиятга молик масалаларни ҳал қилишда талабчанликни кучайтириш мактабига айланди.

Навбатдаги фуқаролар йиғинлари раислари (оқсоқоллари) ва уларнинг маслаҳатчилари сайловини ўтказиш муддати 2013 йил ноябрь-декабрь ойлари этиб белгиланди.

Бу сайловлар жараёни янги таҳрирда қабул қилинган «Фуқаролар йиғинлари раислари (оқсоқоллари) ва унинг маслаҳатчилари сайлови тўғрисида»ги қонун асосида ўтказилиши билан аҳамиятлидир.

Туманимизда бўлажак сайловларда 47 нафар фуқаролар йиғини раиси (оқсоқоли) ва уларнинг 420 нафардан ортиқ маслаҳатчиси сайлови режалаштирилмоқда.

Қонунга мувофиқ, фуқаролар йиғини раиси ва унинг маслаҳатчилари сайлови ошкоралик, муқобиллик ва тенг сайлов ҳуқуқи принциплари асосида ўтказилади.

Янги таҳрирдаги қонунга асосан 2013 йил 27 сентябрь куни Халқ депутатлари туман Кенгаши қарори билан фуқаролар йиғинлари раислари ва уларнинг маслаҳатчилари сайловини ташкил этиш ҳамда ўтказишда фуқаролар йиғинларига амалий ёрдам бериш учун туман ҳудудида фуқаролар йиғинлари раислари (оқсоқоллари) ва уларнинг маслаҳатчилари сайловини ташкил этиш ҳамда ўтказишга кўмаклашувчи туман комиссияси таркиби тасдиқланди. Туман комиссияси таркибига фуқаролар йиғинларининг, давлат органларининг, нодавлат-нотижорат ташкилотларининг вакиллари киритилди. Шу билан бирга бевосита жойларда сайловни ташкил этиш ҳамда ўтказиш бўйича янги таҳрирдаги қонунга кўра фуқаролар йиғини (фуқаролар вакилларининг йиғилиши) қарори билан фуқаролар йиғини раиси ва унинг маслаҳатчилари сайловини ташкил этиш ҳамда ўтказиш бўйича ишчи гуруҳлар тузилади. Ишчи гуруҳ таркибига қоида тариқасида фуқаролар йиғинининг тегишли ҳудудида жойлашган нодавлат-нотижорат ташкилотлар ва бошқа ташкилотларнинг вакилларидан ташқари Халқ депутатлари туман Кенгашининг депутати ҳам киритилади.

Фуқаролар йиғини раиси лавозимига номзодлар Ўзбекистон Республикаси фуқаролари бўлиши, олий маълумотли, бевосита сайловга қадар камида беш йил тегишли ҳудудда доимий яшаётган, ташкилотчилик қобилиятига эга, давлат органларида ёки нодавлат-нотижорат ташкилотларда ёхуд тадбиркорлик ва бошқа хўжалик фаолияти соҳасида иш тажрибасига, шунингдек, ҳаётий тажрибага ва аҳоли ўртасида обрў-эътиборга эга бўлиши керак.

Фуқаролар йиғини раиси ва унинг маслаҳатчилари сайлови якунларини чиқариш тартибига кўра овоз беришда иштирок этган фуқароларнинг ярмидан кўпроғининг овозини олган номзод фуқаролар йиғини раиси ёки унинг маслаҳатчиси лавозимига сайланган ҳисобланади. Умуман олганда сайловга пухта тайёргарлик кўриб, уни қонунга мувофиқ юқори ташкилий-ҳуқуқий даражада ўтказишни таъминлашимиз зарур. Бу жараёнлардафаол иштирок этиш, фуқароларимизга сайлов мақсад-моҳиятини, бу борадаги амалдаги қонунларимизни кенг тушунтиришни туман комиссияси энг асосий вазифаларидан, деб ҳисоблайди. Шундагина сайловларда энг муносиб номзодлар сайланишига эришамиз.

Рустам Рўзметов,

туман ҳудудида фуқаролар йиғинлари раислари (оқсоқоллари) ва уларнинг маслаҳатчилари сайловини ташкил этиш ҳамда ўтказишга кўмаклашувчи туман комиссияси раиси, "Маҳалла” хайрия жамоат фонди туман бўлинмаси раиси.