“Ўздек тилим – Ўзбек тилим”

(бахшиёна)

Кўз очиб ёруғ жаҳонга

Келганда ҳар бир инсонга

Онанинг алласи азиз,

Алланинг тили энг лазиз.

Муқаддас азон айтилиб,

Қўйилгач исм битилиб,

Қулоққа ҳар кун қуйилган,

Қалбдан жой олиб суйилган

Отамнинг равон тили бу,

Онамнинг бийрон тили бу!

Михли туёқ-ла Бойчибор

Йўртганда чополмай ночор,

Барчин “Қур-рэй!”и қиздирган,

Ғаним тулпордан ўздирган!

Жуманбулбулнинг жиғаси,

Қаҳҳор бахши дўмбираси,

Меҳнаткашнинг зафаридан,

Бутун дунё хабаридан

Сўзлаган латиф тилдир бу,

Куйлаган зариф тилдир бу!

Қошғарийнинг девонида,

Хос Ҳожибнинг жавонида,

Рабғузий ривоятлари,

Боқирғон ҳикоятлари,

Яссавий ҳикматларида,

Лутфийнинг суҳбатларида,

Мир Алишер дунёсида,

Мирзо Бобур “Урҳо!”сида

Янграган азиз тилдир бу,

Жон каби лазиз тилдир бу!

Машрабнинг “Ё-ҳу!”шиддати,

Нодирабегимнинг тийнати,

Чўлпоннинг оҳ-ноласида,

Усмон Носир жоласида,

Фитрат, Боту фиғонида,

Беҳбудийнинг забонида,

Қодирий туғёнларида,

Ҳамзанинг исёнларида

Қайнаган, пишган тилдир бу,

Илоҳдан тушган тилдир бу!

Қаҳҳор ростлиги шу тилда,

Шайхзода дўстлиги шу тилда.

Ойбек, Ҳамидлар жилоси,

Зулфияхоним ноласи,

Абдулланинг ғурурлари,

Ҳалиманинг сурурлари,

Муҳаммаднинг нигоҳлари,

Эркинларнинг “Э, воҳ!”лари

Ифода топган тилдир бу,

Ирода топган тилдир бу!

Ўғлимнинг эҳтиросини,

Қизимнинг пинҳон розини,

Рафиқамнинг инжа дилин,

Неварамнинг сужжи тилин,

Дўстларимнинг ҳурмат азмин,

Миллат қадри-қиммат рамзин,

Ҳаёти, мамотларини –

Барини, барин, барини

Мужассам этган тилдир бу,

Мукаррам этган тилдир бу!

Ғайри тилин бой-бўстон деб,

Нодонлар кўрганида эп,

Қилиб кўксини қалқонлар,

Жон фидо қилган Омонлар,

Турфа гўзал шевасидан,

Муҳаббатнинг мевасидан,

Истиқлолнинг келишини,

Қадри баланд бўлишини

Сабр билан кутган тил бу,

Зафар туғин тутган тил бу!

Она тилим – ўздек тилим,

Боқий менинг Ўзбек тилим!

Ғиркўк тулпор қанотиндай ўзғир тил,

Бойчиборнинг туёғиндай қизғир тил,

Гўрўғлининг қиличиндай кескир тил,

Барчинойнинг журагиндай сезгир тил,

Замахшарий қувонч билган тилдир бу,

Ат-Термизий таянч билган тилдир бу!

Ҳаз этади ширин жоним сўйласам,

Дўмбирам шўх сайраб кетар куйласам.

Саломчи оғамнан келган нома бу,

Бахтиёр бахшидан бир тўёна бу!

Она тилим – ўздек тилим,

Боқий менинг Ўзбек тилим!

Турсунбой Абдуллаев.