“СПОРТ – ДОИМИЙ ҲАМРОҲИМИЗ” ШИОРИ ОСТИДА МИНИ ФУТБОЛ БЎЙИЧА МУСОБАҚАЛАР ЎТКАЗИЛДИ

20 ноябрь куни туман ҳокимлиги, туман жисмоний тарбия ва спорт бўлими, мудофаага кўмаклашувчи “Ватанпарвар” ташкилоти туман Кенгаши, туман Тиббиёт бирлашмаси, Ўзбекистон давлат муассасалари ва жамоат хизмати ходимлари касаба уюшмаси туман Кенгаши, Амударё телевидениеси таҳририятларининг 2020 йил 10 ноябрдаги қўшма қарорига асосан давлат муассасалари ва жамоат хизмати ходимлари касаба уюшмаси туман Кенгашига қарашли ташкилотлар ходимлари иштирокида спортнинг мини футбол тури бўйича “Спорт – доимий ҳамроҳимиз” шиори остида спорт мусобақалари ўтказилди.

Дўстона, қизғин баҳслар билан ўтган мазкур мусобақаларда туман ҳокимлиги, акциядорлик тижорат “Халқ банки”нинг туман филиали, туман Маҳалла ва оилани қўллаб-қувватлаш бўлими, мудофаага кўмаклашувчи “Ватанпарвар” ташкилоти туман Кенгаши ходимлари ўзаро беллашдилар.

Тўртта жамоадан иборат ҳаваскор футболчилар ўртасида бўлиб ўтган мазкур мусобақада 45 нафар ходимлар иштирок этишди. Мусобақа жараёни масъул мутахассислар томонидан кузатилиб, одилона баҳолаб борилди. Унга кўра, энг яхши ўйин кўрсатган акциядорлик тижорат “Халқ банки” туман филиали ходимларидан иборат футболчилар жамоаси 1-ўринни эгалладилар. 2-ўрин туман ҳокимлигининг ҳаваскор футболчилар жамоасига насиб этди.

Мусобақада жипслик ва фаоллик намуналарини кўрсатган туман Маҳалла ва оилани қўллаб-қувватлаш бўлими ходимларидан иборат жамоа 3-ўринга, мудофаага кўмаклашувчи “Ватанпарвар” ташкилоти туман Кенгаши хоидмларидан ташкил топган спортчилар жамоаси эса 4-ўринга муносиб деб топилди.

Шунингдек, мусобақа якунларига кўра, “Халқ банки” туман филиали ходими Ражаб Сапарниязов “Энг яхши мураббий” деб, “Халқ банки” туман филиали ходими Расул Кенжабоев “Энг яхши ўйинчи” ва туман ҳокимлиги ходими Жасур Калмурадов “Энг яхши дарвозабон” деб эътироф этилдилар.

Мусобақада биринчи ўринни эгаллаган Акциядорлик тижорат “Халқ банки” туман филиали футбол жамоасига қимматбаҳо кубок ҳамда диплом, мусобақада иштирок қилган барча спортчи ходимларга фахрий ёрлиқ ва қимматбаҳо совғалар берилди.

Робия ЙЎЛДОШЕВА.