ИНВЕСТОРЛАРГА ЯРАТИЛГАН ИМТИЁЗ ВА ҚУЛАЙЛИКЛАР хорижий сармояларни жалб қилишда муҳим омил бўлмоқда

Мамлакатимизда хорижий инвестицияларни жалб этишни рағбатлантиришга, чет эллик инвесторлар ҳамда чет эл инвестициялари жалб этилган корхоналар учун бериладиган кафолатлар ва имтиёзлар тизимини мустаҳкамлашга алоҳида эътибор қаратилмоқда. "Чет эл инвестициялари тўғрисида”ги, "Чет эллик инвесторлар ҳуқуқларининг кафолатлари ва уларни ҳимоя қилиш чоралари тўғрисида”ги, "Инвестиция фаолияти тўғрисида”ги Қонунлар қабул қилиниши ҳамда Ўзбекистон Республикаси Президентининг "Хорижий инвестициялар иштирокидаги корхоналарни ташкил этиш ва уларнинг фаолиятини рағбатлантиришга оид қўшимча чора-тадбирлар тўғрисида”ги, "Хорижий сармоялари бўлган корхоналар ишлаб чиқарадиган маҳсулот экспортини рағбатлантиришга оид қўшимча чора-тадбирлар тўғрисида”ги, "Тўғридан-тўғри хорижий инвестициялар жалб этилишини рағбатлантиришга оид қўшимча чора-тадбирлар тўғрисида”ги Фармонлари билан хорижий инвестициялар иштирокидаги корхоналарга имтиёзлар берилиши хорижий сармоядорларнинг Ўзбекистонга қизиқишларини оширмоқда.

Туманимизда ҳам бир нечта хорижий инвестициялар иштирокидаги қўшма корхоналар самарали фаолият юритмоқда.

Туманда пиллани қайта ишлашга мўлжалланган "AZIYA SILK” Вьетнам шўъба корхонаси ташкил қилиниши натижасида туманнинг 63 нафар аҳолиси иш билан таъминланди.

Корхонада пиллани қайта ишлаш натижасида пилла ипаги ишлаб чиқариш йўлга қўйилган бўлиб, ўтган 2013 йилда жами 498,3 минг АҚШ доллари миқдорида маҳсулот экспорт қилинган бўлса, жорий йилнинг 1 чораги давомида 140,9 минг АҚШ доллари миқдорида экспорт амалга оширилиб, ўтган йилнинг шу даврига нисбатан 4 баробар ўсим суръатига эришилди.

Бугунги кунда корхонада фақат пилла ипаги экспорт қилинаётган бўлса, жорий йилда лойиҳа қиймати 310 минг АҚШ долларига тенг, йилига 720 тонна трикотаж маҳсулотлари ишлаб чиқаришга мўлжалланган лойиҳа устида ишлар олиб борилмоқда. Бу лойиҳа амалга оширилиши натижасида қўшимча равишда 50 та янги иш ўринлари яратилиб, ишлаб чиқарилган маҳсулотларнинг 80 фоизини экспорт қилиш режалаштирилмоқда. Бу билан туманимизда тайёр маҳсулот экспортига эришилади.

Шунингдек, тумандаги масъулияти чекланган жамият шаклидаги "Mangit Invest plus” қўшма корхонасида қандолатчилик маҳсулотлари ишлаб чиқарилмоқда. Шунинг билан биргаликда корхонада қишлоқ хўжалик маҳсулотларини тайёрлаш ишлари билан шуғулланиш учун 2012 йилда ўз маблағлари ҳисобидан 400,0 млн сўмлик инвестиция киритиб, сиғими 400 тонналик замонавий музлатгичли омборхона қуриб ишга туширилди. Бунинг натижасида ўтган 2013 йил давомида 49,1 минг АҚШ доллари миқдорида қишлоқ хўжалик маҳсулотлари экспорт қилинган бўлса, жорий йилнинг 1 чорагида 208,2 минг АҚШ доллари миқдорида қишлоқ хўжалик маҳсулотларини экспорт қилишга эришилди.

Бу корхонанинг фаолият бошлаши натижасида 15 нафар киши иш билан таъминланди.

Бу йўналишларда олиб борилаётган ишлар узлуксиз давом қилдирилиб, ўтган 2013 йилнинг охирида туманнинг Назархон овули ҳудудида қора металл чиқиндиларидан йилига 20 тонна арматура ишлаб чиқаришга мўлжалланган  хорижий инвестиция иштирокидаги "Shosh Mangit” масъулияти чекланган жамияти ишга туширилди. Корхонада арматура ишлаб чиқаришни ташкил қилиш учун жами 295,0 минг АҚШ доллари миқдорида хорижий инвестициялар киритилди.

Корхонанинг ишга туширилиши натижасида 20 та янги иш ўринлари ташкил қилиниб, ҳозирги кунда ишлаб чиқариш жараёни бошлаб юборилган. Бугунги кунда корхонада ишлаб чиқарилаётган маҳсулотлар ички истеъмол бозорига сотилиб, нафақат туманнинг, балки Қорақалпоғистоннинг арматурага бўлган эҳтиёжининг бир қисмини қондирмоқда.

Келгусида корхонани янада кенгайтириш эвазига ишлаб чиқариш қувватини ошириш ва ишлаб чиқарилган маҳсулотнинг камида 25-30 фоизини экспортга чиқариш мўлжалланмоқда.

Хулоса ўрнида айтиш керакки, мамлакатимиз қонунчилигида тўғридан-тўғри хорижий инвестициялар жалб этилишини рағбатлантириш мақсадида назарда тутилган кенг қамровли чора-тадбирлар мажмуи юртимизда хорижий инвесторлар учун максимал даражада қулай инвестиция муҳитини яратиш борасида диққатга сазовор натижаларга эришиш имконини бермоқда. Бу эса ўз навбатида иқтисодиётимиз ривожи ва халқимиз турмуш фаровонлиги ошишига хизмат қилади.

Камилжон Айтбаев,

туман ҳокимининг иқтисодиёт ва ижтимоий ривожлантириш масалалари бўйича ўринбосари.

(Фото - http://uza.uz)