INVESTORLARGA YaRATILGAN IMTIYoZ VA QULAYLIKLAR xorijiy sarmoyalarni jalb qilishda muhim omil boʻlmoqda

Mamlakatimizda xorijiy investitsiyalarni jalb etishni ragʻbatlantirishga, chet ellik investorlar hamda chet el investitsiyalari jalb etilgan korxonalar uchun beriladigan kafolatlar va imtiyozlar tizimini mustahkamlashga alohida eʼtibor qaratilmoqda. "Chet el investitsiyalari toʻgʻrisida”gi, "Chet ellik investorlar huquqlarining kafolatlari va ularni himoya qilish choralari toʻgʻrisida”gi, "Investitsiya faoliyati toʻgʻrisida”gi Qonunlar qabul qilinishi hamda Oʻzbekiston Respublikasi Prezidentining "Xorijiy investitsiyalar ishtirokidagi korxonalarni tashkil etish va ularning faoliyatini ragʻbatlantirishga oid qoʻshimcha chora-tadbirlar toʻgʻrisida”gi, "Xorijiy sarmoyalari boʻlgan korxonalar ishlab chiqaradigan mahsulot eksportini ragʻbatlantirishga oid qoʻshimcha chora-tadbirlar toʻgʻrisida”gi, "Toʻgʻridan-toʻgʻri xorijiy investitsiyalar jalb etilishini ragʻbatlantirishga oid qoʻshimcha chora-tadbirlar toʻgʻrisida”gi Farmonlari bilan xorijiy investitsiyalar ishtirokidagi korxonalarga imtiyozlar berilishi xorijiy sarmoyadorlarning Oʻzbekistonga qiziqishlarini oshirmoqda.

Tumanimizda ham bir nechta xorijiy investitsiyalar ishtirokidagi qoʻshma korxonalar samarali faoliyat yuritmoqda.

Tumanda pillani qayta ishlashga moʻljallangan "AZIYA SILK” Vetnam shoʻʼba korxonasi tashkil qilinishi natijasida tumanning 63 nafar aholisi ish bilan taʼminlandi.

Korxonada pillani qayta ishlash natijasida pilla ipagi ishlab chiqarish yoʻlga qoʻyilgan boʻlib, oʻtgan 2013-yilda jami 498,3 ming AQSh dollari miqdorida mahsulot eksport qilingan boʻlsa, joriy yilning 1 choragi davomida 140,9 ming AQSh dollari miqdorida eksport amalga oshirilib, oʻtgan yilning shu davriga nisbatan 4 barobar oʻsim surʼatiga erishildi.

Bugungi kunda korxonada faqat pilla ipagi eksport qilinayotgan boʻlsa, joriy yilda loyiha qiymati 310 ming AQSh dollariga teng, yiliga 720 tonna trikotaj mahsulotlari ishlab chiqarishga moʻljallangan loyiha ustida ishlar olib borilmoqda. Bu loyiha amalga oshirilishi natijasida qoʻshimcha ravishda 50 ta yangi ish oʻrinlari yaratilib, ishlab chiqarilgan mahsulotlarning 80 foizini eksport qilish rejalashtirilmoqda. Bu bilan tumanimizda tayyor mahsulot eksportiga erishiladi.

Shuningdek, tumandagi masʼuliyati cheklangan jamiyat shaklidagi "Mangit Invest plus” qoʻshma korxonasida qandolatchilik mahsulotlari ishlab chiqarilmoqda. Shuning bilan birgalikda korxonada qishloq xoʻjalik mahsulotlarini tayyorlash ishlari bilan shugʻullanish uchun 2012-yilda oʻz mablagʻlari hisobidan 400,0 mln soʻmlik investitsiya kiritib, sigʻimi 400 tonnalik zamonaviy muzlatgichli omborxona qurib ishga tushirildi. Buning natijasida oʻtgan 2013-yil davomida 49,1 ming AQSh dollari miqdorida qishloq xoʻjalik mahsulotlari eksport qilingan boʻlsa, joriy yilning 1 choragida 208,2 ming AQSh dollari miqdorida qishloq xoʻjalik mahsulotlarini eksport qilishga erishildi.

Bu korxonaning faoliyat boshlashi natijasida 15 nafar kishi ish bilan taʼminlandi.

Bu yoʻnalishlarda olib borilayotgan ishlar uzluksiz davom qildirilib, oʻtgan 2013-yilning oxirida tumanning Nazarxon ovuli hududida qora metall chiqindilaridan yiliga 20 tonna armatura ishlab chiqarishga moʻljallangan  xorijiy investitsiya ishtirokidagi "Shosh Mangit” masʼuliyati cheklangan jamiyati ishga tushirildi. Korxonada armatura ishlab chiqarishni tashkil qilish uchun jami 295,0 ming AQSh dollari miqdorida xorijiy investitsiyalar kiritildi.

Korxonaning ishga tushirilishi natijasida 20 ta yangi ish oʻrinlari tashkil qilinib, hozirgi kunda ishlab chiqarish jarayoni boshlab yuborilgan. Bugungi kunda korxonada ishlab chiqarilayotgan mahsulotlar ichki isteʼmol bozoriga sotilib, nafaqat tumanning, balki Qoraqalpogʻistonning armaturaga boʻlgan ehtiyojining bir qismini qondirmoqda.

Kelgusida korxonani yanada kengaytirish evaziga ishlab chiqarish quvvatini oshirish va ishlab chiqarilgan mahsulotning kamida 25-30 foizini eksportga chiqarish moʻljallanmoqda.

Xulosa oʻrnida aytish kerakki, mamlakatimiz qonunchiligida toʻgʻridan-toʻgʻri xorijiy investitsiyalar jalb etilishini ragʻbatlantirish maqsadida nazarda tutilgan keng qamrovli chora-tadbirlar majmui yurtimizda xorijiy investorlar uchun maksimal darajada qulay investitsiya muhitini yaratish borasida diqqatga sazovor natijalarga erishish imkonini bermoqda. Bu esa oʻz navbatida iqtisodiyotimiz rivoji va xalqimiz turmush farovonligi oshishiga xizmat qiladi.

Kamiljon Aytbayev,

tuman hokimining iqtisodiyot va ijtimoiy rivojlantirish masalalari boʻyicha oʻrinbosari.

(Foto - http://uza.uz)