ФАРЗАНДИНГИЗ ГИЁҲВАНДГА АЙЛАНМАСИН

"Қора оғу” домига тушиб, йўлдан адашганлар аввалига ажал уруғи ортидан руҳан эргашади, бора-бора бир онлик "роҳат” бағишловчи моддани қайта-қайта истеъмол қилиш истагини бошқара олмай қоладилар. Бу - ачинарли ҳол. Бироқ, биз ачиниш билан уларни бу ботқоқдан қутқара олмаймиз. Ирода билан курашишга ундаш лозим уларни. Олдини олиш эса ўз қўлимизда!

Бу заҳри қотилни истеъмол қилганлар ўз руҳияти ва соғлигига ўзи таҳдид қилаётганини унутиб қўяди. Гиёҳванд моддаларни қабул қилишни бошлаган (айниқса инъекция йўли билан) ҳар қайси одам вақт ўтгани сари шубҳасиз, таназзулга юз тутиб боради. Ўзини назорат қила олмайди, беҳафсала, ҳаётга бефарқ бўлиб қолади, ҳар хил касалликларга чалинади, шунингдек бедаво дард – ОИТС касаллиги ҳам бундан истисно эмас. Шунинг учун бугунги кунда ОИТСнинг олдини олиш чора-тадбирлари асосан гиёҳвандлар ўртасида кучайтирилмоқда.

Бизнинг Қорақалпоғистон Республикаси ОИТСга қарши кураш марказимизда, шаҳар ва туманлардаги Тиббиёт бирлашмаларида 17 та "Ишонч хоналари” фаолият кўрсатмоқда. Улар Республика ОИТСга қарши кураш маркази ва халқаро Глобал фонд томонидан ҳар тарафлама тўла таъминланган.

Бу "Ишонч хоналари” Ўзбекистон Республикаси Соғликни сақлаш Вазирлигининг 2011 йил 1 августдаги 232-сонли буйруғига асосан фаолият кўрсатади. Асосий вазифаси - ОИВ ва ОИТС касаллигининг олдини олишдир. Шу мақсадда бепул ва аноним турда, яъни шахсни исботловчи ҳужжатсиз хизмат кўрсатилади ва ОИВга таҳлил бепул қилинади. Ташриф буюрувчиларга ОИВ ва ОИТС ҳақида, касалликнинг юқиш йўллари, клиник белгилари, диагностикаси, даволаш ва олдини олиш чоралари тўғрисида маслаҳатлар, даволаниш учун зарур тиббиёт воситалари бепул берилади, зарур вазиятларда тор доирадаги мутахассисларга (нарколог, инфекционист, фтизиатр, терапевт ва ҳоказо)  бепул маслаҳатлар олишга жўнатилади.

Ҳаётда ҳамма нарса бўлиши мумкин. Бахт ҳам, кулфат ҳам инсон кутмаганида рўй беради. Асосийси, киши тафаккури ва онгида бу нобоп одатларга қарши иммунитет шаклланиши керак. Унутманг, бу йўл хато ва унинг оқибатлари нафақат сизнинг, балки атрофингиздагиларнинг ҳам умрини заҳарлайди.