КЕКСАЛАР – ЖАМИЯТ КЎРКИ
Инсон – ҳаёт гултожи. У ўзининг орзу-интилишлари, эзгу амаллари билан ҳамиша ҳаёт гулбоғининг кўрки бўлиб келган. Чунки кишилик жамиятидаги барча ижобий ўзгаришлар, янгиланиш ва тараққиёт фақат ва фақат инсон закоси, фидойи меҳнатининг маҳсулидир. Ҳаётда ўзидан яхши из, яхши ном қолдириб яшаш эса ҳар бир инсон дилидаги энг эзгу мақсад.
Мен ҳар гал кекса авлод вакиллари билан учрашганимда, мулоқотда бўлганимда уларнинг нафақат босиб ўтган умр йўллари, балки ҳар бир сўзи бугунги ёшларимиз учун энг ибратли мактаб эканлигини ҳис этаман. Чеҳраларида нуронийлик балқиб турган кекса онахон ва отахонларимиз – жамиятимиздаги бугунги мислсиз тараққиётга жуда катта ҳисса қўшган, халқ фаровонлиги, бахт-саодати йўлида куч-қудратини сафарбар этган фидойилар айнан улардир. Шунинг учун ҳам муҳтарам Президентимиз нуроний инсонларга ҳурмат ва эътиборнинг яна бир рамзи сифатида 2015 йилга "Кексаларни эъзозлаш йили” деб ном бердилар. Шу баробарида Юртбошимиз: "Барчамизни оқ ювиб, оқ тараган, она юртимизнинг оғир юкини, унинг қувонч ва ташвишини умр бўйи елкасида кўтариб келган мўътабар боболаримиз ва момоларимизни, ота-оналаримизни рози қилиш, уларнинг дуосини олиш – дунёдаги энг улуғ, энг савобли иш”, эканлигини таъкидладилар, йилга монанд Давлат дастури қабул қилиш, бугунги кунда кекса авлод вакиллари ҳаётига дахлдор бўлган муаммоларни ҳал этиш масалалари "Кексаларни эъзозлаш йили” Давлат дастури ижросида ўз амалий исботини топиши зарурлигига алоҳида тўхталиб ўтдилар.
Дарвоқе, қарияларимиз нафақат хонадонларимизнинг, балки ҳаётимизнинг фаришталари, гултожи, жамиятимиз кўрки. Уларнинг яхши дам олишлари, тиббий ва ижтимоий хизматлар билан қамраб олиниши учун ғамхўрлик кўрсатиш инсон омилига эътиборнинг энг устувор тамойилларидан биридир. Бу 2015 йилнинг 18 февралида қабул қилинган "Кексаларни эъзозлаш йили” Давлат дастури тўғрисида”ги Ўзбекистон Республикаси Президенти қарорида ўз ифодасини топган. Айниқса, Дастурда 1941-1945 йиллардаги уруш ва меҳнат фронти фахрийларини манзилли ижтимоий ҳимоя қилиш ва қўллаб-қувватлашни кучайтириш юзасидан йил давомида амалга ошириладиган ишлар, кўрсатиладиган хизматлар бандма-банд белгилаб қўйилгани янада қувонарли. Ҳақиқатан ҳам, мамлакатимиз аҳолисининг жуда кам сонли қатламини ташкил этувчи иккинчи жаҳон уруши ва меҳнат фронти фахрийлари учун фаровон ва муносиб турмуш шароитлари яратиш билан бирга уларнинг кўнгилли дам олишлари, Ўзбекистондаги ўзлари хоҳлаган сиҳатгоҳларда даволаниб, саломатликларини мустаҳкамлашлари учун барча зарур ишларни амалга ошириш Давлат дастурида ўз ифодасини топган. Ҳатто қарияларнинг қизиқишлари бўйича маҳаллаларда турли мулоқот марказлари, клублар ташкил этиш, жисмоний тарбия ва спорт билан шуғулланишлари учун шароит яратиш, улуғ инсонларнинг қизиқишларига мос мавзуларда махсус телекўрсатувлар, спектакль ва фильмлар яратиш ҳам Кексаларни эъзозлаш йили Давлат дастурида белгиланган вазифалар сирасига киритилиши биз – кекса авлод вакилларига кўрсатилаётган беқиёс ғамхўрликдир. Менимча, бундан ортиқ меҳр-оқибат, эътибор ва ғамхўрлик бўлмаса керак. Демак, нуронийларимиз тўла давлат муҳофазасида, уларнинг яхши, ҳар томонлама фаровон, иззат-ҳурмат қуршовида яшашлари учун Президентимизнинг ўзи жон куйдираётир. Биз – нуронийлар бундайин ғамхўрликка муносиб равишда тобора мислсиз тараққиёт поғоналаридан юксалиб бораётган мамлакатимиз мустақиллигини мустаҳкамлаш йўлидаги барча хайрли ишларга қўл-қанот, энг яқин маслаҳатгўй, бир самимий дўст бўлиб яшашга ҳамиша бурчлимиз. Чунки мамлакатимизнинг бугунги қудрати ва салоҳиятида кекса авлод вакиллари – биз нуронийларнинг муносиб ҳиссамиз бор. Буни қалбан ҳис этиб яшаш эса бизга ҳамиша куч-қувват бағишлайди.
Бекман АЛЛАБЕРГАНОВ,
"Нуроний” жамғармаси туман бўлими раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
