ALIShER NAVOIY DAHOSIGA HURMAT VA EHTIROM KOʻRSATILDI
Milliy maʼnaviyatimiz, mumtoz adabiyotimizni buyuk bobokalonimiz – soʻz mulkining sultoni Mir Alisher Navoiysiz tasavvur qila olmaymiz. Shu bois, nafaqat mamlakatimizda, balki butun dunyoda Navoiy dahosiga yuksak hurmat va ehtirom ramzi sifatida uning asarlari sevib oʻqiladi. Navoiy merosini chuqur oʻrganish borasida ilmiy izlanishlar olib borilib, dunyo navoiyshunoslari ishtirokida ilmiy-amaliy anjumanlar oʻtkaziladi. Maqsad esa yagona – buyuk mutafakkir asarlaridagi umuminsoniy qadriyatlarni oʻsib kelayotgan yosh avlod qalbiga singdirish, ularni chin maʼnodagi vatanparvar, xalqparvar insonlar qilib tarbiyalashdir.
Prezident maktablari tizimidagi Amudaryo ixtisoslashtirilgan maktabida tuman Madaniyat boʻlimi bilan hamkorlikda Alisher Navoiy tavalludining 584 yilligi munosabati bilan oʻtkazilgan “Navoiyxonlik” kechasida ham shoirning asrlar davomida oʻz qadr-qimmatini yoʻqotmagan sheʼr-u gʻazallari, ruboiy va tuyuqlari, hamon dunyo xalqlarini oʻziga maftun etib kelayotgan dostonlari haqida maʼruzalar oʻqilib, shoir gʻazallari bilan aytiladigan ashulalar ijro etildi.
Tadbirni maktab direktorining oʻquv ishlari boʻyicha oʻrinbosari Ravshan Xolmurodov ochdi va mamlakatimizda Alisher Navoiy merosini oʻrganish, uning falsafiy, ijtimoiy-maʼnaviy ahamiyatga ega asarlarida ilgari surilgan gʻoyalarni oʻsib kelayotgan yosh avlod ongiga singdirish borasida amalga oshirilayotgan ishlar haqida batafsil soʻz yuritdi. Ayniqsa, 2025-yil Prezidentimiz tomonidan Navoiy viloyatida “Alisher Navoiy yili” deb belgilangani, shu munosabat bilan joriy yilda mamlakatimiz miqyosida oʻtkazilishi rejalashtirilgan adabiy-badiiy, musiqiy tadbirlar, xalqaro ilmiy-amaliy anjumanlar tashkil etilishi, bu kabi tadbirlarda Navoiy asarlari bilimdonlari boʻlmish umumtaʼlim maktablarining oʻquvchilari ham ishtirok etishi xususida mamnuniyat bilan taʼkidladi.
Shundan soʻng, maktab oʻquvchilari shoir gʻazallaridan namunalar oʻqidilar, “Xamsa” dostoni va ushbu dostonda ilgari surilgan halollik, kasb-u hunarga eʼtibor, toʻgʻrisoʻzlik, xalqlar doʻstligi, oʻzaro totuvlik, mehr-oqibat, vatanparvarlik hamda xalqparvarlik gʻoyalari xususidagi fikrlarini bildirdilar.
Tadbir davomida maktabning “Turon” teatr jamoasi tomonidan sahna koʻrinishi namoyish etildi. Sahna koʻrinishi orqali tadbir ishtirokchilari goʻyo bir muddat Alisher Navoiy yashab oʻtgan davr voqealariga guvoh boʻlishib, salkam olti asrdan beri hamon dolzarbligini yoʻqotmagan ezgu gʻoyalar ogʻushiga shoʻngʻidilar. Amudaryo tuman Madaniyat boʻlimi sanʼatkorlari tomonidan maromiga yetkazib ijro etilgan Navoiy gʻazallariga bastalangan mumtoz navolar, maktabning badiiy havaskorlar jamoasi talqinidagi dilrabo raqslar barchaga maʼnaviy ruh bagʻishladi.
Amudaryo tuman Madaniyat boʻlimi va Prezident maktablari tizimidagi Amudaryo ixtisoslashtirilgan maktabi pedagogika jamoasi hamkorligida tashkillashtirilgan “Navoiyxonlik” kechasi oʻquvchi-yoshlar qalbida milliy-maʼnaviy qadriyatlarga, mumtoz adabiyotimiz, ayniqsa, buyuk mutafakkir olim, davlat va jamoat arbobi Hazrat Alisher Navoiy dahosiga mehr, hurmat va ehtirom tuygʻusini yanada mustahkamladi.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
