Tadbirkorlikni qoʻllab-quvvatlashga qaratilgan huquqiy asoslar keng tushuntirildi

6-may kuni Amudaryo tumani hokimligining majlislar zalida tuman tadbirkorlari bilan deputatlar uchrashuvi tashkil etildi. Unda Qoraqalpogʻistondagi tadbirkorlarni qoʻllab-quvvatlash maqsadida qabul qilingan Prezident Farmon va Qarorlari, Vazirlar Mahkamasi qarorlari bilan joriy etilgan imtiyozlar yuzasidan batafsil maʼlumotlar berildi hamda tadbirkorlarning fikr-mulohazalari, murojaat va muammolari tinglandi.

Tadbirda Qoraqalpogʻiston Respublikasi Joʻqorgʻi Kengesiga Amudaryo tumanidan saylangan deputatlar Sanobar Xoʻjamurodova, Anvar Xolimbetov, Ilhom Polvonov, Gʻulomjon Yeshniyozov, Alimbay Atabayev va Quvonchboy Boymurodovlar ishtirok etishdi. Shuningdek, hokim yordamchilari, mahalliy tadbirkorlar hamda masʼul mutasaddilar ham yigʻilishda qatnashdilar.

Deputatlar tomonidan tadbirda ishbilarmonlarga berilayotgan huquqiy va iqtisodiy imkoniyatlar, ularni amaliy hayotga tatbiq etish mexanizmlari, shuningdek, mavjud imtiyozlardan samarali foydalanish yoʻllari haqida batafsil maʼlumot berildi.

Xususan, deputatlar Sanobar Xoʻjamurodova, Gʻulomjon Yeshniyozov va Ilhom Polvonovlar oʻz maʼruzalarida tadbirkorlarga amaldagi hujjatlar bilan berilgan imkoniyatlar va imtiyozlar haqida atroflicha toʻxtalib oʻtdilar. Taʼkidlanganidek, koʻpgina tadbirkorlar ushbu imtiyozlardan toʻliq foydalanish imkoniga ega boʻlsa-da, maʼlum sabablarga koʻra, ulardan xabardor emas yoki toʻgʻri foydalana olmayapti. Bu esa hududdagi tadbirkorlik faoliyatini kengaytirishga toʻsqinlik qilmoqda.

Uchrashuvda Oʻzbekiston Respublikasi Prezidenti tomonidan qabul qilingan bir qator muhim Farmon va Qarorlarda nazarda tutilgan imtiyozlar mazmunini atroflicha tushuntirildi. Xususan, 2022-yil 31-avgustdagi Prezident Farmoniga asosan, 2028-yil 1-yanvargacha Nukus shahridan tashqari barcha hududlarda faoliyat yurituvchi tadbirkorlarning foyda soligʻi, aylanmadan olinadigan soliq, mol-mulk va yer soliqlari stavkalari ikki barobar kamaytirilgan. Shu bilan birga, ijtimoiy soliq 1 foiz miqdorida toʻlanadi.

Shuningdek, qishloq xoʻjaligiga moʻljallanmagan yer uchastkalari elektron auktsion orqali 50 foizga kamaytirilgan boshlangʻich baholarda savdoga chiqarilishi, bu esa tadbirkorlarga yer resurslariga ega boʻlishni osonlashtirishi qayd etildi.

2023-yil 8-avgustda qabul qilingan Farmonga muvofiq, kichik va yoshlar sanoat zonalarida investitsiya majburiyatlarini bajargan tadbirkorlarga yer uchastkalari, binolar xususiylashtirib berilishi mumkin. Bu orqali yoshlar va yangi biznes subʼektlari oʻz faoliyatini barqaror rivojlantirish imkoniga ega boʻlmoqda.

Shu bilan birga, davlat mulki hisoblangan binolar 3 oy davomida sotilmagan taqdirda, ular elektron tanlov orqali eng yaxshi taklif bildirgan talabgorga investitsiya kiritish majburiyati bilan berilishi belgilangani ham tadbirkorlar uchun katta imkoniyatdir.

2020-yil 11-noyabrdagi Prezident qaroriga asosan, Qoraqalpogʻistondagi ogʻir sharoitdagi 45 mahallada xizmat koʻrsatish sohasida yangidan tashkil etilgan tadbirkorlik subʼektlari 2026-yil 1-yanvargacha bir qator soliqlardan – foyda, yer, mol-mulk, aylanma va yakka tartibdagi daromad soligʻidan ozod etilgan. Bu kabi yengilliklar ishsizlikni kamaytirish va xizmat koʻrsatish sifatini oshirishga qaratilgan muhim qadamdir.

2022-yil 30-maydagi qarorga koʻra, Qoraqalpogʻiston hududidagi boʻsh turgan davlat koʻchmas mulk obʼektlarini 2027-yil 1-yanvargacha boʻlib toʻlash sharti bilan xarid qilish imkoni mavjud. Shuningdek, 3 oy ichida toʻlov toʻliq amalga oshirilganda, narxning 25 foizigacha chegirma berilishi ham nazarda tutilgan. Bu esa tadbirkorlarni moliyaviy jihatdan qoʻllab-quvvatlashning samarali usuli hisoblanadi.

Oʻzbekiston Respublikasi Vazirlar Mahkamasining 2024-yil 16-maydagi Qaroriga muvofiq Qoraqalpogʻistonda uch yulduzli toifaga oʻtkaziladigan mehmonxonalarning har bir xonasi uchun Turizmni qoʻllab-quvvatlash fondi hisobidan 20 million soʻm miqdorida subsidiya ajratilishi belgilangan.

Muloqot davomida tadbirkorlar nafaqat qonuniy imtiyozlar toʻgʻrisida aniq va ishonchli maʼlumotlarga ega boʻldilar, balki oʻzlarini qiziqtirgan savollariga batafsil javoblar ham olishdi. Tadbir davomida koʻplab tadbirkorlar tomonidan amaliy takliflar berildi va ularning ijobiy hal etilishiga eʼtibor qaratildi. Deputatlar va mutasaddilar har bir murojaatni diqqat bilan eshitib, huquqiy tushuntirishlar berdi va tegishli yoʻnalishlar boʻyicha tavsiyalar taqdim etdilar.

Aytish mumkinki, mazkur uchrashuv Qoraqalpogʻistonda tadbirkorlarini qoʻllab-quvvatlash, ularga yaratilgan imkoniyatlar haqida aniq va manzilli axborot yetkazish, muhokamalar orqali amaliy yechimlar ishlab chiqishda muhim ahamiyat kasb etdi. Ushbu tashabbuslar mahalliy ishbilarmonlik muhitini yaxshilash, iqtisodiy faollikni oshirish va hududiy taraqqiyotga hissa qoʻshishda katta zamin yaratadi.

Shohzod Qurbonboyev.