Oybek nomli mahallada “Mustaqillik toʻyi” festivali oʻtkazildi

Joriy yilda jonajon Oʻzbekistonimiz hayotida ulkan va tarixiy voqea, yaʼni mamlakatimiz mustaqilligining 35 yilligi keng miqyosda, koʻtarinki ruh bilan nishonlanmoqda. Bu qutlugʻ sana munosabati bilan butun yurtimiz boʻylab keng miqyosli shodiyona tadbirlari uzluksiz davom etmoqda. Eng chekka va olis ovullardan tortib, to tuman va shahar markazlariga qadar, har bir goʻshada, har bir xonadonda ushbu ayyom koʻtarinki ruhda nishonlanmoqda. Erk va ozodlik, tinchlik va osoyishtalik neʼmatini qadrlagan xalqning eng ulugʻ, eng aziz bayrami har bir yurtdoshimiz qalbida gʻurur, iftixor va shukronalik tuygʻularini joʻsh urdirmoqda.

Istiqlol yillarida bosib oʻtilgan mashaqqatli va sharafli yoʻl, barcha sohalarda erishilgan ulkan yutuqlar bayram shodiyonalarida, odamlarning ertangi kunga boʻlgan mustahkam ishonchida oʻz ifodasini topmoqda. Butun mamlakat boʻylab oʻtkazilayotgan bunday tadbirlar xalqimizni yanada jipslashtirib, ularni yangidan-yangi marralar sari ruhlantirmoqda.

Ana shunday bayram tadbirlarining navbatdagi manzili Amudaryo tumanining Oybek nomli mahallasi boʻldi. Mahallada “Bir Vatan, bir xalq boʻlib, yangi hayot va kelajak quramiz!” degan ezgu shior ostida katta shodiyona tashkil etildi. “Mustaqillik toʻyi” deb nomlangan mazkur festivalga mahallada yashovchi nuroniylar, mehnat faxriylari, yoshlar, xotin-qizlar va keng jamoatchilik vakillari, tumanning barcha ovul va mahallalaridan vakillar taklif etildi. Milliy anʼanalarimizga mos ravishda mehr-oqibat, saxovat va hamjihatlik ramzi sifatida markaziy maydondagi katta doshqozonlarda osh damlandi. Mahalla ahli va olis-yaqindan kelgan mehmonlar bir dasturxon atrofida jam boʻlib, oʻzaro mehr-oqibat rishtalarini yanada mustahkamladilar.

Tadbir avvalida mahalla hududida faoliyat yuritayotgan, oʻz ishining haqiqiy ustasi boʻlgan hunarmandlar va intiluvchan tadbirkorlar tomonidan ishlab chiqarilgan mahsulotlarning koʻrgazmasi hamda yarmarkasi namoyish etildi.

Yarmarkada milliy hunarmandchilik namunalari, bejirim buyumlar, kundalik ehtiyoj mollari va turli xil mahalliy ishlab chiqarish mahsulotlari tadbir ishtirokchilari eʼtiboriga havola qilindi. Bu holat, oʻz navbatida, hududda kichik biznes va xususiy tadbirkorlik qay darajada jadal rivojlanib borayotganining amaliy ifodasi boʻldi. Shuningdek, festival doirasida kelajak egalari boʻlmish yosh avlod maʼnaviyatini yuksaltirish, aholi oʻrtasida kitobxonlik madaniyatini keng targʻib qilish maqsadida maxsus kitob yarmarkalari ham yuqori saviyada tashkil qilindi. Ushbu maʼrifiy koʻrgazmada turli badiiy, ilmiy va tarixiy adabiyotlar namoyish etilib, bayram qatnashchilarining maʼnaviy olamini yanada boyitishga ulkan xizmat qildi.

Bayram tadbirida tuman rahbariyati va faol jamoat tashkilotlari vakillari ham ishtirok etishdi. Xususan, tuman hokimining oʻrinbosari Jasur Yaxshimov, hokim maslahatchisi Madamin Kazakov hamda “Nuroniy” jamgʻarmasining tuman boʻlimi raisi Bekman Allaberganovlar tadbir mehmonlari bilan dildan suhbat qurdilar va ularni eng ulugʻ, eng aziz ayyom bilan samimiy qutladilar. Amudaryo tumani hokimi Sobir Xoʻjametovning “Mustaqillik toʻyi” festivali ishtirokchilariga yoʻllagan bayram tabrigi yigʻilganlarga oʻqib eshittirildi. Mazkur tabrikda istiqlolning beqiyos qadri, tinchlikning bebaho ahamiyati va xalqimiz farovonligi yoʻlida olib borilayotgan islohotlarning mazmun-mohiyatiga keng turda toʻxtalib oʻtilgan.

Tadbirda soʻzga chiqqanlar mustaqillik bizga taqdim etgan ulkan imkoniyatlar, erkin va ozod hayotning naqadar buyuk va tengsiz neʼmat ekanligini eʼtirof etdilar.

Shundan soʻng jamiyat hayotida faol ishtirok etayotgan, mahalla obodligi, hudud osoyishtaligi va aholi farovonligi yoʻlida barchaga oʻrnak boʻlayotgan bir guruh fidoyi insonlarning halol mehnati munosib baholandi. Oybek nomli mahallaning eng faol va tashabbuskor fuqarolariga tuman hokimligi tomonidan maxsus esdalik sovgʻalari hamda statuetkalar tantanali ravishda topshirildi. Bunday yuksak eʼtibor va eʼtirof, shubhasiz, yurtdoshlarimizni yanada koʻproq va samaraliroq mehnat qilishga, Vatan taraqqiyotiga oʻz hissasini qoʻshishga undaydi.

Bayram shodiyonasi elimiz suygan xushvoz sanʼatkorlarning chiqishlari, jozibali kuy va qoʻshiqlar bilan yanada qizgʻin, fayzli tus oldi. Sahnada Vatanni madh etuvchi, mustaqillik, tinchlik va millatlararo doʻstlikni tarannum qiluvchi taronalar yangradi. Oybek nomli mahalla ahlining chinakam hamjihatligi va ogʻizbirchiligini yorqin namoyish etgan ushbu tadbirdan barcha ishtirokchilar bir olam zavq va cheksiz quvonch olishdi.

Alohida eʼtirof etish joizki, mazkur bayram mahallaning koʻcha biylari, faollari, “Mahalla yettiligi” aʼzolari, koʻpni koʻrgan nuroniylar, shijoatli yoshlar hamda hududdagi barcha muassasa va tashkilotlarning bir yoqadan bosh chiqarib, yagona maqsad yoʻlida oʻzaro ahillikda mehnat qilayotganining amaliy belgisidir. Mahallalarda bunday mustahkam hamjihatlik va birdamlik bor ekan, yurtimiz kelajagi bundan-da nurafshon, xalqimiz hayoti esa yanada farovon boʻlishi shubhasiz.