“Obod turmush yili“ yangiliklari

ELDAN OLQISh OLIB

Nazarxon ovuli tumanimizning eng chekka hududlaridan sanaladi. Lekin  shunday boʻlsa-da ovul yoshlari har sohada faol, intiluvchan. Oʻz oilasi, ovul-eli, ona yurt taraqqiyoti uchun fidoyi mehnat qilish, yangiliklar yaratib yashash ular uchun hayot mazmuniga aylangan. Muyassar Xolmurodova ana shunday fidoyi yoshlardan. U oʻz uyida tikuvchilik tsexi ochib, ham 3-4 nafar hamqishloq qizlarni ish bilan taʼminladi, ham oʻzi doimiy ishli boʻldi.

Oʻz oilasi, farzandlari bagʻrida kasanachilik faoliyati bilan shugʻullanib, hamqishloqlari olqishiga sazovor boʻlayotgan Muyassar Xolmurodova ustoz-shogird anʼanasi asosida  undan chevarlik sirlarini oʻrganuvchi ovul yoshlari uchun xonadoniga yana kamida 2 ta tikuv mashinasi oʻrnatish niyatida.

 Uy hayvonlariga veterinariya xizmati

"Choykoʻl” ovuli hududida yashovchi aholi ixtiyoridagi uy hayvonlariga veterinariya xizmati koʻrsatuvchi veterinariya feldsheri Yusufboy Ahmedovning xizmatidan barcha mamnun. Chunki u oʻziga birkitilgan hududda uy hayvonlari, ayniqsa, parranda va qoramollarni turli xil kasalliklarga qarshi emlash  ishlarini oʻz vaqtida olib borgani bois, uy hayvonlarining brutsellyoz, kana chaqishi, oqsil, qorason kabi kasalliklarga chalinish holatlari keskin kamaygan. Aholi qaramogʻidagi uy hayvonlari durkun rivojlanmoqda.

 30-yildan soʻnggi diydorlashuv

Tumanimizdagi 22-sonli maktabni 1983-yilda tugatgan sobiq sinfdoshlar 30-yildan soʻng qadrdon maktablarida qayta uchrashdilar. Barchasi oilali, nevarali boʻlgan sobiq oʻquvchilar mustaqillik davrida yangidan qurilgan, zamonaviy kompyuter texnikalari bilan jihozlangan maktabda ustozlari davrasida oʻzlari erishgan yutuqlardan soʻzladilar. Hayotdan erta ketgan doʻstlari, aziz ustozlarini xotirlab, yodga oldilar.

 Inson omiliga eʼtibor

"Qoraqalpoq qishloq qurilish servis” MChJ ishchilari uchun korxona hududida barcha qulayliklarga ega hammom qurilishi jadallik bilan olib borilmoqda.

Hammom bitsa, bir yoʻla 5-6 nafar mijozni qabul qilish imkoniyati yaratiladi.

- Korxonamizda inson omiliga eʼtibor katta. Shuning uchun ham ishimizda sifat va samara yuqori, - deydi korxona ishchisi Jumabek Aytmurotov.

 Aholi bandligi taʼminlanmoqda

Mangʻit shahrining Oybek nomli mahallasida 578 ta xonadonda 3500 nafardan ortiq turli millat vakillari ahil va inoq yashashmoqda.

Hududda 1 ta umumtaʼlim maktabi, 1 ta bolalar bogʻchasi, 1 ta xususiy toʻyxona, 5 ta doʻkon, 6 ta maishiy xizmat koʻrsatish shoxobchalari faoliyat olib bormoqda.

Mahalla ishga yaroqli aholisining bandligini taʼminlash maqsadida tuman Bandlikka koʻmaklashish markazi bilan hamkorlikda hududdagi 1-gʻisht zavodiga 48 nafar yoshlar mavsumiy ishlarga, 4 nafar yoshlar  kasanachilik, 22 nafari oilaviy tadbirkorlik, 14 nafari hunarmandlik, 2 nafari tunukasozlik faoliyatiga jalb qilindi. 8 nafar xotin-qizlarga uylarida parrandachilik bilan shugʻullanishlari uchun imtiyozli kreditlar olishga koʻmaklashildi.

 "Parvoz - 2013”

Mangʻit shahrida joylashgan NDPI qoshidagi 3-sonli akademik litseyda tugallangan oʻquv yilida  687 nafar iqtidorli yigit-qizlar 4 ta yoʻnalish boʻyicha bugungi  kun talabi darajasida taʼlim-tarbiya oldilar. Shularning 232 nafari litseyni muvaffaqiyatli tamomlashdi.

Shu yilning 26-iyunida bitiruvchilarga diplom topshirish marosimi – "Parvoz - 2013”deya nomlangan tadbir boʻlib oʻtdi.

Tadbirni litsey direktori Otabek Yoʻldoshev ochdi va oʻquv muassasasidan uchirma boʻlayotgan bitiruvchilarning parvozi yuksak boʻlishini tiladi. Soʻzga chiqqan bitiruvchilar 3-yil mobaynida oʻz farzandlaridek gʻamxoʻrlik qilib, taʼlim-tarbiya bergan ustozlariga minnatdorchilik bildirdilar.

Nodiraning doʻstlari koʻpaydi

83-maktab bogʻcha majmuasining 4-sinfini aʼlo baholarga tugatgan, faol oʻquvchi Nodira Eshimbetova Mangʻit shahrining "Olmazor” mahallasida yashaydi.

U yozgi taʼtilni bekor oʻtkazmaslik uchun Toshkentdagi "Chimyon” bolalar yozgi oromgohida boʻlib qaytdi.

Oromgohda oʻz tengqurlari bilan turli sport musobaqalari va tanlovlarda faol ishtirok etib, koʻplab doʻstlar orttirgan Nodiraning oromgohda bolajonlar uchun yaratilgan sharoitlardan quvonchi cheksiz.

 Sugʻorish maromida olib borilayapti

Choykoʻldagi Nurulla Yerdoshev rahbarligidagi fermer xoʻjaligi dehqonlari joriy yilda 80 gektar paxta maydonidan 168 tonna hosil yetishtirish niyatida mehnat qilmoqdalar.

Ayni kunlarda begona oʻtlardan tozalangan paxta nihollarini sugʻorish ishlari maromida olib borilmoqda.

Xoʻjalik paxta dalalarida nihollar toʻliq va rivoji yaxshi.

 QVPda yigʻilish oʻtkazildi

Oʻzbekiston Respublikasi Prezidenti tomonidan 2013-yil 30 aprel kuni imzolangan "Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Qonuniga muvofiq nikoh yoshiga amal qilmaslikka qarshi qabul qilingan jazo choralarining mazmun-mohiyatini, oʻzgarishlarga toʻla-toʻkis amal qilish lozimligini ommaga keng targʻib qilish maqsadida umumtaʼlim, kasb-hunar taʼlimi muassasalarida, mahallalarda ota-onalar, yoshlar bilan yigʻilishlar oʻtkazilayapti.

Ana shunday yigʻishlardan biri yaqinda "Olmazor” qishloq vrachlik punktida boʻlib oʻtdi.

Hudud aholisi tuman hokimi oʻrinbosari, xotin-qizlar qoʻmitasi raisi M.Ahmedova, tuman FHDYo boʻlimi mudirasi N.Qoʻchqorova, tuman tibbiyot birlashmasi bosh ginekologi D.Abduraimovalarning shu mavzudagi maʼruzalarini tingladilar va oʻzlarini qiziqtirgan savollarga javob oldilar.

 Ishlayman, deganga imkon koʻp

Xitoy ovulida aholining ish bilan bandligini taʼminlashga alohida eʼtibor beriladi. Ayni kunda 10 nafar ovul yoshlari yakka tartibda imoratlar qurilishida mehnat qilishmoqda. Bundan tashqari, 3 nafar ayol-qizlar kasanachilik faoliyati bilan shugʻullanib, chevarlik sirlarini oʻrganishmoqda.

 Panton koʻprik mukammal taʼmirlanadi

4R181 "Qipchoq-Mangʻit sh. – Turkmaniston Respublikasi chegarasi” davlat ahamiyatidagi avtomabil yoʻlining 4-kilometrida joylashgan Qipchoq panton koʻprigini Respublika yoʻl jamgʻarmasi hisobidan kapital taʼmirlash ishlari boshlanmoqda.

Ikki bosqichda, yaʼni 2013 va 2014-yillarda amalga oshirilishi moʻljallangan bu kapital taʼmirlash ishlarining umumiy tender bahosi 3 mlrd. 304 million soʻmni tashkil etadi.

Panton koʻprigini taʼmirlash ishlari Taxiatoshdagi Qoraqalpogʻiston koʻprik xoʻjaligini saqlashga ixtisoslashtirilgan taʼmirlash, foydalanish korxonasi tomonidan amalga oshiriladi.