Obod turmush yili yangiliklari

Samarali faoliyat

Ota-onalarning yosh avlodni tarbiyalash boʻyicha huquqiy, maʼnaviy-axloqiy psixologik-pedagogik va fiziologik bilimlarini oshirishga qaratilgan  tadbirlarni amalga oshirish, oilalarning mustahkamligi va barqarorligiga erishish, oilada sogʻlom muhitni taʼminlashga koʻmaklashish maqsadida fuqarolarning oʻzini oʻzi boshqarish organlari huzurida tashkil etilgan ota onalar universitetlari samarali faoliyat yuritmoqda. Jumladan "Olmazor” mahallasi "Ota-onalar instituti” yilning oʻtgan yarmida shu maqsadda qator tadbirlar, davra suhbatlari oʻtkazdi.

Yaqin kunlar ichida "Otam, onam va men sportchilar oilasimiz” mavzuida oilaviy sport musobaqasini oʻtkazishga qizgʻin hozirlik koʻrilmoqda. 

Jamoatchilik taʼsiri kuchaymoqda

Mangʻit shahridagi Oybek nomli mahallada aholining tinch-totuv yashashiga erishish, oʻzaro mehr-oqibat va ogʻzibirchiligini taʼminlashda jamoatchilik asosida tizimli ish olib borilmoqda.

Hududda istiqomat qiluvchi obroʻ-eʼtiborli, ziyoli kishilar, ota-onalar oʻqituvchi va shifokorlardan iborat ishchi guruhlari tuzilgan boʻlib, har bir xonadon ahvolini oʻrganishayapti, ehtiyojmand oilalarga homiylar belgilashayapti, yosh qizlarni oilaviy hayotga tayyorlash qaynona va  kelinlar oʻrtasidagi kelishmovchiliklarni bartaraf etish kabi savobli ishlarni, amalga oshirilayotir. Toʻy-marosimlarni ixcham, kamchiqim qilib oʻtkazishda ham jamoatchilikning hissasi katta. Yilning oʻtgan davri mobaynida hududimizda 12 ta toʻy boʻlgan boʻlsa, ularning barchasi bilan alohida suhbatlar oʻtkazildi.

Namunali tibbiy xizmat koʻrsatilmoqda

Keyingi yillarda mamlakatimizda tibbiyot sohasidagi amalga oshirilayotgan keng koʻlamli islohotlar tufayli faoliyat koʻrsatayotgan QVPlar yangi zamonaviy binolar, eng soʻnggi rusumdagi tashhis qoʻyish va davolash apparatlari, malakali kadrlar bilan taʼminlanib, yurtdoshlarimiz sogʻligʻini saqlashda samarali faoliyat olib bormoqda.

Joriy yilimiz boshida foydalanishga topshirilgan "Olmazor” qishloq vrachlik punkti ham shular jumlasidandir. Bu yerda 4500  nafardan ziyod aholiga namunali tibbiy xizmat koʻrsatilmoqda.

Ijobiy samara

Tumanimizda umumtaʼlim maktablarining 9-sinf bitiruvchilarini akademik litsey va kasb hunar kollejlariga toʻliq  qamrab olish, oʻquvchilarning chet davlatlarga chiqib ketishi va erta turmush qurishi kabi holatlarining oldini olish, nikoh yoshiga amal qilmaslikka qarshi qonunlarga kiritilgan oʻzgarishlar va qoʻshimchalarni ota-onalarga, yuqori sinf oʻquvchilariga keng tanishtirish yuzasidan olib borilayotgan targʻibot tashviqot ishlari oʻz samarasini berayotir.

"Durunki” mahallasi hududida yashovchi 3 nafar kollej oʻquvchisi  chet davlatga ishga ketish  arafasida toʻxtalib qolindi va oʻqishga jalb etildi.

Kollektorlar rekonstruktsiya qilinmoqda

Hozirgi kunda tumanimizda 39584 gektarsugʻoriladigan maydon mavjud boʻlib, bu maydonlarga jami 1578.4 km. uzunlikdagi kollektor drenaj tarmoqlari xizmat qiladi. Shundan 290.8 kilometrini xoʻjaliklararo kollektorlar, 1287.6 kilometrini esa ichki xoʻjalik kollektorlari tashkil etadi.

2013 yilda tumanimizda 14.5 km.uzunlikdagi "K-10” kollektorini rekonstruktsiya qilish ishlari rejalashtirilib, shundan 6.4 km. lik qismida rekonstruktsiya ishlari tugallandi. Bu ishlarga 383 mln. soʻmlik mablagʻ sarflandi.

Ayni kunda "K-10”kollektori rekonstruktsiya ishlarida 4 ta ekskavator va 2 ta buldozer qatnashmoqda.

"K-10” kollektorining qolgan 8.1 kmlik. qismida ham rekonstruktsiya ishlarini amalga oshirish maqsadida loyiha hujjatlari tayyorlanmoqda.

Yoʻllarimiz ravon boʻladi

"Obod turmush yili”da tumanimizda ichki xoʻjalik yoʻllarini taʼmirlash va qayta qurish ishlariga alohida eʼtibor berilmoqda.

Hozirgi kunda tumanimizdagi Amir Temur nomli, "Oʻrta qalʼa” va Qipchoq ovullaridagi 4.670 km. uzunlikdagi yoʻllarni qurish va taʼmirlash ishlari jadal olib borilmoqda.

Tender bahosi 426.913 ming soʻm boʻlgan bu qurilish ishlari tuman yoʻl xoʻjaligi, pudrat, taʼmirlash, foydalanish davlat korxonasi tomonidan amalga oshirilmoqda.

Suv tarmoqlari qurilmoqda

Ayni paytda tumanimizda shahar va qishloq aholisiga toza ichimlik suvi yetkazib berishni yanada yaxshilash maqsadida suv tarmoqlari qurilishi ishlari qizgʻin davom etmoqda.

2013 yilda tumanimizda jami 52.4 km. uzunlikdagi suv tarmoqlarini qurib bitkazish rejalashtirilgan boʻlib, bu ishlarga 32844.2 million soʻmlik mablagʻ ajratilmoqda.

Ichimlik suv tarmoqlari qurilishi "Keramika qurilish” MChJ, "Amudaryo” KM MChJ va "Amudaryo qurilish” MChJ quruvchilari tomonidan amalga oshirilmoqda.

Moʻl hosildan nishona

Bu yil tumanimiz boʻyicha 16050 gektar maydonga chigit ekilib, dalalarda toʻliq nihol undirishga erishildi. Paxtakor dehqonlarimiz bu yilning bahor oylaridagi tabiat injiqliklarini mardonavor yengib, unib chiqqan har bir tup gʻoʻza niholini saqlab qolishga harakat qildilar. Bu borada qilingan fidokorona mehnatlar zoye ketmadi.

Hozirgi kunda 255 ta fermer xoʻjaliklari va 6 ta yordamchi xoʻjaliklar dalalarida ekilgan gʻoʻzalar yaxshi parvarish natijasida  rivojlanish fazasiga kirdi.

Shu kungacha tumanimiz boʻyicha barcha dalalardagi gʻoʻzalar bir marta toʻliq oziqlantirildi, 4-5-marta qator oralariga ishlov berildi. 5000 gektar maydondagi gʻoʻza qondirib sugʻorildi.

Gʻoʻza qator oralariga ishlov berishda 361 ta kultivator agregatlari betoʻxtov ishlatilmoqda.

Shunisi quvonchliki, tumanimizning 9000 gektarga yaqin maydonidagi gʻoʻzalar yoppasiga gullab, moʻl hosil toʻplanayotganidan darak berib turibdi.