OBOD YuRTGA ORASTALIK YaRAShAR

Yurtboshimiz Islom Karimov Oʻzbekiston Respublikasi Konstitutsiyasi qabul qilinganligining 20 yillik tantanalariga bagʻishlangan yigʻilishda soʻzlagan nutqida bir purmaʼno fikrni keltirib oʻtgan edi: "Barchamizga yaxshi ayonki, har qaysi inson, millati, tili va dinidan qatʼiy nazar, bu dunyoga baxtli yashash uchun keladi. Bunday yuksak orzuga yetishning sharti va garovi boʻlgan omillar koʻp. Lekin ular orasida hayotimizga maʼno-mazmun beradigan, uni yanada yorugʻ va fayzli qiladigan bir omil borki, u ham boʻlsa, odamning oʻz uyi, oʻz yurtini har tomonlama goʻzal va obod qilib, shundan oʻzi mamnun boʻlib, rozi boʻlib yashashida yaqqol namoyon boʻladi”.

Prezidentimiz kirib kelgan 2013-yilni "Obod turmush yili” deb eʼlon qilar ekan, joriy yilni bunday atash zarurati qanday tugʻilganligiga urgʻu berib, birgina "obod” soʻzining maʼnosini loʻndagina qilib izohlab berdi. Yaʼni ular aytadilar: "Shuni taʼkidlash kerakki, obod degan soʻzning maʼnosini biz juda keng va chuqur tushunamiz. Obod deganda, xalqimiz, millatimiz nafaqat koʻrkam va chiroyli, shu bilan birga, tinchlik va osoyishtalik, oʻzaro mehr-oqibat, ahillik, fayz-baraka hukmron boʻlgan joylarni, doimo pok niyat va sogʻlom intilish bilan yashashni tasavvur qiladi... Bunday mulohaza va fikrlarni umumlashtirib, oʻzbekona aytadigan boʻlsak, barchamizning harakat va intilishlarimiz negizida, avvalambor, yurtimiz, Vatanimizni har tomonlama obod qilish, inson erkin nafas oladigan, tinch va farovon yashaydigan hayot barpo etish gʻoyasi mujassam ekanini, oʻylaymanki, hammamiz yaxshi tushunamiz”.

Azizlar, qaranglar, "Obod turmush yili” qanday maʼnoga ega, uning mazmun-mohiyatida naqadar ulugʻ donishmandliklar mujassam... Gapimni Yurtboshimizning fikrlariga urgʻu berishdan boshlaganimning sababi shundaki, bu yilgi oldimizda turgan rejalarimiz, fikr va oʻylarimiz shunchaki rejalashtirish emas, bu vatanparvarlik sari chorlov, tashabbuskorlikni qoʻllab-quvvatlash, intilishlarga dalda boʻlish, el-yurtimiz obodligi yoʻlida samarali mehnat qilish, va oqibat natijada, uning mevasidan oʻzimiz, farzandlarimiz  bahramand boʻlishimiz demakdir!

Mana, yurtimizga bahor fasli ham kirib keldi. Hamma joyda obodonlashtirish, koʻkalamzorlashtirish ishlari boshlab yuborildi. Koʻchalar, guzarlar, mahallalarda ishlar avjida, keksa-yu-yosh qoʻlidan keladigan biron yumush bilan mashgʻul boʻlib, oʻz makonlarini saranjom-sarishta qilishga baholi qudrat intilishmoqda. Biz tuman xalq taʼlimi muassasalari faoliyatini metodik taʼminlash va tashkil etish boʻlimida maktab rahbarlari ishtirokida oʻtkazilgan kengaytirilgan yigʻilishda taʼlim muassasalarida obodonlashtirish va koʻkalamzorlashtirish oyligi doirasida amalga oshiriladigan ishlarni rejalashtirib oldik. Aytish joyizki, har yilgi "rejalashtirish”lardan farqli oʻlaroq, oʻz imkoniyatimizni hisobga olgan holda bajaradigan ishlarimiznigina emas, balki biz har bir ovul va mahallalarda oʻrnak boʻlib, ularni oʻzimizning orqamizdan ergashtirib, boshqalarga namuna boʻla oladigan ishlarimizni oʻylashib oldik. Bu jarayonda biz har bir taʼlim muassasasining oʻz imkoniyatlarini ham hisobga oldik.

Xizmat safari bilan vodiyda boʻlganimda katta asfalt yoʻl boʻyida, mashinalar qatnovi qismining chekkasida uzundan-uzoq oppoq chiziq eʼtiborimni tortdi. Qarasam, oddiy yumaloq toshlarni shu tariqa tizib chiqishganki, goʻyo uzun lentani eslatadi. Unga ohak bilan ishlov berishgan.  Meni hayron qoldirgan narsa bu ishni qanday qilib tashkil qilishgani emas, aksincha, ushbu toshlarning sochilib ketmasdan, (aniqrogʻi uni tepib, urib-surib sochib yubormasdan) marjondek boʻlib turgani boʻldi.

Xoʻsh, bizda-chi! Odam boʻyi yetmaydigan balandlikda turgan yoʻl belgilariga bir qarang, ariq-zovurlar koʻpriklaridagi yoki korxona-tashkilotlar kabilarning oldidagi panjaralarning ahvoliga bir nazar tashlang!!! Bir qarashda oddiy qoʻl kuchi bilan "eplash qiyin” boʻlgan ishlarni ham koʻrasiz. Oʻylanib qoldim, bu yerlarda yashayotgan odamlar, ularning farzandlari qanday maktabda oʻqishgan, qanday mahallalarda voyaga yetishgan, bundayin odobni kimdan oʻrganishgan ekan? Oʻylangan sari uyalib keta boshladim. Demak, birinchi navbatda, bizda taʼlim-tarbiya muassasalarimizda, qolaversa oilalarimizda, har bir xonadonimizda hali-beri nafaqat oʻqitadigan, balki  uqitadigan narsalarimiz bisyor ekan!

Fursatdan foydalanib, men tumanimizning butun taʼlim sohasi ishchi-xodimlarini joriy "Obod turmush yili” dasturida belgilangan vazifalarning hayotga tatbiq qilinishida, har bir xonadondan tortib butun mahallalarimiz, qishloq va shaharlarimizning tom maʼnodagi obod, ozoda va koʻrkam boʻlishlarida jonbozlik koʻrsatishga chorlayman! Farzandlarimiz qalbida yaxshilikka intilish, yomonlikdan qochish kabi xislatlarni jonlantirish, mehnatsevarlikka oʻrgatish – bir soʻz bilan aytganda qobil insonlar boʻlib yetishishlari yoʻlida  bor kuch-gʻayratimizni ishga solaylik! Ishonamanki, bunday xususiyatlarga ega boʻlgan insonlar haqiqiy vatanparvar, iymon-eʼtiqodli shaxslar boʻlib kamol topishadi. Iymon-eʼtiqodli insonlar bor makonda saranjom-sarishtalik boʻlib, yurt obod, turmush goʻzal, hayot farovon boʻladi!

         Ashirboy QOʻShAYeV.

tuman xalq taʼlimi muassasalari faoliyatini metodik taʼminlash va tashkil etish boʻlimi mudiri oʻrinbosari.