“YoShLAR VA BIZNESNI QOʻLLAB-QUVVATLASh YILI” DAVLAT DASTURI IJROSIGA BAGʻIShLANGAN TARGʻIBOT TADBIRI OʻTKAZILDI

Bilimdon, intiluvchan yoshlarni har tomonlama qoʻllab-quvvatlash, ularning iqtidor va qobiliyatlarini yuzaga chiqarishda zarur sharoit va imkoniyatlar yaratish mamlakatimizda doimiy ustuvor vazifa sanaladi va bu borada qabul qilinayotgan Prezident Farmon va Qarorlari, hukumat Qarorlarining mazmun-mohiyati ham yoshlarga oid davlat siyosatini izchillik bilan amalga oshirishga qaratilgan.

“Oʻzbekiston – 2030 strategiyasini Yoshlar va biznesni qoʻllab-quvvatlash yilida amalga oshirishga oid davlat dasturi toʻgʻrisida”gi Prezident Farmoni ham yoshlar tadbirkorligini rivojlantirish, ularni har tomonlama qoʻllab-quvvatlash, zarur imtiyozlar, yaratib berilayotgan imkoniyatlardan samarali foydalanishlari uchun shart-sharoitlar yaratishga qaratilgani bilan yoshlar hayotida muhim ahamiyat kasb etmoqda. Albatta bu borada ijro hokimiyati organlari deputatlar va faollar tomonidan amalga oshirilayotgan targʻibot-tashviqot tadbirlarining ham ahamiyati katta.

Mangʻit shahrining Yangiobod mahallasi hududidagi 40-sonli umumtaʼlim maktabi faollar zalida boʻlib oʻtgan “Oʻzbekiston – 2030 strategiyasini yoshlar va biznesni qoʻllab-quvvatlash yilida amalga oshirishga oid davlat dasturi toʻgʻrisida”gi Prezident Farmoni va Qoraqalpogʻiston Respublikasi Joʻqorgʻi Kengesining 9-sonli Bayonnomasida belgilab berilgan topshiriqlar ijrosiga bagʻishlangan targʻibot tadbirida ham mamlakatimizda, shuningdek, Qoraqalpogʻiston Respublikasida yoshlar hayotida yuz berayotgan oʻzgarishlar, muhim yangilanishlar, yoshlar siyosati, maʼnaviy-maʼrifiy sohadagi tub burilishlar, xususan, yaratilgan imkoniyatlardan unumli foydalangan holda yoshlar tomonidan amalga oshirilayotgan keng bunyodkorlik ishlari xususida soʻz yuritildi.

Targʻibot tadbirida ishtirok etgan Qoraqalpogʻiston Respublikasi Joʻqorgʻi Kengesi deputatlari Quvonchboy Boymuratov, 40-sonli maktab direktori, Qoraqalpogʻiston Xalq oʻqituvchisi Sanobar Xoʻjamurodova, “Yusuf Eshon bobo” jomʼe masjidi imom-xatibi Abdurahmon hoji Matsapayev, Maʼnaviyat va maʼrifat markazi Amudaryo tuman boʻlimi rahbari Islom Matkarimov, xalq deputatlari Amudaryo tuman Kengashi deputati Muqaddas Beknazarova, Farovon mahalla fuqarolar yigʻini raisi Madamin Kazakovlar “Yoshlar va biznesni qoʻllab-quvvatlash yili”da amudaryolik tadbirkor yoshlar tomonidan amalga oshirilayotgan keng qamrovli, kelajakni koʻzlab rejalashtirilgan istiqbolli loyihalar xususida batafsil toʻxtaldilar.

Ayniqsa, oʻz biznes-loyihalarini amalga oshirish natijasida olis qishloqlardagi uyushmagan yoshlarni ish bilan taʼminlayotgan, turli toifadagi daftarlarga kiritilgan yoshlarning ijtimoiy faolligini oshirishga qaratilgan saʼy-harakatlar, yoshlar bandligini taʼminlash, ularning kasb-korli boʻlishlariga koʻmaklashish maqsadida tadbirkor va bilimdon yoshlar tomonidan hayotga tatbiq etilayotgan yangi-yangi loyihalar xususidagi targʻibot-tashviqot suhbatlari tadbir ishtirokchilarida katta qiziqish uygʻotdi.

Targʻibot tadbiri davomida Qoraqalpogʻiston Respublikasi Joʻqorgʻi Kengesi deputati Quvonchboy Boymurodov “Yoshlar va biznesni qoʻllab-quvvatlash yili” davlat dasturida belgilangan keng qamrovli vazifalar va bu vazifalarni amalga oshirishdan kutilayotgan natijalar haqida batafsil maʼlumotlar berib, yoshlar tadbirkorligini rivojlantirish yuzasidan Amudaryo tumanida ishlab chiqilgan rejalar boʻyicha maʼlumotlar berdi. Tadbirkorlik sohasida yuksak natijalarga erishayotgan yoshlar haqida faxrlanib soʻz yuritdi.

Shuningdek, targʻibot tadbiri davomida Joʻqorgʻi Kenges deputati Sanobar Xoʻjamurodova, “Yusuf Eshon bobo” jomʼe masjidi imom xatibi Abdurahmon Matsapayev, Maʼnaviyat va maʼrifat markazi Amudaryo tuman boʻlimi rahbari Islom Matkarimov, Xalq deputatlari tuman Kengashi deputati Muqaddas Beknazarova, Farovon MFY raisi Madamin Kazakovlar “Oʻzbekiston-2030 strategiyasini Yoshlar va biznesni qoʻllab-quvvatlash yilida amalga oshirishga oid davlat dasturi toʻgʻrisida”gi Prezident Farmonida belgilangan vazifalar, shuningdek, Qoraqalpogʻiston Respublikasi Joʻqorgʻi Kengesining 9-sonli Bayonnomasi boʻyicha topshiriqlar ijrosi yuzasidan joylarda amalga oshirilayotgan ijobiy ishlar xususida soʻz yuritdilar.

Targʻibot tadbiri ishtirokchilari masʼullarga oʻzlarini qiziqtirgan masalalar boʻyicha savollar berdilar va qoniqarli javoblar oldilar.

Robiya YOʻLDOShEVA.