Оталар жасорати - бизнинг фахримиз

Президентимиз Ислом Каримов ташаббуси билан 9 май – Хотира ва қадрлаш куни мамлакатимизда умумхалқ байрами сифатида кенг нишонланди. Байрам арафасида Қорақалпоғистон Республикаси ва туманимиз раҳбариятининг уруш ва меҳнат фронти фахрийлари хонадонларига ташриф буюриб, уларга пул мукофотлари ва қимматбаҳо совғалар, "Иккинчи жаҳон урушидаги Ғалабанинг 70 йиллиги” эсдалик юбилей медали топширилиши фахрийларимизнинг давлатимиз ва халқимиз томонидан қадрланишини ҳамда эъзозланишини яна бир бор намойиш этди.

Биз – ёш авлод вакиллари ҳам байрам арафасида ушбу ҳаракатда фаол иштирок этдик. Ёш йигит-қизлар ўзлари яшаб турган ҳудудларда истиқомат қилаётган фахрийларнинг ҳолидан хабар олиб, уларни байрам билан табриклашди, совға-саломлар топширишди, ҳовлиларини тозалашга ва бошқа юмушларига ёрдамлашишди.

Кекса фахрийлар ёшларнинг бундай иззат-ҳурматидан, меҳрибончилигидан бениҳоя миннатдор бўлдилар. Фахрий ота-хонлар ва онахонлар уруш даврида халқимиз бошидан кечирган оғир кунлар ҳақида гапиришиб, бугунги дориломон замоннинг қадрига етиш кераклиги ҳақида ўз насиҳатларини бердилар.

Биз уруш ва меҳнат фахрийлари билан учрашиб, уларнинг ўтмиш ҳақидаги ҳикояларини эшитганимизда бир нарсани – уруш даврида элимиз ўғлонларининг мислсиз қаҳрамонликлар кўрсатганликларини англаб етдик.

Шу сабабдан ҳам Юртбошимиз 9 май куни пойтахтимиздаги Хотира майдонида оммавий ахборот воситалари вакиллари билан суҳбатида:

- Бугун ҳеч кимга сир эмас: миллион-миллионлаб одамлар ҳалок бўлишига сабаб бўлган, мислсиз йўқотишлар, талофат ва мусибатлар олиб келган бу уруш инсоният тарихидаги энг даҳшатли, энг қонли қирғин бўлганини бу дунёда ҳеч ким унутмайди. Ва фашизм устидан қозонилган ғалаба нақадар қимматга тушганини юртимизда яшаётган ҳар қайси оила, ҳар қайси одам яна ва яна бир бор англаши, қалбидан ўтказиши табиийдир, - дедилар.

Биз – ёш авлод Иккинчи жаҳон урушида барча халқлар билан бирга бўлиб, фашизм балоси устидан қозонган Ғалабамизни, бу урушда халқимиз кўрсатган матонат, мардлик ва қаҳрамонлик намуналарини асло унутмаймиз, жанг майдонларида ўзбек ўғлонларининг нимага қодир бўлганини доимо ғурур ва ифтихор билан эслаймиз. Уларнинг мардлиги ва матонати олдида бир умр бош эгамиз.

Ҳусан ЙЎЛДОШЕВ, Амударё хизмат кўрсатиш ва сервис касб-ҳунар коллежи "Камолот” сардори.

(Фото - http://uza.uz)