Энг намунали маслаҳатчи аниқланди

Мамлакатимизда маҳалла институтининг нуфузини оширишга қаратилган кенг кўламли ишлар амалга оширилмоқда ва ушбу ноёб тузилманинг жамият ҳаётидаги аҳамияти тобора ошиб бормоқда.

Хусусан, фуқаролар йиғинлари аҳоли фаровонлигини ошириш бўйича ижтимоий аҳамиятга эга давлат дастурларининг ҳаётга татбиқ этилишида ажралмас ва муҳим иштирокчи бўлмоқда. Баркамол авлодни тарбиялаш, соғлом турмуш тарзини шакллантириш, оила институтини мустаҳкамлаш, ҳудудларда маънавий муҳит барқарорлигини таъминлашда муҳим ўрин эгалламоқда.

Аввало шуни айтиш керакки, фуқаролар йиғинларининг диний маърифат ва маънавий-ахлоқий тарбия масалалари бўйича маслаҳатчиларининг маҳаллалар ҳаётида тутган ўрни ғоят муҳим.

Бу - туманимизда ўтказилган "Фуқаролар йиғинларининг энг намунали диний маърифат ва маънавий-ахлоқий тарбия масалалари бўйича маслаҳатчиси” кўрик-танловида яққол ифодасини топди.

Мазкур кўрик-танловда туманимиз ОФЙ ва МФЙларида фаолият юритаётган 47 нафар диний маърифат ва маънавий-ахлоқий тарбия масалалари бўйича маслаҳатчилари фаолияти 1-шарт бўйича 3 та йўналишда тайёрлаган ҳужжатлари, шунингдек, ахборот-коммуникация технологияларидан фойдаланиш даражаси белгиланган мезонларасосида жорий йилнинг 20-24 апрель кунлари ташкилий қўмита аъзолари томонидан бевосита жойларга бориб ўрганилиб, жами 100 баллик тизимда баҳоланди. Натижаларга кўра, саралаш босқичида энг юқори балл олган 18 нафар диний маърифат ва маънавий-ахлоқий тарбия масалалари бўйича маслаҳатчилар аниқланиб, танловнинг туман босқичга йўлланмани қўлга киритган эдилар. Танловнинг туман боқичи 5 май куни туман Маданият ва спорт ишлари бўлими биносида бўлиб ўтди.

Ушбу тадбирда "Маҳалла” хайрия жамоат фонди Қорақалпоғистон Республикаси бошқаруви раиси Қўжабай Елмуратов, "Маҳалла зиёси” ўқув маркази директори Баҳодир Юнусов, "Маҳалла” хайрия жамоат фонди Қорақалпоғистон Республикаси бошқаруви бош мутахассиси Арухан Келимбетова, туман ташкилий қўмитаси аъзолари, давлат ва жамоат ташкилотларининг раҳбарлари, "Маҳалла” фонди ва ҳамкор ташкилотларнинг масъул ходимлари, туманда меҳнат қилаётган маҳалла фаоллари ҳамда оммавий ахборот воситалари вакиллари қатнашди.

Ҳакамлар ҳайъати томонидан шартларни баҳолаш осон бўлмади. Чунки, иштирокчиларнинг ҳар бири нафақат ғолиб, балки маҳалласининг энг фаол, етакчи аёли, таъбир жоиз бўлса фидойи, жонкуяр онахони эканлигини айтиб ўтиш жоиз. Натижаларга кўра, Қангли овул фуқаролар йиғини маслаҳатчиси Раъно Аметова 3-ўринни, Ойбек номли маҳалла фуқаролар йиғини маслаҳатчиси Моможон Раҳимова 2-ўринни, Аёқчи маҳалла фуқаролар йиғини маслаҳатчиси Муборак Жуманиёзова фахрли 1-ўринни эгаллаб, танловнинг Қорақалпоғистон босқичига йўлланмани қўлга киритди.

Гавҳар ЧИМБАЙЧИЕВА,

"Маҳалла” хайрия жамоат фонди туман бўлинмаси бош мутахассиси.