Очиқ дарслар ўқитувчи салоҳиятини белгилайди
Мамлакатимизда ўрта махсус, касб-ҳунар таълими тизимида яратилган шарт-шароитлар, ҳар йили соҳага йўналтирилаётган янги инновацион лойиҳалар бугунги давр академик лицей ва касб-ҳунар коллежи ўқитувчиларини доимий равишда ўз устида ишлашга, ўқиб-изланишга ундаши табиий. Чунки, ўз мутахассислиги бўйича чуқур билим ва салоҳиятга эга бўлмаган, дарсларида замонавий педтехнологиялардан унумли фойдаланишнинг уддасидан чиқолмайдиган фан ўқитувчиси Ўзбекистон келажаги бўлган баркамол авлодни тарбиялашдек шарафли ишга асло муносиб эмас. Шу боис, айни кунларда туманимиздаги академик лицей вакасб-ҳунар коллежларида "Академик лицей ва касб-ҳунар коллежларида янги инновацион педагогик технологиялардан фойдаланиш - ҳозирги замон бош мезони” мавзусида ўқув-амалий семинарлар ўтказилмоқда.
Ўқитувчиларнинг касбий маҳоратини ошириш, шунингдек, фан ўқитувчиларининг ўқувчилар билан ишлашишдаги ўзига хос услуб ва тажрибаларини кенг оммалаштириш ҳамда ўқитувчи меҳнатини маънавий рағбатлантириш мақсадида ўтказилаётган ана шундай ўқувамалий семинари Амударё хизмат кўрсатиш ва сервис касб-ҳунар коллежида ҳам бўлиб ўтди. 9 та фан йўналиши бўйича очиқ дарс шаклида ўтказилган ўқув-амалий семинарида физика, астрономия, кимё, тарих, информатика ва ахборот технологиялари, инглиз тили, тикувчилик ўқув амалиёти, тўқувчилик ўқув амалиёти, чилангарлик ишлари ўқув амалиёти, тўқувчилик махсус технологияси фанлари бўйича туманимиздаги академик лицей ва касб-ҳунар коллежларидан ташриф буюрган ўқитувчилар, ишлаб чиқариш таълими усталари ҳамда ўқув ишлари бўйича директор ўринбосарлари иштирок этишди.
Шуни алоҳида қайд этиш керакки, 80 дақиқалик дарс жараёнида фан ўқитувчилари ҳамкасбларининг ўз мутахассисликлари бўйича қай даражада билим ва салоҳиятга эга эканликларини амалда кўрибгина қолмай, илғор тажриба ва дарс ўтиш услублари билан яқиндан танишдилар. Очиқ дарслар якунидан сўнг, Амударё қишлоқ хўжалик касб-ҳунар коллежининг ўқув ишлари бўйича директор ўринбосари, тажрибали педагог Бекберган Юсупов раҳбарлигида туманимиздаги академик лицей ва касб-ҳунар коллежларининг директор ўринбосарлари ва фан ўқитувчилари томонидан дарслар таҳлил қилиниб, натижаси қизғин муҳокама этилди ва ғолиблар аниқланди. Унга кўра, тўқувчилик ўқув амалиёти бўйича ишлаб чиқариш таълими устаси Гулмира Худойназарова ўтказган ўқув-амалий дарси 1-ўринга муносиб кўрилди. Тўқувчилик махсус технологияси фан ўқитувчиси Қундузой Матёқубова 2-ўрин, кимё фани ўқитувчиси Дилдора Авезова 3-ўрин соҳибалари бўлишди.
Ғолиблар Ўзбекистон Республикаси Олий ва ўрта махсус таълим Вазирлиги ҳамда Қорақалпоғистон Республикаси Вазирлар Кенгашининг ўрта махсус, касб-ҳунар таълими бошқармаси томонидан 1-, 2-, 3-даражали дипломлар билан тақдирландилар.
Фан ўқитувчиларининг касбий малакаларини янада ошириш, илғор тажрибаларни оммалаштириш, ўз касбига фидойи ўқитувчилар меҳнатини маънавий рағбатлантириш мақсадида "Академик лицей ва касб-ҳунар коллежларида янги инновацион педагогик технологиялардан фойдаланиш - ҳозирги замон бош мезони” мавзусида ташкил этилган ўқув-амалий семинари туманимиздаги академик лицей ва барча касб-ҳунар коллежларида бўлиб ўтмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
