БЕТАКРОРИМ МЕНИНГ, АЗИЗ ВАТАНИМ!

Ҳар йили мустақиллик тадбирларини ўтказишдаги рамзий шиор барча юртдошларимизнинг қалбида акс-садо беради. Энг улуғ, энг азиз байрамнинг қутлуғ 25 йиллиги арафасидаги «Гўзал ва бетакроримсан, муқаддас Ватаним, жоним сенга фидо, Ўзбекистоним!» эзгу шиори ҳам теран мазмунга эга. Унда ифодаланган сўзлар бизни фидойиликка, ватанпарварликка ундаб туради.

Бу йил қутлуғ байрамга тайёргарлик ўзгача. Одамларимизнинг кайфияти чоғ, уларнинг юз-кўзларида хурсандчилик, байрам руҳи сезилиб турибди. Маҳалладошлар билан суҳбатлашар эканмиз, кимдир томорқадан катта даромад олаётгани, яна кимдир тадбиркорларга яратилаётган шарт-шароитлардан унумли фойдаланиб, рўзғори бут, кўнгли хотиржам эканини айтади. Яна кимдир ўғли чет элда таҳсил олаётгани, яна кимдир қизи давлат гранти асосида олий ўқув юртига ўқишга киргани, кимдир фарзанди спорт соҳасида халқаро миқёсда катта ютуққа эришганини айтиб, фахрланади. Хуллас, муваффақиятга эришмаган оиланинг ўзи йўқ. Албатта, бундай фаровонлик учун, тўкин-сочинлик учун Яратганга шукрона айтишимиз, шундай юртда яшаш бахти насиб этганидан хурсанд бўлишимиз керак. Шу ўринда, жонажон диёримиз тараққиётига ҳар биримиз муносиб ҳисса қўшиб яшашимиз кераклигини ҳис қилмоғимиз даркор. Доно халқимиз бежизга, тома-тома кўл бўлур, демаган. Зотан, Ватанимизнинг гуллаб-яшнаши йўлидаги бирдамлигимиз, собитқадамлигимиз, амалий ҳаракатларимиз юртимизнинг бундан-да юксак марраларни қўлга киритишига хизмат қилади.

Ўзбекистон – Аллоҳнинг назари тушган юрт, деб айтишади. Ҳа, юртимизда зилол сувлар ариқларда тўлиб оқади. Кўча ёқаларида соя-салқин солиб турган бетакрор гўзал чинор-у гужум, тол-у теракларимиз, боғ-роғларимиз бор.  Ҳар бир хонадоннинг беш-ўн сотих  томорқаси бор. Томорқага турфа хил мевали дарахтлар экилган. Ҳовлисида узум токи бор, узум токи тагида супаси бор. Супа атрофига райҳонлар экилган. Қизлар, келинлар ҳовлига сув сепиб, кечки пайт бутун оила дастурхон атрофида жамул-жам бўлиб чой ичишади. Гулзордаги райҳон, жамбилларнинг ҳиди ҳовлини тутади. Бундайин тўкислик фақат ва фақат бизнинг бетакрор Ватанимизда бор!

Ўзбекистонда бўлаётган буюк ўзгаришлар, изчил олиб борилаётган ислоҳотлар, қурилаётган намунали уйлар, ҳаётимизга қайтган миллий қадриятларимиз, урф-одатларимиз, тўкин-сочин тўйларимиз ҳақида тўлиб-тошиб, фахр билан  сўзлагинг келади. Шу баробарида жаннатмакон юртда туғилганимизга ва яшаётганимизга Аллоҳга шукроналар айтамиз.