ТАЪЛИМ МАСКАНЛАРИ ЯНГИ ЎҚУВ ЙИЛИГА ШАЙ ҚИЛИНМОҚДА

Мамлакатимизда ёшларнинг баркамол бўлиб вояга етишлари учун катта эътибор қаратилмоқда. Ана шу эътибор туфайли таълим муассасаларида ўқувчиларнинг билим олишлари учун зарур шароитлар яратилмоқда. Жумладан, мактаб бинолари капитал таъмирланиб, реконструкция қилиниб, зарур ҳолларда янгидан қурилиб, фойдаланишга топширилмоқда. Бу ишларга давлат бюджети маблағлари ҳисобидан ҳар йили етарли миқдорда маблағ ажратилади. Натижада чекка қишлоқларда ҳам замон талаблари даражасидаги мактаблар қад ростламоқда.

Куюк кўпир овулидаги 14-сонли умумтаълим мактаби биноси ҳам давлат инвестиция дастури доирасида капитал реконструкция қилиниб, фойдаланишга топширилди. Мактаб биносини капитал реконструкция қилиш ишларига 215 миллион сўмдан ортиқ маблағ сарфланди. Натижада 120 ўқувчи ўринга мўлжалланган таълим маскани биноси замонавий кўринишга эга бўлди.

"Арнабўйи” маҳалласидаги 57-сонли мактабнинг қўшимча биноси қурилишига 461,8 миллион сўмдан ортиқ маблағ сарфланди. Натижада илгари 100 ўқувчи ўринга мўлжалланган мактабда 60 ўқувчи ўринга мўлжалланган қўшимча бино қурилиши эвазига 160 нафар ўқувчига таълим бериш имконияти юзага келди.

2016 йилнинг манзилли давлат дастури доирасида туман бўйича жами 10 та таълим муассасасида таъмирлаш ва реконструкция ишлари амалга оширилиши режалаштирилган бўлиб, бугунги кунда кўпчилик таълим муассасаларида ишлар ниҳоясига етказилди. "Ўртақалъа” овулидаги 13-сонли, "Тор ёп” маҳалласидаги 18-сонли, "Гулзор” маҳалласидаги  40-сонли мактабгача таълим муассасаларида капитал таъмирлаш ишлари амалга оширилиши режалаштирилган. "Оқ олтин” овулидаги 7-сонли мактабда капитал таъмирлаш, шу овулдаги 71-сонли умумтаълим мактабида капитал реконструкция ҳисобидан янгидан мактаб биносини қуриш ишлари сифатли амалга оширилиб, янги ўқув йилига шай қилинди. "Жумуровул” маҳалласидаги 48-сонли умумтаълим мактаби биноси капитал таъмирланиб, фойдаланишга топширилди.

"Тўлқин” овулидаги 32-сонли умумтаълим мактабида 12х24 ўлчамдаги барча қулайликларга эга замонавий спорт зали Болалар спортини ривожлантириш жамғармаси маблағлари ҳисобидан янгидан қурилиб, фойдаланишга топширилди. "Тошқалъа” маҳалласидаги 34-сонли умумтаълим мактабида эса худди шу ўлчамдаги спорт зали қурилиши тугалланиш арафасида.

Албатта, бу каби эътибор келгусида мамлакатимиз номини дунёга танитадиган ёшларимиз сафининг янада кенгайишига замин яратади.