КЕКСАЛАРИН АЗИЗ ТУТГАН ЭЛИМ

Мен 88 ёшдаман. Кейинги йилларда иккала кўзимнинг ҳам кўриши пасая бошлади. Аввал кексаликда деб эътибор қилмадим. Кун сайин кўзларим хиралаша бошлагач, туман тиббиёт бирлашмасига келдим. Мени кўз касалликлари шифокори, очиқкўнгил йигит Илҳом Холимбетов обдон текшириб кўриб, "ота кўзларингизга парда келибди, буни  даволаш осон, кўрмагандай бўлиб кетасиз”, - деб кўнглимни кўтарди.

Айтишича, иккала кўзимдаги пардани ҳам жарроҳлик йўли билан олиб ташлаш мумкин экан. Фақат бу амалиёт Қорақалпоғистон Республикаси кўз касалликлари шифохонасида амалга оширилар экан.

Баракала топгур Илҳом дўхтир менга далда бериб, республика кўз касалликлари шифохонасида бепул жарроҳлик амалиётини қилдириш учун ордерни қўлимга тутқазди ва:

– Отахон, сизга, бугунгидай тинч-осуда кунларимиз учун хизмат қилган нуронийларимизга қанча хизмат қилсак ҳам арзийди, – деди.

Мени республика кўз касалликлари шифохонаси бош шифокори Яҳё Солиев очиқ чеҳра билан қарши олди. Дастлаб, шу йил 4 майда ўнг кўзимни, 12 июлда эса  чап кўзимни операция қилди. Амалиёт бор-йўғи 10 минутча давом этди ва ҳеч қандай оғриқ сезмадим. Билсам, Яҳё Солиев Ҳиндистонда ва Жанубий Кореяда бу малакани эгаллаб қайтган экан. Мен унинг юксак шифокорлик қобилиятига, одамгарчилигига ва одамшавандалигига жуда қойил қолдим.

Ҳозир кўзларим худди ёшлик пайтимдагидай равшан бўлганлигидан қувончим ичимга сиғмайди. Бунинг учун Илҳом Холимбетов, Яҳё Солиевлардан, кексаларини азиз тутиб, шундай шароитлар яратиб қўйган давлатимиздан чексиз миннатдорман.

Йўлдош РАЖАБОВ,

меҳнат фахрийси, "Қиличбой” овули.

(Фото - http://www.insonvaqonun.uz)