КЕЛАЖАКНИ ОЛДИНДАН КЎРУВЧИ ДАҲО ЭДИЛАР

Мен то нафақага чиққунга қадар 40-сонли умумтаълим мактабида ўқувчи-ёшларга тарих фанидан дарс бердим. Менинг ўқитувчилик фаолиятим мустақиллик йилларида юксак қадрланди. 2002 йилда, "Устоз ва мураббийлар куни” – умумхалқ байрами арафасида Президент Ислом Каримовнинг  Фармонига кўра "Шуҳрат” медали билан тақдирландим. Мустақиллик нафақат менинг хизматларимни қадрлади, балки фарзандларим, оилам учун кенг имкониятлар эшигини очиб берди. Тўрт нафар фарзандимнинг барчаси олий маълумотли кадрлар бўлиб етишишди. Президент Ислом Каримов ташаббуси билан туманимизда бунёд этилган  намунали уйлардан бирининг соҳибаси бўлдим. Мен аввало она, аёл, устоз-мураббий сифатида Юртбошимиз томонидан  яратиб берилган шарт-шароитлар ва имтиёзлардан тўла баҳраманд бўлдим, деб айта оламан. Ҳаётимга, турмуш тарзимга беқиёс ўзгаришлар олиб кирган Президент Ислом Каримовнинг номи бизнинг оиламиз учун ҳамиша қадрли.

Мен тарихчи, фахрий ўқитувчи сифатида  шуни ишонч билан айта оламанки, Ислом Каримов келажакни олдиндан кўра олган ва ана шу келажак уфқлари сари интилиб яшаган улуғ донишманд эдилар. Бу улуғ зот мустақилликнинг биринчи йилида нимаики орзу қилган бўлсалар, барчаси ижобат бўлди. У – Ватанда тинчлик, фаровонлик, ободлик яратмоқни истади! Минг-минг шукур – бугун Ўзбекистон ҳур, озод, эркин, фаровон ва обод гўшага айланди! У фарзандлари соғлом, ақлли ва доно юртни орзу қилди ва бугунги Ўзбекистон ёшлари айнан Президент орзусидаги баркамол авлод сифатида шаклландилар!

Аёлга шарқона эҳтиром, кексаларга беқиёс иззат-икром кўрсатиш, аждодлар даҳосига содиқлик – Ислом Каримов ҳаёти ва фаолиятининг узвий қисми эди. Назаримда, Ўзбекистоннинг биринчи Президенти жамики эзгу ишлари билан ўзи яхши кўрадиган азиз халқи юрагига сингиб кетди. У ҳамиша, ҳар куни, ҳар соат, ҳар лаҳзада биз билан, ўзлари бошлаб кетган эзгу ишлар ривожи билан яшайверади.

Хушрўй ЕШЧАНОВА,

фахрий ўқитувчи,

"Шуҳрат” медали соҳибаси.

(Фото - http://uza.uz)