МАКТАБДА КЕЛАЖАК УЛҒАЯДИ

Мустақиллик йилларида бизнинг мамлакатимизда таълим-тарбия ишларини ҳар томонлама яхшилашга алоҳида эътибор берилиб, барча вилоят ва туманларда бири-биридан кўркам таълим муассасалари бинолари қурилиб, эртанги кунимиз ворислари бўлган ёшлар ихтиёрига топширилди. Айни кунда бизнинг ёшларимиз ҳар томонлама қулай синф хоналарида таълим-тарбия олмоқдалар.

Бизнинг мактабимиз ҳам 2013 йилда реконструкция қилинди  ва   қўшимча 10 та хонали бино  қуриб фойдаланишга топширилди. Айни пайтда 28 синфда жами 583 нафар  ўқувчига 75 нафар ўқитувчи-мураббийлар таълим-тарбия бераяпти.

Таълим икки тилда: ўзбек ва қозоқ тилларида олиб борилаяпти. Таълим  муассасамизда янги замонавий жиҳозлар билан таъминланган кимё, физика, биология лабораториялари, компьютер хоналари ва 18х9 м. ўлчамдаги спорт зали ҳамда 70х70 м. ўлчамли спорт  майдончалари ўқувчиларнинг маънавий ва жисмоний камолоти  йўлида хизмат қилаяпти. Айниқса, инглиз тили хонасига кирган одамнинг завқи беихтиёр ошади.

Мактабимизда "Ораста қизлар”, "Зулфияхоним  қизлари”, "Волейбол”, "Баскетбол”, "Таэквандо”, ”Футбол”, "Рақс” тўгараклари мунтазам ишлаб турибди.

Бу тўгаракларга малакали ўқитувчилар бириктирилган. Ушбу  тўгараклар фаолиятининг  яхши ташкил этилиши ўқувчилар бўш вақтларини самарали  ва мазмунли  ўтказиш учун хизмат  қилмоқда.

Ҳукуматимиз томонидан қилинаётган бундай ғамхўрликларнинг албатта, натижаси бўлиши зарур. Чунки барча шароитлар етарли бўлган жойда самарали иш бўлади.

Ҳар  бир  авлод олдида инсоният  яратган  жамики бойликларни ўрганиш, ўзлаштириш ва ривожлантириш  вазифаси  туради. Инсон камолоти ва  жамият ривожини  шусиз  тасаввур килиб бўлмайди. Мактабга  эътибор – келажакка эътибор, - дейди халқимиз. Бу жуда  ҳақ  гап. Фарзандларимиз  ана шу  қутлуғ  даргоҳда оқ-қорани  танишади, улғайишади, камол  топишади. Бунинг  учун таълим  тизимини  такомиллаштириш, изланиш,  ёш авлодни  илм-фан  асослари билан  чуқур  қуроллантириш лозим.Таълим  сифатини  яхшилаш, ўқитувчилар  касбий маҳоратини  ошириш  ва ота-оналарни  мактаб  ҳаётига кўпроқ  жалб  қилиш каби ишларни  бажариш  масъулият талаб  қилади. Шу  нарса ҳам яхши  маълумки, бирорта  натижа ўз-ўзидан пайдо  бўлмайди. Айниқса, мақсадга  эришиш  учун жуда  катта  куч, меҳнат, билим  ва ҳамжиҳатлик керак  бўлади.

Болаларни эркин,  мустақил  фикрлашга ўргатиш, ҳар  бир ўқувчига  индувидуал ёндошиш, синфда  ўқувчилар  учун ижодий  муҳит  яратиш, мустақил  қарорлар қабул  қилиш, болаларнинг  ижодий қобилиятини  ривожлантириш - буларнинг  ҳаммаси «интерфаол  методлар – болага  дўстона муносабатдаги  мактаб муҳитини  яратиш омили» лойиҳаси  талабларидир.

Ўзбекистон Республикасининг Биринчи Президенти И.А.Каримов  Олий Мажлиснинг  IX сессиясида сўзлаган  нутқларида шундай  деган  эдилар: "Демократик  жамиятда болалар, умуман  ҳар бир  инсон  эркин фикрлайдиган  этиб тарбияланмоғи  керак. Агар  болалар эркин фикрлашни  ўрганмаса, берилган  таълим  самараси паст  бўлиши  муқаррар. Аммо  билиш ўз йўлига, мустақил  фикрлаш  ҳам катта  бойликдир”.

Хулоса ўрнида шуни айтиш  жоизки, мактабда келажак  улғаяр  экан, келажак эгаларини  фидойи ўқитувчи, ҳар  жиҳатдан саводли,  изланувчан, бунёдкор устозгина тарбиялайди, улар Ватанимиз кутган  фарзандларни  вояга етказади.

Муборак САПАЕВА,

19-сонли мактаб директорининг маънавият ва маърифат ишлари бўйича ўринбосари.

(Фото - http://www.uza.uz)