ЭНГ УЛУҒ, ЭНГ АЗИЗ АЙЁМ ШУКУҲИ

Кун ўтгани сари халқимизнинг азалий орзулари ушалган, Ўзбекистонимиз мустақилликка эришган тарихий сана - 1 сентябрь ҳам тобора яқинлашмоқда. Юртимизда ҳар йили бу энг улуғ, энг азиз айёмни катта тайёргарлик, катта тараддуд билан кутиб олиш эзгу анъанага айланган. 2013 йил 12 июнь куни қабул қилинган Ўзбекистон Республикаси Президентининг «Ўзбекистон Республикаси давлат мустақиллигининг йигирма икки йиллик байрамига тайёргарлик кўриш ва уни ўтказиш тўғрисида»ги Қарори бу ишларни янги босқичга кўтарадиган ҳужжат бўлди.

Қарорда таъкидланганидек, халқимиз бу йил Ўзбекистон давлат мустақиллигининг йигирма икки йиллик тўйини катта тантана, шоду хуррамлик билан кенг нишонлайди. Ҳақиқатан ҳам, умуммиллий байрамимиз бўлган бу қутлуғ сана ҳақида сўз борар экан, ўтган давр мобайнида босиб ўтган йўлимизни, амалга оширган ишларимизни холисона сарҳисоб қилиб, бугунги ютуқ ва марраларга аввало қандай оғир ва машаққатли меҳнат эвазига эришганимизни яна ва яна бир бор кўз ўнгимиздан ўтказишимиз табиийдир.

Бугун юртимиздаги тинчлик ва осойишталик, тотувлик ва ҳамжиҳатлик, тараққиёт ва фаровонликни кўрган киши бундай ютуқлар тарихан қисқа давр ичида қўлга киритилганига ҳайрат билан қарайди. Ҳар йили бу қутлуғ айём яқинлашар экан, мустақиллигимиз тобора мустаҳкамланиб, юртимиз обод, халқимиз турмуши фаровон бўлиб бораётганини кўриб, Яратганга шукроналар айтамиз.

Юртимизнинг ҳар бир фуқароси қатори мен ҳам Мустақиллик байрамини муносиб тарзда кутиб олиш ва ўтказиш мақсадида қабул қилинган Юртбошимизнинг юқоридаги Қарорини катта ҳаяжон билан ўқиб чиқдим. "Қадр-қимматим, таянчим ва ифтихоримсан, мустақил Ўзбекистон!” деган шиорни асосий ғоя сифатида ўзида мужассам этган ҳолда юртимизнинг ҳар бир гўшаси – шаҳар ва қишлоқларда, овул ва маҳаллаларда уюшқоқлик билан, кўтаринки руҳда ўтказиладиган ташкилий-амалий, маданий-маънавий тадбирлар ҳамда тарғибот-ташвиқот ишларида ҳам депутат сифатида, ҳам шу элнинг фарзанди сифатида фаол қатнашишим лозимлигини юракдан ҳис қилдим.

Ҳақиқатдан ҳам, халқимизда тўйга тўёна билан боришдек ажойиб удум бор. Мустақиллик байрамимизни катта ютуқлар билан кутиб олиш ҳар биримизга ярашади. Шундай экан, келинг, азизлар ҳаммамиз бир ёқадан бош чиқариб, туманимизнинг барча ҳудудларини - маҳалла ва гузарларимиз, кўп қаватли уйлар, ўзимиз меҳнат қилаётган, ўзимиз яшаётган масканни тоза ва озода, кўркам ва обод масканга айлантирайлик! Зеро, энг улуғ, энг азиз байрамимизни муносиб кутиб олиш, қадр-қимматимиз, таянчимиз ва ифтихоримиз бўлмиш мустақил Ватанимизнинг ривожига ҳисса қўшиш ҳар биримиз учун шарафли вазифадир.

Ҳайитгул АЛЛАКОВА,

халқ депутатлари туман Кенгаши депутати,

Кенгашнинг регламент ва депутатлик одоби масалалари бўйича доимий комиссияси раиси.

(Фото - http://xs.uz)