9 апрель – Қорақалпоғистон Республикаси Конституцияси қабул қилинган кун

ФАРОВОН ТУРМУШИМИЗ АСОСИ

Ўзбекистон Республикаси мустақилликка эришганидан кейин Қорақалпоғистон ҳам Ўзбекистон Республикаси таркибига кирадиган суверен демократик Республика, деб эълон қилинди.

Қорақалпоғистон Республикасининг Конституцияси 1993 йил 9 апрель куни Қорақалпоғистон Республикаси Олий Кенгашининг 12-сессиясида қабул қилинди.

Қорақалпоғистоннинг Ўзбекистон Республикаси таркибидаги суверен демократик давлат сифатидаги мақоми мазкур Конституцияда тантанавор мустаҳкамлаб қўйилганлиги, Республика Олий Кенгаши томонидан суверен Қорақалпоғистон Республикаси Конституцияси қабул қилинган кун – 9 апрель – Қорақалпоғистон Республикасининг Конституцияси куни деб эълон қилингани қувончли тарихий ҳодиса бўлди.

Ўзбекистон Республикаси Конституциясига биноан Ўзбекистон Республикасининг бутун ҳудудида ягона фуқаролик ўрнатилган. Шунинг учун Қорақалпоғистон Республикаси фуқароси, айни вақтда, Ўзбекистон Республикасининг фуқароси ҳисобланади (21-модда). Бундай қоида Ўзбекистон Республикасининг «Фуқаролик тўғрисида»ги қонунида ҳам мустаҳкамланган (2-модда).

Демократик ҳуқуқий давлатнинг энг муҳим белгиларидан бири – барча фуқароларнинг қонун олдида тенглиги, Конституция ва қонунларнинг устунлигини таъминлашдир.

Қорақалпоғистон Республикаси Конституция ва қонунларининг Ўзбекистон Республикаси Конституциясига мос келишига қўйиладиган талаб Ўзбекистон ва Қорақалпоғистоннинг давлат-ҳуқуқий муносабатлари хусусиятларидан, Қорақалпоғистоннинг Конституциявий – ҳуқуқий мақомидан келиб чиқади.

Юқоридагилардан келиб чиқиб, шуни таъкидлаш мумкинки, мустақил Ўзбекистон Республикаси таркибидаги Қорақалпоғистон ҳуқуқий тизимининг шаклланиши ва ривожланишида Ўзбекистон Республикаси Конституциясининг ролини назарий ва амалий жиҳатдан ўрганиш ҳамда кўрсатиб бериш муҳим аҳамиятга эга масала ҳисобланади.

Хулоса қилиб айтганда, Қорақалпоғистон Республикасининг Конституцияси халқимизнинг осойишталиги, эркин ҳаёт кечириши гаровидир.

Фурсатдан фойдаланиб, туманимизнинг барча фуқароларини Қорақалпоғистон Республикаси Конституцияси куни байрами билан муборакбод этаман.

Илҳом Нуруллаев, туман ҳокимлиги ҳуқуқшуноси.

(Фото - sovminrk.gov.uz)