Халқ депутатлари туман Кенгашининг 32-сессияси тўғрисида АХБОРОТ

28 апрель куни Халқ депутатлари туман Кенгашининг 32-сессияси бўлиб ўтди.

Сессияда туман Кенгаши депутатлари, туман ҳокими ўринбосарлари, ҳокимлик масъул ходимлари, бўлимлар раҳбарлари, жамоат ташкилотлари ҳамда оммавий ахборот воситалари вакиллари иштирок этди. 

Сессия котиблигига 11-Ўрта қалъа сайлов округидан туман Кенгаши депутати Жасурбек Яхшимов сайланди.

Сессия кун тартибига "Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонунининг туман давлат солиқ инспекциясида ижроси тўғрисида”ги, Ўзбекистон Республикаси Президентининг 2016 йил 28 декабрдаги "Кексалар ва ногиронларни давлат томонидан қўллаб-қувватлаш тизимини янада такомиллаштиришга доир қўшимча чора-тадбирлар тўғрисида”ги қарорининг ижроси ва келгусидаги вазифалар тўғрисида”ги, "Туманда аҳолига тиббий хизмат кўрсатиш сифатини янада яхшилаш борасида амалга оширилаётган ишлар тўғрисида туман тиббиёт бирлашмаси бошлиғининг ҳисоботи ҳақида”ги, "Амударё тумани маҳаллий бюджетининг 2017 йил биринчи чоракдаги ижроси тўғрисида”ги ҳамда "Халқ депутатлари туман Кенгашининг регламенти ва Кенгаш доимий комиссиялари тўғрисидаги Низомга ўзгартиш ва қўшимчалар киритиш тўғрисида”ги масалалар киритилди.

"Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонунининг туман давлат солиқ инспекциясида ижроси тўғрисидаги масала юзасидан туман Кенгашининг қонунийлик, ҳуқуқ-тартибот ва фуқаролар хавфсизлигини таъминлаш масалалари бўйича доимий комиссияси раиси Ғуломжон Ешниёзов ахборот берди. Ахборотда таъкидланганидек, халқ депутатлари туман Кенгашининг қонунийлик, ҳуқуқ тартибот ва фуқаролар хавфсизлигини таъминлаш масалалари доимий комиссияси аъзолари томонидан юқорида номланган қонуннинг туман давлат солиқ инспекциясида ижроси ўрганиб чиқилди. Ўрганиш натижаларига кўра, инспекцияда мазкур Қонун ижроси бўйича муайян ишлар амалга оширилгани, шунинг билан бирга айрим камчиликлар мавжудлиги қайд қилинди. Депутатлар туман давлат солиқ инспекцияси ва тумандаги барча давлат ташкилотлари ва муассасаларида жисмоний ва юридик шахсларнинг мурожаатлари билан ишлаш ишларини янада яхшилашни назарда тутувчи қарор лойиҳасини бир овоздан маъқулладилар.

Кун тартибидаги иккинчи масала бўйича туман ҳокими ўринбосари Алишер Йўлдошев сўзга чиқиб, Ўзбекистон Республикаси Президентининг 2016 йил 28 декабрдаги "Кексалар ва ногиронларни давлат томонидан қўллаб-қувватлаш тизимини янада такомиллаштиришга доир қўшимча чора-тадбирлар тўғрисида”ги қарорининг ижроси ва келгусидаги вазифалар тўғрисидаги масала юзасидан ахборот берди.

Ахборотда кекса ёшдаги фуқароларни ва ногиронларни давлат томонидан қўллаб-қувватлаш, уларнинг мамлакат ижтимоий-сиёсий ҳаётида тўла ҳуқуқли иштирок этиши учун зарур шарт-шароитлар яратиш бўйича туманимизда амалга оширилаётган ишлар хусусида маълумотлар келтирилди.

Туманда аҳолига тиббий хизмат кўрсатиш сифатини янада яхшилаш борасида амалга оширилаётган ишлар бўйича туман тиббиёт бирлашмаси бошлиғи Олимбой Халимов ҳисобот берди.

Ҳисоботда муҳтарам Президентимиз раҳбарлигида соғлиқни сақлаш тизимини ислоҳ этиш борасида белгиланган вазифалардан келиб чиқиб, бирламчи тиббий-санитария муассасалари фаолиятини оптималлаштириш, аҳолининг барча қатламини замонавий тиббий-профилактика ёрдами билан тўлиқ қамраб олиш бўйича амалга оширилаётган ишларга тўхталиб ўтилди.

Кун тартибидаги навбатдаги масала – туман маҳаллий бюджетининг 2017 йил биринчи чоракдаги ижроси тўғрисидаги масала юзасидан туман молия бўлими мудири вазифасини вақтинча бажарувчи Бахтиёр Камолов ахборот берди.

Ахборотда 2017 йилнинг биринчи чораги давомида туман маҳаллий бюджетининг даромадлар қисми режаси 8 млрд. 65 млн. 436 минг сўмга белгиланган бўлиб, ҳақиқатда 8 млрд. 556 млн. 106 минг сўмга, яъни режага нисбатан 106,1 фоизга бажарилгани қайд қилинди.

Ҳисобот даврида маҳаллий бюджетнинг харажатлар қисми режаси 24 млрд. 458 млн. 503 минг сўмга белгиланган ва ушбу маблағлар асосан ижтимоий-маданий ва аҳолини қўллаб-қувватлаш харажатларига, иқтисодиёт соҳасида олиб борилаётган ислоҳотлар талабларини амалга ошириш тадбирларига қаратилган.

Кун тартибидаги сўнгги масала муҳокамасида депутатлар "Халқ депутатлари Амударё туман Кенгашининг регламенти ва Кенгаш доимий комиссиялари тўғрисидаги Низомга ўзгартиш ва қўшимчалар киритиш бўйича тайёрланган қарор лойиҳасини муҳокама қилиб, бир овоздан тасдиқланидар.

Кун тартибидаги барча масалалар бўйича тегишли қарорлар қабул қилинди ва шунинг билан сессия ўз ишини якунлади.