ЭЪТИБОРГА ЛОЙИҚ МЕҲНАТ ҚИЛАМИЗ
"Бўзёп” овулида жойлашган бизнинг 10-сонли умумтаълим мактабимизда айни кунда 414 нафар ўқувчиларга 60 нафар малакали ўқитувчилар таълим-тарбия бермоқда. 2009 йилда капитал реконструкция қилинган мактабимизда ўқувчиларнинг фан асосларини чуқур эгаллашлари учун барча шароитлар бор. Фан хоналари бугунги кун талабига мувофиқ жиҳозланган. Маънавият хонаси доимо ўқитувчилар ва ўқувчилар билан гавжум бўлади. Бу ердаги турли бадиий, илмий оммабоп китоблар, вақтли матбуот нашрларини мутолаа қилиш ҳаммамизнинг севимли машғулотимизга айланган.
Мактабимизда 12х24 метр ҳажмдаги замонавий спорт залининг қурилиб фойдаланишга топширилганлиги ўқувчиларнинг айни кўнглидаги орзуларининг ижобати бўлди. Бу ерда улар бўш вақтларида спортнинг ўзлари хоҳлаган турлари билан шуғулланадилар. Туманимизда ўтказилаётган турли спорт мусобақаларида ўқувчиларимизнинг мувафаққиятли қатнашаётганликлари бежиз эмас.
Таълим-тарбия жараёнининг самарадорлигига эришиш учун ўқитувчиларимизнинг ўз устларида ишлашлари ва билимларини ошириб боришларига ҳам интилаяпмиз. Ахир бугуннинг боласининг диққат-эътиборини юксак маънавиятли, маърифатли, ўз соҳасининг билимдони бўлган, ахлоқли ва одобли ўқитувчигина қозона олади. Болага дўстона муносабат қарор топгандагина дарсда ўқувчи ўзини эркин тута олади, фикрларини ўртага ташлай олади.
Бугунги кун ўқитувчиси болаларга таълим-тарбия берибгина қолмай, уларнинг интеллектуал салоҳиятини оширишга, қизиқишларини аниқлаб, ривожлантиришга кўмаклашувчи шахс ҳамдир.
Мактабимиз ўқитувчиларининг бу борадаги саъй-ҳаракатлари натижасида ўқувчиларимиз турли кўрик-танловларда ўз иқтидорларини намойиш қилишаётир.
Юртбошимиз ўқитувчиларга, "Ўқитувчи наинки синфхонасига файз ва зиё олиб кирадиган балки, минг-минглаб қалбларга эзгулик ёғдусини бахш этадиган мўътабар зотдир”, дея таъриф берганлари ҳар биримизнинг қалбимизга фахр ва ғурур бағишлайди.
Юртбошимизнинг ташаббуси билан 1 октябрь – Ўқитувчилар ва мураббийлар куни, умумхалқ байрами қилиб белгиланганлиги зиммамиздаги ғоят масъулиятли вазифамизни сидқидилдан адо этишга ундайди.
Фурсатдан фойдаланиб туманимизнинг барча ўқитувчиларини касб байрами билан табриклайман.
Гуласал МАТЁҚУБОВА,
10-сонли умумтаълим мактаби директори, Қорақалпоғистон халқ таълими аълочиси, халқ депутатлари туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
