Ер – олтин хазинамиз

Ер, ер ости бойликлари, сув, ўсимлик ва ҳайвонот дунёси ҳамда бошқа табиий заҳиралар умуммиллий бойликдир, улардан оқилона фойдаланиш зарур ва улар давлат муҳофазасидадир.

Ўзбекистон Республикаси Конституциясининг

55-моддаси.

Мамлакатимиз мустақилликка эришгач, ер муносабатларини тартибга солувчи қонунлар тизими ишлаб чиқилди ва уларни такомиллаштириш борасида муҳим ишлар амалга оширилди. Бу борадаги муносабатларни тартибга солишда Ўзбекистон Республикасининг "Ер Кодекси” асосий меъёрий ҳужжат бўлиб хизмат қилади.

Шуни алоҳида таъкидлаш жоизки, ер ресурсларидан фойдаланишда юридик ва жисмоний шахсларнинг барча ҳақ-ҳуқуқлари Конституциямиз билан кафолатланган. Умуммиллий бойлигимиз бўлган табиий заҳиралар – ер, ер ости ва ер усти бойликлари, сув ва ўсимлик дунёсидан оқилона фойдаланиш ҳамда эҳтиёткорона муносабатда бўлиш ҳар биримизнинг фуқаролик бурчимиздир. Айниқса, ер ресурсларининг талон-тарож қилинишига йўл қўймаслик, тупроқ экологияси бузилишининг олдини олиш, экишлик майдонлари, яйловлар, томорқа ерларидан йил мавсумларида мақсадли фойдаланишни таъминлаш – аҳолининг озиқ-овқат маҳсулотларига бўлган эҳтиёжини қондиришда муҳим омил ҳисобланади. Туман ер ресурслари ва давлат кадастри бўлими ходимлари томонидан ерга оид муносабатларни тартибга солиш борасида ибратлиишлар амалга оширилмоқда.

Туманимиз ҳудуди 102.119 гектарни ташкил этади. Шундан 32.482 гектари суғориладиган ерлар ҳисобланади. Боғлар, узумзор ва тутзорлар эса 1533 гектарни ташкил этади. Чорвачилик учун мўл-кўл озуқа заҳираси ҳисобланган 1.251 гектар пичанзор ва 8.579 гектар табиий яйловлар халқимизнинг гўшт ва сут маҳсулотларига бўлган эҳтиёжларини қондириш, чорвачиликни ривожлантиришда муҳим аҳамият касб этмоқда. 43.845 гектар майдонда турли хил қишлоқ хўжалик экинлари етиштирилади, 6.191 гектар ер майдони эса аҳолига томорқа учун ажратилган.

Туманимизда фаолият юритаётган 277 та фермер хўжаликларининг 254 таси пахтачилик ва ғаллачиликка ихтисослашган. 5 таси боғдорчилик, 6 таси паррандачилик ва 12 та фермер хўжалиги чорвачилик йўналиши бўйича фаолият олиб боришади. Улар қайси йўналишда иш олиб боришларидан қатъий назар, барчаси учун умумий маънода фойда келтирувчи манба – Ердир. Сабаби, у чорвадорми, пахтакорми, ғаллакору соҳибкорми, ерга сепган бир ҳовуч уруғи минглаб тонна пахта, ғалла, мева-чева, гўшт-сут маҳсулотлари бўлиб омборларни тўлдиради. Эл-юртга ризқ-насиба бўлиб дастурхонларни безайди. Хонадонларимизга кўрк бағишлаб, ҳаётимизга фаровонлик, турмушимизга ободлик олиб келади. Буларнинг барчаси умуммиллий бойлигимиз – Ерга, табиий заҳираларга оқилона муносабатимизнинг ҳаётий ифодасидир.

Ота-боболаримиз: "Оёғимиз остидаги Ер эмас – олтин хазина”, - деб таълим беришлари ҳам шундан. Шу боис, мамлакатимизда ерга бўлган муносабат мустақиллик йилларида давлат сиёсатининг энг устувор йўналишларидан бирига айланди. Демак, она заминимизни авайласак, шу оддий тупроқ бизнинг қадр-қимматимизни янада баланд кўтаради, ризқ-у насибамизни улуғ қилади.

Ўктам ЙЎЛДОШЕВ,

туман Ер ресурслари ва кадастри бўлими бошлиғи.