ЧЕГАРА ДАХЛСИЗЛИГИ АҲОЛИГА ҲАМ БОҒЛИҚ

Маълумки, туманимиз Туркманистон давлати билан чегарадош. Ушбу ҳудудларда аҳолининг Ўзбекистон Республикаси Давлат чегараси тўғрисидаги қонунини аҳолига кенг тарғиб этиш – чегараолди ҳудудида тинчлик-осойишталик сақланишини таъминлайди.

Шу мақсадда жорий йилнинг 27 октябрида 3-Чегарани қўриқлаш взводи командири Элёр Жўрабоев, ўринбосари Фазлиддин Маҳамадиевлар чегара ҳудудда жойлашган Уйшин маҳалла фуқаролари билан Давлат чегараси тўғрисида қонунни тарғиб этиш, фуқаролар томонидан давлат чегараси бузилишининг олдини олиш мақсадида суҳбат ўтказди.

Тадбирда Элёр Жўрабоев  ва Фазлиддин Маҳамадиевлар аҳолига Ўзбекистон Республикасининг Давлат чегараси тўғрисидаги қонуни талабларини, айниқса, чегараолди ҳудудда яшовчи аҳоли чуқур билиши, амал қилиши лозимлиги ҳақида гапирди. Таъкидландики, Ўзбекистон Республикасининг Давлат чегараси тўғрисидаги Қонуни мамлакатимиз Давлат чегарасини белгилаш, ўзгартириш, ҳимоя қилиш ва қўриқлаш соҳасидаги муносабатларни тартибга солишга хизмат қилади.

Давлат чегараларини белгилаш ва ўзгартириш пайтида Ўзбекистон Республикаси миллий хавфсизликни таъминлаш заруратидан келиб чиқади ва давлатларнинг суверенитети, ҳудудий яхлитлиги, давлат чегаралари дахлсизлиги ва бузилмаслигини ўзаро ҳурматлаш, чегара маслаларини тинч йўл билан ҳал этиш, чет эл давлатлари билан ҳар томонлама, тенг ҳуқуқлилик ва ўзаро манфаатдорлик асосида ҳамкорлик қилиш, қўшни давлатларнинг ички ишларига аралашмаслик, куч ишлатмаслик ва куч билан таҳдид қилмаслик принципларига амал қилинади. Шунингдек, ушбу Қонунда Давлат чегарасини белгилаш ва ўзгартириш, Давлат чегарасига белги қўйиш, Давлат чегараси режимини белгилаш каби муносабатларнинг ҳуқуқий асослари  каби кўпгина масалалар қамраб олинган.

Шунингдек, Давлат чегараси орқали товарлар, бошқа мол-мулк ва ҳайвонларни олиб ўтиш қонун ҳужжатларида ҳамда Ўзбекистон Республикасининг халқаро шартномаларда белгиланган жойларда, яъни белгиланган ўтказиш пунктлари орқали амалга оширилади.

Ушбу қонуннинг 15-моддасида Давлат чегарасини Давлат чегараси орқали ўтказиш пунктларидан бошқа жойдан ёки ўтказиш пунктлари орқали бўлса-да, бу борадаги  қоидаларни бузган ҳолда ҳар қандай  усул билан кесиб ўтиш, кесиб ўтишга уриниш Давлат чегарасини бузиш ҳисобланади, деб кўрсатилган.

Маърузаларда чегараолди ҳудудларида бўлишда чегара дахлсизлигига  раҳна  солмаслик, чегараолди ҳудудларида жойлашган ҳарбий мухандислик-техник иншоотларга ва тўсиқларга шикаст етказмаслик, чегарани бузиб ўтишга уринмаслик лозимлиги, бунингдек ҳолатлар содир этилса, амалдаги қонун-қоидаларга мувофиқ маъмурий ва жиноий жавобгарликка тортишга асос бўлиши таъкидланди.

Шунингдек, қўшни давлатлар чегараларида кейинги вақтларда содир этилаётган кўнгилсиз ҳолатларга холисона баҳо берилди. Сўнгра аҳолини қизиқтирган саволларга тегишли жавоблар берилди.

Ўтказилган тадбир чегараолди ҳудудида истиқомат  қилувчи аҳолига чегараларимиз дахлсизлигини сақлашга оид кўпгина билимларини сингдиргани билан аҳамиятли бўлди.

Шунингдек, шу куни Қиличбой овулида жойлашган 9202 “К” ҳарбий қисм масъуллари Дўрман овулида яшовчи, пандемия туфайли иқтисодий ночор аҳволга тушиб қолган Рустам Ҳусаиновнинг оиласида бўлиб, турмуш тарзи билан танишдилар ва кундалик эҳтиёж учун ишлатиладиган озиқ-овқат маҳсулотларини ҳадя этдилар.

Ушбу оиладагилар ўзларига кўрсатилган эътибордан ва ғамхўрликдан ниҳоятда мамнун бўлдилар. Шундай қийин вазиятда ҳол-аҳвол сўраб келган ҳамда рўзғор учун зарур бўлаётган ун, тухум, ёғ, макарон ва бошқа маҳсулотларни келтириб берган, энг муҳими эл-юрт тинчлиги, осойишталигини асраётган ҳарбийларга катта миннатдорчилик билдирдилар.

Ойгул РАЖАБОВА.