АҲОЛИ САЛОМАТЛИГИГА ҚАРАТИЛГАН ЮКСАК ЭЪТИБОР

Президентимизнинг 2020 йил 29 декабрь куни Олий Мажлисга ва халқимизга  қилган   Мурожаатномасида давлат ва жамиятни ривожлантириш, хусусан, соғлиқни сақлаш, аҳолига сифатли тиббий хизмат кўрсатиш соҳасини янада такомиллаштириш борасида устувор йўналиш ва вазифалар белгилаб берилди. 2021 йил – “Ёшларни қўллаб-қувватлаш ва аҳоли саломатлигини мустаҳкамлаш йили” деб эълон қилинди.

Бу бежиз эмас, чунки ёшларга эътибор юрт, миллат келажагига бўлган эътибор ҳисобланади. Оғир пандемия даври эса аҳоли саломатлигини сақлаш соҳасининг ҳам нақадар муҳим эканлигини яна бир карра исботлади. Шу жиҳатдан 2021 йил “Ёшларни қўллаб-қувватлаш ва аҳоли саломатлигини мустаҳкамлаш йили”, деб номланиши айни муддао бўлди. Бу эса тиббиёт соҳасининг янада тараққий этишида муҳим аҳамият касб этади.  Мурожаатномада келгуси йилларда соҳани ривожлантириш йўлида қандай туб ислоҳотлар амалга оширилиши қайд этилди. Хусусан, келгуси йилда ҳам коронавирус пандемиясига қарши курашни тизимли равишда давом эттириш энг муҳим вазифаларимиздан бири бўлиши, бунинг  учун 2021 йил давлат бюджетида 3 триллион сўм заҳира шакллантирилгани, ушбу маблағлар ҳисобидан, албатта, аҳолини коронавирусга қарши эмлаш тадбирлари ҳам амалга оширилиши таъкидланди.

Муҳтарам Юртбошимиз санитария - эпидемиология хизмати сифатини ошириш, унинг моддий-техник базасини яхшилаш ва замонавий лабораториялар ташкил этишга 200 миллион доллар йўналтирилишини айтганларида тиббиёт ходими сифатида жуда қувондим. Боиси, маблағлар санитария-эпидемиологик вазиятнинг яхшиланишига хизмат қилади. Бу – халқимизнинг тинч-осойишта ҳаётини таъминлайди.

Пандемия сабоқларидан келиб чиққан ҳолда, тиббиёт соҳасини рақамлаштириш кўлами янада кенгайтирилиши, она ва бола соғлиғига эътибор кучайтирилиши, шу мақсадда  15 ёшгача бўлган болалар ва ҳомиладор аёлларга 7 турдаги витаминлар, болалар учун паразитар касалликларга қарши дори воситалари бепул тарқатилиши, бу жараён билан 2021 йилда 11 млн. нафар, 2022 йилда 17 млн. нафар аҳоли қамраб олиниши, натижада аёллар ва болаларни йод, темир, фолий кислотаси, витаминлар ва паразитларга қарши дорилар билан бепул таъминлаш орқали аҳоли ўртасида камқонлик 25 фоизга камайтирилиши жорий йил учун долзарб вазифа қилиб қўйилди. Ўйлайманки, давлатимизнинг бунингдек ғамхўрлиги келгусида ўзининг қувонарли натижаларини беради.

Бир сўз билан айтганда, Президентимиз Мурожаатномасида соғлиқни сақлаш соҳасини ривожлантиришга юксак эътибор қаратилган. Бу эса соҳа ходимлари зиммасига улкан масъулият юклайди. 2021 йилда соғлиқни сақлаш соҳасида амалга ошириладиган туб ислоҳот, янгиланиш ва ўзгаришлар нафақат халқимизнинг бугуни, балки эртасининг ҳам порлоқ бўлишига хизмат қилади,  аҳоли саломатлигини сақлаш, соғлом авлоднинг дунёга келиши, уларнинг ҳар томонлама етук бўлиб униб-ўсишида муҳим ўрин тутади.

Белгиланган вазифаларни бажариш, соғлиқни сақлаш тизимидаги янгиланишларни амалга ошириш  машаққатли меҳнат, фидойиликни талаб этади. Туманимизнинг тиббиёт соҳасида меҳнат қилаётган шифокорлар ва ўрта тиббиёт ходимлари бу борада ҳам давлатимиз раҳбари, бутун халқимизнинг ишончини оқлашга ҳаракат қилади, деб сизларни ишонтираман.

Фахриддин АБДУЛЛАЕВ,

туман Тиббиёт бирлашмаси бошлиғи.