Халқ депутатлари Амударё туман Кенгашининг ўттиз саккизинчи сессияси тўғрисида АХБОРОТ

2014 йил 26 сентябрь куни Халқ депутатлари Амударё туман Кенгашининг ўттиз саккизинчи сессияси бўлиб ўтди.

Сессияни 24-Қангли сайлов округидан депутат, туман ҳокими Р.Йўлдашев кириш сўзи билан очди ва олиб борди.   

Сессияда туман Кенгаши депутатлари, ҳокимлик масъул ходимлари, ҳокимлик бўлимлари ва сиёсий партияларнинг туман Кенгаши раҳбарлари ҳамда оммавий ахборот воситалари вакиллари иштирок этдилар.

Сессия котиблигига 13-Хоразм сайлов округидан депутат Гуласал Матякубова сайланди.

Сессия кун тартибига "Халқ депутатлари Амударё туман Кенгашига сайлов бўйича туман сайлов комиссиясини тузиш тўғрисида”ги, "Халқ депутатлари Амударё туман Кенгашига сайлов бўйича сайлов округларининг сонини белгилаш тўғрисида”ги, "Амударё тумани ҳудудидаги Қорақалпоғистон Республикаси Жўқорғи Кенгесига депутатлар сайловини ўтказувчи округ сайлов комиссияларининг таркиби бўйича тавсиялар бериш тўғрисида”ги, "Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссиясининг  2014 йил 5 сентябрдаги "Тошкент вилояти ҳокимлигида 2014 йилнинг 5 сентябрида ўтказилган "Депутатлик назорати – минтақавий муаммоларни ҳал қилиш йўллари: "Соғлом бола йили” Давлат дастурини амалга ошириш мисолида” мавзуидаги давра суҳбатида қабул қилинган тавсияларни тасдиқлаш ва ижросини таъминлаш тўғрисида”ги СКҚ-38-II-сонли Қарори ҳақида”ги ҳамда "Туман ҳокимининг айрим қарорини тасдиқлаш тўғрисида”ги масалалар киритилди. Маълумки, 2014 йил 11 сентябрь куни Ўзбекистон Республикаси Марказий сайлов комиссиясининг йиғилиши бўлиб ўтиб, унда Ўзбекистон Республикаси Олий Мажлиси Қонунчилик палатасига, вилоят, туман ва шаҳар Кенгашларига сайлов бўйича сайлов кампанияси шу йил 15 сентябрдан бошланишини эълон қилиш ҳақида қарори қабул қилинган эди. Ўзбекистон Республикаси Конституциясининг 117-моддаси иккинчи қисми ва "Давлат ҳокимияти вакиллик органларига ва Ўзбекистон Республикаси Президентининг навбатдаги сайлови тўғрисида”ги Ўзбекистон Республикаси Конституциявий қонунининг 1-моддасига мувофиқ Ўзбекистон Республикаси Олий Мажлиси Қонунчилик палатасига, вилоят, туман ва шаҳар давлат ҳокимияти вакиллик органларига сайлов 2014 йилнинг декабрь ойи учинчи ўн кунлигининг биринчи якшанбасида – 21 декабрда ўтказилади. Шунингдек, Қорақалпоғистон Республикаси Марказий сайлов комиссиясининг ҳам 2014 йил 12 сентябрда сайлов кампаниясининг бошланишини эълон қилиш ҳақидаги қарори қабул қилинди. Кун тартибидаги биринчи масала бўйича туман сайлов комиссияси таркибини раис ва 8 нафар аъзодан иборат таркибда тузиш таклиф қилинди ва таклиф депутатлар томонидан бир овоздан маъқулланиб, туман сайлов комиссияси тузилди. Сессия кун тартибидаги иккинчи масала муҳокама қилиниб, сайловчилар сонини, ҳудудни ва маҳаллий шароитларни инобатга олган ҳолда, Амударё туман Кенгашига сайлов бўйича 30 та сайлов округини тузиш таклиф қилинди. Мазкур таклиф ҳам депутатлар томонидан бир овоздан маъқулланди.

Депутатлар томонидан Қорақалпоғистон Республикаси Жўқорғи Кенгесига сайлов ўтказувчи 6 та сайлов округлари бўйича округ сайлов комиссиялари таркиби юзасидан тавсиялар бериш масаласи муҳокама қилиниб, тегишли қарор қабул қилинди.

Кун тартибидаги "Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссиясининг 2014 йил 5 сентябрдаги "Тошкент вилояти ҳокимлигида 2014 йилнинг 5 сентябрида ўтказилган "Депутатлик назорати – минтақавий муаммоларни ҳал қилиш йўллари: "Соғлом бола йили” Давлат дастурини амалга ошириш мисолида” мавзуидаги давра суҳбатида қабул қилинган тавсияларни тасдиқлаш ва ижросини таъминлаш тўғрисида”ги СКҚ-38-II-сонли Қарори ҳақида”ги ва "Туман ҳокимининг айрим қарорини тасдиқлаш тўғрисида”ги масалалар ҳам муҳокама қилиниб, тегишли қарорлар қабул қилинди.

Шунинг билан сессия ўз ишини якунлади.

Ўз мухбиримиздан.