МИССИОНЕРЛАРНИНГ АЛДОВИГА УЧМАНГ!

Tарих ўзга ҳудудларни забт этиш мақсадида ишлатиладиган уруш қуроллари йиллар давомида узлуксиз такомиллашиб борганини кўрсатади. Бугунги кунда эса, ўзга ҳудудларни забт  этиш учун  уларнинг аҳолисини маҳв этиш шарт эмас. Зеро, онги ва шуури забт этилган, қараш ва кайфиятлари керакли йўналишга ўзгартирилган ерлик аҳоли кўмагида ҳар қандай бойлик, табиий ресурсларга эгалик қилиш мумкин бўлиб қолмоқда.

Миссионерликнинг асосий мақсади христианликни тарғиб қилиш йўли билан жамиятда хайрихоҳ бўлган гуруҳларни шакллантириш ва тарафдорлар сонини кўпайтириш орқали муайян мамлакат ва ҳудуд устидан назорат ўрнатишдир. Юртбошимиз таъкидлаганларидек. «...қудратли давлатлар ва муайян сиёсий марказлар ўз мақсадларига эришиш учун аввало забт этмоқчи бўлган мамлакатларнинг аҳолиси онгини ўзига қарам қилишга интилади».

Миссионерлар қайси юртга кирсалар, ўша ҳудудлардаги халқларни христианлаштириш йўли билан уларнинг бирдамлигига путур етказиш, ички низоларни келтириб чиқариш орқали уларнинг ривожланишига тўсқинлик қилиш, иқтисодий, ижтимоий ва маънавий жиҳатдан қарам ва тобе қилишга ҳаракат қиладилар. Масаланинг ана шу жиҳатига эътибор берилса, миссионерлик ҳаракатлари ортида диний заминда миллатни ичидан бўлиб ташлашга қаратилган ғаразли сиёсий мақсадлар ётганини, у келтириб чиқарадиган фожеаларни англаб етиш қийин эмас.

Бу - миссионерлар ўз олдиларига қўйган мақсадларга эришадиган бўлсалар, улар фаолият олиб бораётган мамлакатда ҳам халқнинг парокандаликка юз тутиши ва маънавий  таназзулнинг келиб чиқиши мумкинлиги ҳақида хулоса чиқариш имконини беради.  

Миссионерларнинг бугунги кундаги фаолияти ҳеч бир минтақа, ҳеч бир давлат бундай таҳдиддан холи эмаслигини кўрсатади. Бундай ҳолатларнинг олдини олиш учун эса миссионерликнинг моҳиятини тўғри англаш, уни бартараф этиш йўлида мақсадли, тизимли ва узлуксиз фаолият олиб бориш зарур бўлади.

Абдураҳмон ҳожи МАТСАПАЕВ,