1-SONLI UMUMTAʼLIM MAKTABIDA “KONSTITUTsIYaM – FAXRIM” MAVZUSIDA TADBIR OʻTKAZILDI

Oʻquvchi-yoshlarning huquqiy madaniyatini yanada yuksaltirishga hissa qoʻshish maqsadida Amudaryo tumani Maktabgacha va maktab taʼlimi boʻlimiga qarashli 1-sonli umumtaʼlim maktabida “Konstitutsiyam – faxrim” mavzusida maʼnaviy maʼrifiy va adabiy-musiqiy tadbir tashkil qilindi.

Tadbirda Yangi tahrirdagi Oʻzbekiston Respublikasi Konstitutsiyasida mamlakatimizning yaqin va uzoq istiqboldagi barqaror taraqqiyoti, xalqimiz farovon va osoyishta hayotining mustahkam va ishonchli kafolati, insonning shaxsiy huquqlari va erkinliklari, maktab taʼlimi, shaxsning salomatligi, atrof-muhit muhofazasi, millatlararo totuvlik, tinchlik va tenglik kabi printsiplar qonuniy mustahkamlab qoʻyilgani eʼtirof etildi.

Maktabning ijtimoiy fanlar oʻqituvchilari tomonidan tashkil etilgan mazkur tadbirda maktab pedagogika jamoasi, Milliy gvardiya inspektori, tarbiyachi-psixolog Nurlan Oʻrazbayev hamda yuqori sinf oʻquvchilari ishtirok etdilar.

Tadbirni maktab direktori Dilrabo Sherboyeva ochdi va barchani Bosh Qomusimiz qabul qilinganligining 32 yilligi bilan samimiy tabrikladi. Dilrabo Sherboyeva Konstitutsiyamizning har bir bobi toʻgʻrisida alohida toʻxtalib, bugungi farovon, tinch va osoyishta hayotimizni barpo etishda Bosh Qomusimizda belgilab qoʻyilgan normalarning ahamiyati kattaligini, jamiyatimizning har tomonlama taraqqiy etishida muhim huquqiy asos boʻlgan Konstitutsiya har bir fuqaro uchun istiqbolli rejalarni amalga oshirish yoʻlida dasturilamal boʻlib xizmat qilishini, ayniqsa, oʻquvchi-yoshlarning konstitutsiyaviy bilimlarini oshirish, ushbu huquqiy hujjatni moddama-modda chuqur oʻrganishlarini taʼminlash har bir pedagog xodimning zimmasidagi masʼuliyatli vazifasi ekanligini taʼkidladi.

Shuningdek, tadbirda Milliy gvardi inspektori, tarbiyachi-psixolog Nurlan Oʻrazbayev va ijtimoiy fanlar oʻqituvchilari ham Yangi tahrirdagi Oʻzbekiston Respublikasi Konstitutsiyasi toʻgʻrisida, xususan, Bosh Qomusimizga kiritilgan oʻzgartirishlar, yangi normalar haqida batafsil soʻz yuritishib, unda insonparvarlik va xalqparvarlik tamoyillari yanada mustahkamlanganini misollar bilan ifodalab berdilar.

Tadbirning adabiy-musiqiy qismida maktabning yuqori sinflar oʻquvchilari oʻzlarining Konstitutsiya bilimdonlari sifatidagi mahoratlarini amalda namoyon etishdi va har bir modda boʻyicha sheʼriy taʼriflar berishdi. Konstitutsiyamizni madh etuvchi kuy va qoʻshiqlar esa har bir qalbga Bosh Qomusimizdan faxrlanish tuygʻusini bagʻishladi. Oʻquvchi- yoshlar Konstitutsiyamiz qabul qilinganining 32 yilligini ustozlari va tadbir mehmonlari bilan birgalikda tinchlik, doʻstlik, millatlararo totuvlik va tenglik madh etilgan kuy-qoʻshiqlar, raqslar orqali faxr-u iftixor bilan tantanali nishonladilar.

Robiya Yoʻldosheva.