KITOBXONLIK VA MUTOLAA MADANIYaTI HAFTALIGI

Barcha davrlarda ham inson hayoti uchun eng zarur narsalar qadrlanib, eʼzozlangan. Ulardan eng muhim va azizi – non, ikkinchisi kitobdir. Non – inson tanasiga kuch-quvvat beruvchi moddiy neʼmat boʻlsa, kitob-hamisha insoniyat uchun maʼnaviy boylik, qudrat timsoli boʻlib kelgan. Shu bois, xalqimiz uchun kitobxonlik – maʼnaviy davlatmandlikdir.

Maʼlumki, Oʻzbekiston Xotin-qizlar qoʻmitasining tashabbusi bilan barcha taʼlim muassasalarida tashkil etilgan "Orasta qizlar” toʻgaragi mashgʻulotlari rejasiga "Kitobxonlik va kitob mutolaasi” mavzusida tadbirlar oʻtkazish kiritilgan. Shu asosda yoshlar, ayniqsa, qiz bolalarning boʻsh vaqtlarini mazmunli oʻtkazish, ularni "Ommaviy madaniyat”ning va mafkura maydonining har qanday xurujlaridan himoya qilish, maʼnaviy dunyosini badiiy yetuk asarlarga singdirilgan gʻoyalar bilan boyitish maqsadida Oʻzbekiston Xotin-qizlar qoʻmitasi tomonidan 2015-yil 25-maydan 28-mayga qadar respublikamizning barcha oʻquv muassasalarida "Kitobxonlik va mutolaa madaniyati” mavzusidagi haftalik eʼlon qilindi. Mazkur haftalik bizning tumanimizda ham koʻtarinki ruhda oʻtkazildi.

Mangʻit iqtisodiyot kollejida shu yilning 28-may kuni boʻlib oʻtgan "Kitobxonlik va mutolaa madaniyati” haftaligining yakuniga bagʻishlangan tadbirda haftalik davomida tumanimizdagi barcha umumtaʼlim maktablari, akademik litsey va kasb-hunar kollejlaridagi "Orasta qizlar” toʻgaragining faol aʼzolari boʻlgan oʻquvchi-qizlar ishtirok etishib, haftalik davomida oʻqilgan kitoblar haqidagi oʻz xulosalari, tengdoshlariga kitobxonlikni targʻib etish boʻyicha taklif hamda fikrlarini bildirishdi.

Tadbirni tuman Xotin-qizlar qoʻmitasi raisi Maryam Ahmedova ochdi hamda "Kitobxonlik va mutolaa madaniyati” haftaligining yoshlar tarbiyasidagi ahamiyati, haftalikdan kutilayotgan natijalar haqida gapirdi.

Shundan soʻng, haftalik davomida oʻqishga tavsiya etilgan I.A.Karimovning "Yuksak maʼnaviyat – yengilmas kuch” asari haqidagi taqdimot hamda kitobxonlikni ommalashtirish yuzasidan targʻibot usullari boʻyicha kitobxon Maqsuda Yarashboyeva, Oʻzbekiston xalq yozuvchisi Xudoyberdi Toʻxtaboyevning "Sariq devni minib” asari yuzasidan Dilnoza Nurimbetova, Oʻzbekiston xalq yozuvchisi Oʻtkir Hoshimovning "Dunyoning ishlari” asari boʻyicha Nafisa Gulimbetova, Antuan De Sent-Ekzyuperining "Kichkina shahzoda” asari yuzasidan Umida Hayitboyeva hamda Oʻzbekiston xalq shoiri Muhammad Yusufning "Saylanma” sheʼrlar toʻplami yuzasidan Sevara Xalillayevalar batafsil soʻz yuritdilar.

Haftalik uchun tanlab olingan va tumanimizdagi barcha oʻquv muassasalaridagi "Orasta qizlar” toʻgaragi aʼzolari tomonidan mutolaa etilgan yuqoridagi beshta asar boʻyicha kitobxon qizlar oʻz taassurotlari, fikr-mulohazalari bilan oʻrtoqlashdilar. Beshta asarga singdirilgan yuksak insonparvarlik, mehnatsevarlik, oʻzaro mehr-oqibat, ilm-hunar oʻrganishga ishtiyoq, doʻstlik, tinchlik va totuvlik, vatanparvarlik tuygʻulari haqida toʻlib-toshib gapirdilar.

- Kitob rastalarida kitoblar koʻp, - dedi tadbir yakunida tuman hokimi oʻrinbosari, Xotin-qizlar qoʻmitasi raisi M.Ahmedova yoshlarga qarata, - shu barobarida kitobxonlar ham oz emas. Lekin biz kitobni tanlab, saralab oʻqishni bilamizmi? Gap - mana shunda. "Kitobxonlik va mutolaa madaniyati” haftaligidan koʻzlanayotgan maqsad – yoshlarimiz toʻgʻri kelgan kitobni emas, aynan bizning millatimiz ruhiga mos, qalblarga maʼnaviy oziq, boylik beradigan asarlarni oʻqishlarini targʻib etishdir. Chunki, hozirgi globallashuv jarayonida bizning maʼnaviy ildizlarimizga bolta urish, "ommaviy madaniyat”, diniy ekstremizm, diniy aqidaparastlik gʻoyalarini targʻib qilishga xizmat qiluvchi kitoblar ham har xil yoʻllar bilan chetdan mamlakatimizga olib kelinayotir. Bundan tashqari, maʼnaviy-tarbiyaviy ahamiyati sayoz asarlar chop etilayotir. Demak, oʻqiladigan asarni tanlay bilish ham sanʼat. Oʻsib kelayotgan yoshlar ongida ana shunday sanʼatni, toʻgʻrirogʻi, maʼnaviy immunitetni shakllantirishimiz va mustahkamlashimiz zarur.

"Kitobxonlik va mutolaa madaniyati” haftaligiga bagʻishlangan tadbir ishtirokchilari boʻlgan "Orasta qizlar” toʻgaragi aʼzolari, tumanimizdagi barcha oʻquv muassasalarining oʻzbek tili va adabiyoti fani oʻqituvchilari haftalik davomida oʻquvchi-yoshlar tomonidan oʻqib-oʻrganilgan asarlarning yosh avlodni barkamol insonlar qilib tarbiyalashdagi ahamiyati haqida oʻz fikr-mulohazalarini bildirdilar.