TADBIRKORLAR UChUN YaNGI IMKONIYaTLAR

Kichik biznes va xususiy tadbirkorlikni har tomonlama qoʻllab-quvvatlash mamlakatimizni ijtimoiy-iqtisodiy rivojlantirishda muhim ahamiyat kasb etmoqda.

Muhtaram Prezidentimizning joriy yil 15-mayda qabul qilingan "Xususiy mulk, kichik biznes va xususiy tadbirkorikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari toʻgʻrisida”gi Farmoni esa bu boradagi islohotlarning yangi va muhim bosqichini belgilab berishi shubhasiz.

Ushbu Farmon bilan tadbirkorlarni ishonchli himoya qilish, oʻz faoliyatlarini rivojlantirish yoʻlidagi toʻsiqlarni bartaraf etishning toʻrtta asosiy yoʻnalishi boʻyicha amalga oshiriladigan aniq chora-tadbirlar belgilandi.

Birinchi yoʻnalishga koʻra tadbirkorlik faoliyatiga noqonuniy aralashish va toʻsqinlik qilish, xususiy mulkdorlar huquqlarini buzganlik uchun davlat, huquqni muhofaza qiluvchi va nazorat organlari mansabdor shaxslarining javobgarligi oshiriladi.

Ikkinchi yoʻnalishda – xususiy mulkni himoya qilish kafolatini kuchaytirish, tadbirkorlik faoliyatini tartibga soladigan maʼmuriy va jinoyat qonunchiligini liberallashtirish jarayonini davom ettirish beligilandi.

Uchinchi yoʻnalishda belgilangan vazifalarga koʻra barcha turdagi roʻyxatdan oʻtkazish, ruxsat berish va litsenziyalash, shuningdek, tashqi iqtisodiy faoliyatni amalga oshirish bilan bogʻliq tartib tamoyillar yanada soddalashtiriladi.

Bu yoʻnalishda tuman, shahar hokimliklari huzuridagi tadbikorlik subʼektlarini roʻyxatdan oʻtkazish inspektsiyalari negizida tadbirkorlarga "bir darcha” tamoyili asosida davlat xizmatlari koʻrsatish yagona markazlarini tashkil etish va 2016-yilning 1-yanvaridan ushbu markazlarning faoliyat boshlashini taʼminlash belgilandi. Har bir tadbirkor oʻzi uchun kerakli davlat xizmatlarini shu markazlar orqali oladi.

Toʻrtinchi yoʻnalishda xususiy mulk va xususiy tadbirkorlikni jadal rivojlantirish uchun zarur shart-sharoit va imkoniyatlar yaratish, ularning moddiy kredit resurslaridan foydalanishini kengaytirish, biznes muhitini yaxshilashga  doir tadbirlar oʻz ifodasini topgan.

Ushbu yoʻnalish boʻyicha joriy yilning 1-iyulidan yakka tartibdagi tadbirkorlarga faoliyatidan kelib chiqqan holda bir nafardan uch nafargacha xodim yollash huquqi berildi. Bunda har bir yollangan ishchiga pensiya jamgʻarmasiga eng kam oylik ish haqining 50 foizi miqdorida sugʻurta badali va belgilangan soliq stavkasining 30 foizi miqdorida soliq toʻlashi belgiladi. Agar yakka tartibdagi tadbirkorlar ushbu Farmonga asosan kasb-hunar kollejlari bitiruvchilarini ishga qabul qilsa, bitiruvchilarning kollejni tugatganidan boshlab oʻn ikki oy mobaynida yollanma ishchilar uchun beliglangan soliqdan ozod etilishi belgilab qoʻyilmoqda.

Bunday imkoniyatlar bizning tumanimizda faoliyat yuritayotgan 700 dan ziyod yakka tartibdagi tadbirkorlar uchun yangi ish oʻrinlarini yaratishga, yoshlarni tadbirkorlik faoliyayatiga jalb etishga sharoit yaratadi.