Xalq deputatlari tuman Kengashining 11-sessiyasi toʻgʻrisida AXBOROT

2015-yil 16-noyabr kuni xalq deputatlari tuman Kengashining oʻn birinchi sessiyasi boʻlib oʻtdi. Sessiyaga xalq deputatlari Amudaryo tuman Kengashi Reglamentining 16-moddasiga muvofiq tuman hokimi topshirigʻiga binoan deputat R.Oʻrozboyev raislik qildi.

Sessiyada Kengashi deputatlari, Qoraqalpogʻiston Respublikasi Joʻqorgʻi Kengesiga tumandan saylangan deputatlar, hokim oʻrinbosarlari, hokimlik masʼul xodimlari, huquq-tartibot organlari va boʻlimlar rahbarlari, jamoat tashkilotlari, tuman Kengashi huzuridagi "Jamoatchilik nazorati Kengashi” aʼzolari, tijorat banklari, tuman fermerlari Kengashi, qishloq va suv xoʻjaligi, yer resurslari va davlat kadastri boʻlimlari, ovullar va ular tarkibidagi mahalla fuqarolar yigʻinlari, muqobil mashina traktor parklari, qishloq xoʻjaligiga xizmat koʻrsatuvchi tashkilotlar rahbarlari, tanlovda qatnashish uchun hujjat topshirgan ayrim fermer xoʻjaliklari rahbarlari va fuqarolar hamda ommaviy axborot vositalari vakillari ishtirok qildi.

Sessiya kotibligiga 18-"Xitoy” saylov okrugidan deputat G.Babajanov saylandi.

Sessiya kun tartibiga "Qoraqalpogʻiston Respublikasi Markaziy saylov komissiyasi aʼzoligiga nomzod tavsiya qilish toʻgʻrisida”gi va "Amudaryo tumanida fermer xoʻjaliklari tasarrufidagi yer maydonlari uchastkalari hajmlarini maqbullashtirish va yangidan fermer  xoʻjaliklarini tashkil etish boʻyicha amalga oshirilayotgan ishlar toʻgʻrisida”gi masalalar havola qilindi.

Deputatlar "Qoraqalpogʻiston Respublikasi Markaziy saylov komissiyasi toʻgʻrisida”gi Qoraqalpogʻiston Respublikasi Qonunining 3-moddasiga asosan Markaziy saylov komissiyasining aʼzoligiga Tuyamoʻyin-Nukus mintaqalararo suv quvuridan foydalanish boshqarmasi Mangʻit shahar suv tarmoqlari korxonasi boshligʻi Karimov Ikrom Erkinovichning nomzodi tavsiya qildilar.

Kun tartibidagi ikkinchi masala boʻyicha tuman qishloq va suv xoʻjaligi boʻlimi boshligʻi, Qoraqalpogʻiston Respublikasi Joʻqorgʻi Kengesi deputati, "Jamoatchilik nazorati Kengashi” aʼzosi, Amudaryo tumanida fermer xoʻjaliklari tasarrufidagi yer maydonlari uchastkalari hajmlarini maqbullashtirish boʻyicha ishchi guruhi rahbari oʻrinbosari Anvar Yuldashev axborot berdi.

Axborotda "Qishloq xoʻjaligida iqtisodiy islohotlarni chuqurlashtirish boʻyicha Respublika komissiyasining 2015-yil 21 oktyabrdagi "Fermer xoʻjaliklarining yer uchastkalaridan samarali foydalanish, qishloq xoʻjalik mahsulotlari ishlab chiqarishni yanada koʻpaytirish, fermerlarning moliyaviy holatini yanada yaxshilash maqsadida ularning yer uchastka hajmlarini maqbullashtirish yuzasidan qoʻshimcha chora-tadbirlar toʻgʻrisida”gi 01-03-13-12-sonli yigʻilish bayoni topshiriqlarining ijrosi boʻyicha atroflicha maʼlumot berildi.

Muzokaralardan keyin deputatlar tuman hokimligi yer zahira fondi hisobidagi yer uchastkalarida fermer xoʻjaliklari tashkil qilish uchun tanlov komissiyasiga hujjat topshirgan talabgorlar bilan savol-javob qilib, ularning tanlovda ishtirok etishlariga ruxsat berdilar.

Kun tartibidagi masalalar boʻyicha tuman Kengashining tegishli qarori qabul qilindi va shuning bilan sessiya oʻz ishini yakunladi.

Tuman hokimligining axborot xizmati.