SOHIBQIRON RUHI QOʻLLAGAN VATAN
Qadimiy Movarounnahr diyori serhosil zamini, tabiiy boyliklari bilan dunyoga mashhur boʻlgan. Bu hududda Abu Rayhon Beruniy, Abu Ali Ibn Sino, Al-Xorazmiy, Mirzo Ulugʻbek, Bobur singari buyuk shaxslar yetishib chiqqan. Amir Temur, Jaloliddin Manguberdi, Temur Malik singari sarkardalar yashab, xalqini, yurtini dunyoga tanitganlar. Ulugʻ bobokalonimiz Amir Temur oʻz yurtini moʻgʻul bosqinidan himoya qilib qolmasdan, balki qisqa fursatda koʻplab xalqlarni moʻgʻul istibdodidan xalos etdi va ulkan, qudratli davlatni barpo qildi. Samarqandday goʻzal maskanni oʻziga poytaxt qilib, unda tengsiz, hashamatli, salobatli imoratlar bunyod etib, jumlai jahonni lol qoldirdi.
Biz bugun yashayotgan mustaqil Oʻzbekiston davlatidagi tarixiy shaharlar, goʻzal makonlarning koʻpchiligi Temuriylar davrida vujudga keldi. Temuriylar davri har sohada uygʻonish davri boʻldi. Yer yuzining koʻpgina davlatlari bilan iqtisodiy, siyosiy aloqalar oʻrnatildi. Buyuk ipak yoʻli qaytadan tiklanib, uning savdo karvonlari uchun doimo ochiq va bexatar boʻlishi taʼminlandi. Afsuski, biz koʻp yillar davomida ana shunday buyuk zotga, dunyoga mashhur davlat arbobiga haqqoniy baho berish imkonidan mahrum boʻlib yashadik. Shoʻro davrida buyuk bobokalonimizni qonxoʻr jallod, zolim, deb nomini qoraladilar. Shoʻro tuzumi sohibqiron hayotiga oid haqiqatlarni xalqdan yashirib keldi. Mustaqillikka erishgach, buyuk bobomiz nomi qayta tiklandi. Uning mahobatli haykallari qad rostladi. Yangi muzeylar, istirohat bogʻlari yaratildi. Amir Temur qabri obod qilindi.
Mana bu yil ulugʻ bobomizning 680 yillik yubileyi munosabati bilan yurtimizda buyuk sarkarda nomiga bagʻishlab, teatrlarda sahna koʻrinishlari, bellashuvlar keng koʻlamda oʻtkazilmoqda. Bularning barchasi muhtaram Prezidentimiz tashabbuslari bilan amalga oshirilmoqda. Biz yoshlar bu ulugʻ bobomizga oʻxshab xalqimizga oʻrnak boʻladigan, elimizga, yurtimizga nafi tegadigan oʻgʻil-qizlar boʻlishimiz kerak, deb oʻylayman. Har birimizning xulqimizda bobomizga oʻxshash jihatlar boʻlishi kerak.
Amir Temurni anglash – oʻzligimizni anglash demakdir. Amir Temurni ulugʻlash – tarixan teran ildizlarimizga, madaniyatimizga, qadriyatimizga asoslanib, buyuk kelajagimizga ishonchimizni mustahkamlash demakdir.
Jahongir NURIMOV, Mangʻit iqtisodiyot kolleji oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
