ChIGIT EKISh MAVSUMI QIZGʻIN DAVOM ETMOQDA

Istiqlol yillarida Prezidentimiz rahnamoligida agrar sohada amalga oshirilayotgan izchil islohotlar samarasida qishloq xoʻjaligida hosildorlik oshib, sifati yuksalishiga erishilmoqda. Qishloq xoʻjaligi mahsulotlari ishlab chiqaruvchilarni yonilgʻi-moylash materiallari, mineral oʻgʻitlar bilan taʼminlash sezilarli darajada yaxshilangani bu borada muhim ahamiyat kasb etmoqda.

Bu yil tumanimizdagi paxtachilikka ixtisoslashtirilgan 507 ta fermer xoʻjaliklarida 15950 gektar paxta maydonining 11000 gektariga gʻoʻzaning "Sulton”, 3250 gektariga S-4727 va 1700 gektariga yangi navlarning ekilishi rejalashtirilgan edi. Ayni kunda barcha fermer xoʻjaliklaridagi qishki suvga qondirilgan paxta dalalarida chigit ekish ishlari qizgʻin olib borilmoqda.

Ekish jarayonlarining qisqa muddatda va sifatli bajarilishini taʼminlash maqsadida paxta yetishtiruvchi fermer xoʻjaliklariga urugʻlik chigitni sifatli yetkazib beruvchi shaxobchalar uzluksiz faoliyat olib bormoqda. Joylarda belgilangan tartibga asosan urugʻlik chigitni tayyorlash, yetkazib berish, talon-tarojlikka yoʻl qoʻymaslik boʻyicha tizimli ish yoʻlga qoʻyiladi. Shuningdek, talab qilinadigan dizel yoqilgʻisi va mineral oʻgʻitlar miqdorlari aniqlangan boʻlib, ularni ham taʼminotchi korxonalar dala boshiga uzluksiz yetkazib bermoqdalar.

Ayni kunda chigit ekish ishlariga 145 ta haydov traktorlari, 221 ta transport traktorlari, 211 dona chigit ekish seyalkalari jalb qilinmoqda. Dorilangan, sertifikatlangan urugʻlik chigitlar fermer xoʻjaliklariga 16 ta chigit tarqatish shoxobchalari tomonidan toʻxtovsiz ravishda yetkazib berilmoqda.

Mavsum davomida texnika va mexanizmlarni toʻla quvvat bilan ishlashini taʼminlash, tezkor xizmat koʻrsatish va ularning texnik holati ustidan doimiy nazorat qilib borish maqsadida koʻchma taʼmirlash ustaxonalari tashkil etilgan hamda ularga tegishli mutaxassislar biriktirilgan.

Oʻz tarkibiga tajribali va malakali qishloq xoʻjalik mutaxassislarini biriktirgan sifat guruhlari va mingboshilar yerlarning ekishga sifatli tayyorlanishi va sifatli ekilishi ustidan nazorat oʻrnatgan. Oqar suv va yonilgʻi-moylash materiallari sarfini kamaytirish uchun imkoni boricha qayta ekishga yoʻl qoʻymay, chigit ekish mavsumini juda qisqa muddatda tamomlash ayni kunda tumanimiz qishloq xoʻjaligi sohasi xodimlari oldida turgan dolzarb vazifadir.

Ekish mavsumini uyushqoqlik bilan, oʻz vaqtida va sifatli oʻtkazish maqsadida tashkil etilgan otryadlarning nazorati va amaliy yordamlari tufayli shu kungacha jami 4 ming gektarga yaqin maydonda chigit ekish ishlari sifatli oʻtkazildi.

Tosh yop ovulidagi "Bekman Allaberganov” fermer xoʻjaligida ham kecha-kunduz uzluksiz ish tashkil qilingan. Xoʻjalikda barcha amalga oshiriladigan agrotexnik tadbirlarning talab darajasida boʻlishiga katta eʼtibor qaratiladi. Shuningdek, xoʻjalik aʼzolari tomonidan paxta ekiladigan konturlar atroflariga ishlov berish, dala atrofini begona oʻtlardan tozalash, simyogʻochlar atroflariga qoʻl kuchi bilan ishlov berish, ichki ariqlarni tozalash, texnikalarning kirish-chiqish yoʻlaklarini belgilab, tartibga keltirish kabi ishlar ham sifatli amalga oshirilmoqda.