KOMPYuTER TEXNOLOGIYaLARINING TAʼLIM JARAYoNIDAGI OʻRNI
Yigirmanchi asr oʻrtalariga kelib tezkor mashina mexanizmlaridan foydalana boshlandi. Murakkab texnika va texnologiyalar oʻylab topildi. Koʻpgina masalalarni hal qilish jarayonida axborot hajmi behisob bir majmuaga aylandi hamda bu axborotlarni yigʻish va uzatish vositalarini yaratish, ularni vaqtida qayta ishlab, boshqarish uchun zarur boʻlgan choralarni belgilab chiqish zarurati tugʻildi.
Hozirgi kunda kompyuter texnologiyalari kirib bormagan soha deyarli uchramaydi. Kompyuter texnologiyalaridan faqat hisoblash ishlarini olib borish uchun emas, balki hayotga tatbiq qilinadigan elektron darsliklar, rasm va video tasmalarni qayta ishlovchi, katta hajmli maʼlumotlarni oʻzida saqlovchi dasturlar yaratish uchun ham foydalaniladi. Soʻnggi yillarda kompyuter va uning dasturiy taʼminotiga boʻlgan talab va qiziqishlar ortib bormoqda. Bu esa oʻz navbatida dasturchidan katta izlanish va mahoratni talab qiladi.
Taʼlim sifatini oshirish bugungi kunning asosiy vazifalaridan biridir. Chunki bugungi kunda insoniyat rivojlanishi shunday bosqichga etib bordi-ki, bu bosqichda inson aql-zakovati, bilimi va uning mutaxassis sifatidagi malakasi hal qiluvchi rol oʻynaydigan boʻlib qoldi.
Taʼlim sifatini oshirish oʻquv dargohlarini zamonaviy oʻquv rejalari, dasturlar, oʻquv jihozlari bilan taʼminlash, yangi darsliklar va qoʻllanmalar yaratish, ilgʻor pedagogik texnologiyalarni joriy etishni taqozo etadi.
Albatta, jihozlar, darsliklar, texnologiyalar ham ushbu vazifaning toʻliq bajarilishini taʼminlay olmaydi. Chunki taʼlim sifati koʻp jihatdan taʼlim beruvchining shaxsiga va malakasiga bogʻliqdir.
Taʼlim jarayonini tashkil etish, uni etarli materiallar bilan taʼminlash, oʻquv jihozlaridan maqsadli foydalanish, oʻquvchi fikrini darsga doimiy jalb etish oʻqituvchidan katta mahorat, bilim va koʻnikma talab etadi.
Hozirgi zamon mutaxassislari faoliyat doiralari qanday boʻlishidan qatʼiy nazar, informatika boʻyicha keng koʻlamdagi bilimlarga, zamonaviy hisoblash texnikasi, informatsion aloqa va kommunikatsiya tizimlari, orgtexnika vositalari va ulardan foydalanish borasida etarli malakalarga ega boʻlishi hamda yangi informatsion texnika va texnologiyalarning rivoji toʻgʻrisidagi bilimlarni oʻzida mujassamlashtirgan boʻlishi kerak. Zamonaviy hisoblash texnikasi va informatsion texnologiyalarning kun sayin rivojlanib, jamiyatning esa tobora axborotlashib borishi sababli, uzluksiz taʼlim tizimining oʻrta va yuqori bosqichlariga informatika, ishlab chiqarish va boshqarish jarayonlarini kompyuterlashtirish boʻyicha bir qator oʻquv fanlari kiritilgan.
Bir soʻz bilan aytganda, bugungi tezkor davrda barcha sohalarda boshqarish jarayonini takomillashtirish, axborot tizimini joriy etish, mutaxassislarni kompyuterda ishlashga oʻrgatish muhim ahamiyatga ega.
Nilufar SOATBOYeVA,
Amudaryo akademik litseyi informatika fani oʻqituvchisi.
(Foto - http://www.uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
