Xayr maktab – salom kollej

Amudaryo tuman Xalq taʼlimi muassasalari faoliyatini metodik taʼminlash va tashkil etish boʻlimiga qarashli 87 umumtaʼlim maktablarida 25-may kuni ertalab soat 8:00 da Oʻzbekiston va Qoraqalpogʻiston Respublikasi madhiyasi yangrashi bilan "Soʻnggi qoʻngʻiroq” tadbiri boshlandi.

Tadbir bayramona bezatilgan umumtaʼlim maktab hovlisida havaskorlar toʻgaragi chiqishlari, ota-onalar va faxriy oʻqituvchilar tabriklari bilan boshlandi. Tadbirda jonajon Vatanimizni, tinchlik-osoyishtalikni, yoshlik va muhabbatni, ustozlarga ehtiromni tarannum etuvchi sheʼrlar oʻqildi, kuy-qoʻshiqlar ijro etildi. Fan olimpiadalari, intellektual bellashuvlar, ijodiy tanlovlarda, obodonlashtirish va jamoat ishlarida faol qatnashgan yoshlarga faxriy yorliqlar topshirildi. Soʻnggi qoʻngʻiroq chalinganida har bir oʻquvchi yana bir yoshga ulgʻayganini anglab, qalbi quvonchga toʻldi.  Qoʻngʻiroq 9-sinf bitiruvchilari uchun maktabda soʻnggi bora darsga chorlab chalindi. Biroq 9-sinf oʻquvchilari uchun 2 sentyabr kuni qoʻngʻiroq kasb hunar kollejlari va akademik litseylarda yana qayta chalinadi. Ular taʼliming keyngi bosqichi hisoblangan kasb hunar taʼlimi olish uchun yana 3-yil davomida oʻqishni davom ettiradilar.

Tadbir soʻnggida barcha umumtaʼlim maktablari «Xayr maktab – salom kollej» tadbiri doirasida hududdagi kasb hunar kollejlari va akademik litseyga borishdi. Ular oʻrta maxsus taʼlim muassasalaridagi sharoitlar, oʻquv laboratoriya xonalari bilan tanishdilar.

Tumanimizdagi mavjud 74 ta 9 yillik maktablarni bu yil 3178 nafar oʻquvchilar muvaffaqiyatli bitkazib, taʼlimning keyingi bosqichida tumanimizdagi 7 ta kasb hunar kollejlarida va Mangʻit shahridagi 3-sonli Amudaryo akademik litseyida oʻqishni davom ettirishi uchun barcha shart sharoitlar yaratilgan.

Bundan tashqari yangi 2013-2014 oʻquv yilida tumanimiz 9-sinf bitiruvchilari Xitoy ovulida yangidan qurilayotgan Amudaryo transport kollejida oʻqishni davom ettirishlari mumkin.

   Ramatulla Matqurbonov,

   tuman Xalq taʼlimi muassasalari faoliyatini metodik taʼminlash va tashkil etish boʻlimi,"Oʻquvchilarni kasb hunarga yoʻnaltirish va psixologik pedagogik diagnostikasini metodiktaʼminlash kichik guruhi” rahbari.