XALQ SOGʻLOM BOʻLSA, VATAN OBOD VA OSOYIShTA BOʻLADI, –

deydi tuman DSENM bosh shifokori Durbek Bobojonov

Tumanimiz markazida xush-manzara va bahavo bir maskan bor. Atrofi mevazor bogʻlar, uzumzor-u gulzorlar bilan burkangan shinamgina bu maskanda tuman davlat sanitariya va epidemiologiya nazorat markazi (DSENM) joylashgan. 122 nafar salomatlik va ozodalik posbonlari faoliyat olib boruvchi muassasa xodimlarining  25 nafari oliy maʼlumotli shifokorlar boʻlib ulardan 11 nafari oliy, 2 nafari birinchi, 2 nafari ikkinchi toifaga ega malakali mutaxassislardir. 71 nafar oʻrta  maxsus tibbiyot xodimlarining yarmidan koʻpi maxsus  toifalarga ega boʻlib, ularning barchasi tumanimiz aholisi oʻrtasida sogʻlom turmush tarzini qaror toptirish, sanitariya madaniyatini  yuksaltirish, yuqumli kasalliklar paydo boʻlishining oldini olishdek umummilliy ahamiyatga molik vazifalarni ado etishda fidoyilik koʻrsatib kelmoqdalar.

Shuni alohida mamnuniyat bilan qayd etish joizki, bundan 25-yil avvalgi DSENM shifokori ishlagan muassasa bilan bugungi davr mutaxassisi faoliyat olib boruvchi muassasa oʻrtasida osmon bilan yercha farq bor. Birinchidan, mustaqillik yillarida muassasa xodimlarining ish sharoitlari tubdan oʻzgardi, kasbiy faoliyatlari bilan bogʻliq tibbiy uskunalar yangilandi. Xususan, sanitariya-gigiyena laboratoriyasi, oziq-ovqatlarni tekshirish laboratoriyasi, kommunal gigiyenasi laboratoriyasi, mehnat gigiyenasi laboratoriyasi, pestitsid laboratoriyasi, bakteriologiya laboratoriyalarining moddiy-texnika bazasi mustahkamlanib, zamonaviy asbob-anjomlar bilan jihozlandi. Bu esa aniqlangan yuqumli kasalliklarga qarshi kurashishnigina emas, balki uning oldini olish imkonini yaratdi.

Yil sayin sanitariya va tibbiy madaniyati yuksalib borayotgan xalqimiz sanitariya qonunbuzilishlari nafaqat oʻzi, balki oilasi, agar tadbirkor boʻlsa, tadbirkorlik faoliyati yoki oʻzi mehnat qilayotgan tashkilot faoliyatiga iqtisodiy zarar keltirishini juda yaxshi bilishadi.

Keyingi yillarda DSENM sanitariya-gigiyena laboratoriyasining doimiy harakatda boʻlgan 4 ta asosiy laboratoriyasi - oziq-ovqatlarni tekshirish, kommunal gigiyena, mehnat gigiyenasi, pestitsid boʻlimi laboratoriyalari xodimlarining saʼy-harakatlari bilan  koʻpdan-koʻp holatlarda sanitariya-gigiyena talablari buzilishining oldi olindi. Sanitariya talablariga javob bermaydigan holatlarda huquqiy-maʼmuriy organlar xodimlari ishtirokida aybdorlar jarima jazolariga tortildi.

Koʻcha va mahalla guzarlari, bozorlarimizning toza hamda obod boʻlishi – xalqimiz salomatligini mustahkamlashning muhim asosidir. Bu borada kommunal gigiyena va mehnat gigiyenasi boʻlimlari laboratoriyalari bilan pestitsid hamda bakteriologiya laboratoriyalarida olib borilayotgan ishlar muhim ahamiyat kasb etadi. Chunki tuproq ekologiyasi, atrof-muhit muhofazasi, korxona va tashkilotlar ishchi-xizmatchilari mehnat sharoitlarining talablar darajasida boʻlishi - nafaqat inson sogʻligi, balki tom maʼnoda ona Vatan osoyishtaligi va obodligi mezonidir.

- Barcha saʼy-harakatlarimiz xalqimiz sogʻligi, barkamol avlodni voyaga yetkazish, mamlakatimizni yanada obod va osoyishta, farovon goʻshaga aylantirishga xizmat qiladi, - deydi tuman DSENM bosh shifokori Durbek Bobojonov. – Buning uchun markazimizda barcha shart-sharoitlar yaratilgan.

Darvoqe, tuman DSENM mustaqillik yillarida tamoman  yangilangan ish sharoitiga ega muassasaga aylandi. To 2007-yilgacha muassasada atigi 2 tagina kompyuter boʻlgan boʻlsa, bugungi kunda barcha laboratoriya va ish xonalari kompyuterlashtirilib, kompyuter jihozlari bilan taʼminlangan. DSENM ixtiyoridagi 3 ta avtomashinaning mavjudligi markaz xodimlarining tezkor va epidemiologik xizmat hamda dizenfektsiya ishlarini joylarga chiqib, oʻz vaqtida oʻtkazish imkoniyatini bermoqda.

Atrofimizni qurshab turgan tabiiy olam goʻzalligi, biz nafas olayotgan havoning musaffoligi, oyogʻimiz ostidagi ona zaminning obodligi, mahalla va koʻchalarimizning tozaligi hamda tanovul qilayotgan neʼmatlarimizning har qanday zararli moddalardan xoli, xushtaʼmligi – bizga qanchalar huzur bagʻishlasa, hayot koʻzimizga shunchalar goʻzal koʻrinadi. Ana shu toʻkislikni yaratishda ozodalik va salomatlik posbonlari – tuman DSENM shifokorlarining  hissasi katta. El-yurtni yanada farovon etish, fayziyob goʻshaga aylantirish, xalqimizning tibbiy madaniyati bundan-da yuksak boʻlishi uchun fidoyilik koʻrsatish – DSENM har bir xodimining burchidir. Zero, burch masʼuliyati – har bir insonni ezguliklar sari yoʻllab turadi.

Robiya YOʻLDOShEVA.