SIFATLI TAʼLIM-TARBIYa – BOSh VAZIFAMIZ

Bu yilgi xalq taʼlimi xodimlarining  "Goʻzal va betakrorimsan, muqaddas Vatanim, jonim senga fido, Oʻzbekistonim!” shiori ostida oʻtkazilayotgan anʼanaviy  Avgust  Kengashlari Respublikamiz mustaqilligining chorak asrlik toʻyi arafasiga toʻgʻri kelmoqda.

Ayni kunlarda barcha viloyatlarda, tumanlarda, yurtimizning har bir mahallasi-yu har bir goʻshasida boʻlgani kabi tumanimizning ham har bir qishlogʻi va mehnat jamoalarida eng ulugʻ, eng aziz bayramimiz – istiqlolimizning 25 yillik toʻyini munosib nishonlashga bagʻishlangan tadbirlar avjiga chiqmoqda.

Fursatdan foydalanib, men aziz hamkasblarimni, butun tumanimiz xalqini shaxsan oʻz nomimdan hamda tumanimiz maorifchilari nomidan ushbu qutlugʻ bayram bilan qizgʻin muborakbod qilaman!

2011-yilda mamlakatimiz mustaqilligining 20 yillik bayrami arafasida ham taʼlim sohasida oʻtgan 20-yil davomida amalga oshirilgan ishlarni sarhisob qilib, mamlakatimizda olib borilayotgan islohotlar, ularning natijalari, yaratilayotgan qulayliklar va eng asosiysi, xalqimiz turmush tarzining naqadar tezlik bilan yaxshilanib borayotganligi toʻgʻrisida gʻurur bilan fikr yuritgan edik. 20-yil ichida erishgan yutuqlarimizga oʻtgan 5-yil muddat ichidagi muvaffaqiyatlarimizni ham qoʻshib sarhisob qilsak, yurtimizda olib borilayotgan odilona siyosatning samarasi naqadar salmoqli ekanligini anglash qiyin emas.

Oradan oʻtgan 25-yil nisbatan qisqa davr boʻlsa ham ushbu muddat ichida misli koʻrilmagan yangi-yangi marralar zabt qilinmoqda. Buni oddiygina raqamlarda ham koʻrishimiz mumkin:

1991-yilda tumanimizda zamonaviy binolarda joylashgan maktablar soni 24 tani tashkil qilardi. Bugungi kunga kelib ular soni 62 taga yetdi.

Maktablarda mavjud zamonaviy kompyuter sinflari soni atigi 4 tani tashkil qilgan boʻlsa, bugungi kunda ular soni 56 tani tashkil qiladi, bundan tashqari yana 36 ta maktabda personal kompyuterlar mavjudligini hisobga olsak, bu borada sharoitlar naqadar yaxshilanib borayotganligining guvohi boʻlamiz.

Jami maktablarimizning 24 tasidagina sport zallari mavjud edi. Oʻtgan davr mobaynida ushbu koʻrsatkichimiz joriy yilda foydalanishga topshirilgan 32-sonli hamda 34-sonli maktablar sport zallari bilan qoʻshib hisoblaganda 51 tani tashkil qiladi.

Tumanda telefonlashtirilgan maktablar soni 2008-yil holatiga 16 tani tashkil qilgan boʻlsa, bugunga kunga kelib, umumtaʼlim maktablarining barchasi toʻligʻi bilan telefonlashtirildi.

Taʼlim muassasalarimiz avvallari faqat orzu qilganimizday zamonaviy laboratoriya va fan xonalari, zarur jihozlar va asbob-uskunalar bilan jihozlandi.

Tumanimizdagi taʼlim muassasalarida oʻtgan oʻquv yiliga solishtirganda ham maqtansa arzigulik ishlarimiz bor.

Taʼlim-tarbiya samaradorligining asosiy koʻrsatkichlarini oʻquvchilar oʻrtasida oʻtkaziladigan Bilimlar bellashuvi, fanlar Olimpiadasi va shu kabi muhim ahamiyatga ega boʻlgan koʻrsatkichlarni oʻz ichiga qamrab olgan kompleks parametrlar asosida taʼlim sifatini baholash natijalari hamda reyting koʻrsatkichlari tashkil qiladi.

Ushbu yoʻnalishga nazar tashlasak, tubandagi natijalar koʻzga tashlanadi:

Bilimlar bellashuvining 3-bosqich – Qoraqalpogʻiston Respublikasi bosqichi natijalariga koʻra 3 ta birinchi, 5 ta ikkinchi va 17 ta uchinchi – jami 25 ta sovrinli oʻrinlar bilan tumanimiz Nukus shahri, Toʻrtkoʻl va Qoʻngʻirot tumanlaridan keyin 4-oʻrinni egallab turibdi.

Kompleks parametrlar boʻyicha tumanimiz Oʻzbekiston Respublikasidagi 194 ta tuman va shaharlar orasida 67-oʻrinni egalladi. Eʼtiborli tomoni shundaki, tumanimiz 2014-2015 oʻquv yilida 98-oʻrinda boʻlgan boʻlsa, 2015-2016 oʻquv yili yakunlariga koʻra 31 ta oʻringa yuqorilab, 67-oʻrinni egalladi.

Ushbu koʻrsatkich boʻyicha tumanimiz Qoraqalpogʻiston Respublikasida 2014-2015 oʻquv yilida 8-oʻrinda boʻlgan boʻlsa, 2015-2016 oʻquv yili yakunlariga koʻra 3 ta oʻringa yuqorilab, 5-oʻrinni egalladi.

Tumandagi 16-, 15- va 40-sonli umumtaʼlim maktablari Qoraqalpogʻiston Respublikasidagi eng ilgʻor 20 ta maktab qatoridan oʻrin egalladi.

Har yili anʼanaviy Avgust Kengashlari oʻquv yili yakunlarini tahlil etish, erishilgan yutuqlarni mustahkamlash, yoʻl qoʻyilgan kamchilik va nuqsonlarning sabablarini aniqlash, yangi oʻquv yilida ularning takrorlanishiga yoʻl qoʻymaslik chora-tadbirlarini ishlab chiqish hamda taʼlim sifatini oshirishga qaratilgan vazifalarni belgilab olish, oʻqitishning zamonaviy texnologiyalarini amaliyotga joriy etgan holda oʻquvchilarda barcha fanlarga qiziqish uygʻotish maqsadida tashkil etiladi.

Joriy oʻquv yilida oldimizda turgan vazifalarni muhokama qilish  bu yilgi Avgust Kengashi kun tartibida turgan eng dolzarb masalalardir. Yuqorida keltirilgan asosiy yoʻnalishlar boʻyicha tegishli umumlashmalar chiqarib, taʼlim sifatini yaxshilash, oldimizga qoʻyilgan maqsad va orzularimizga erishish boʻyicha aniq xulosalarga ega boʻlsak, kelgusi faoliyatimizning bundan ham samarali boʻlishiga erishamiz.

Aziz hamkasblar! Barchamiz ezgu orzu-umidlar bilan qarshi olayotganimiz – mustaqilligimizning 25 yilligi va yangi oʻquv yili bilan barchangizni yana bir bor qutlayman! Mashaqqatli va masʼuliyatli faoliyatingizda tolmas kuch-quvvat tilayman!

Ashirboy QOʻShAYeV,

tuman xalq taʼlimi muassasalari faoliyatini metodik taʼminlash va tashkil etish boʻlimi mudiri.