ORZULAR SARI

Ijod – mashaqqatli mehnat, tinimsiz izlanishni talab etadigan murakkab jarayondir. Uning mahsuli nechogʻlik xalqqa manzur boʻlmogʻi ijodkorning aytmoqchi boʻlgan fikrini qay darajada ifoda eta olishiga, boy va jozibali ona tilimiz imkoniyatlaridan foydalana olishiga bogʻliq.

Ayni kunda Amudaryo akademik litseyining 2-bosqichida taʼlim olayotgan Dinora Karimboyeva ham ana shu masʼuliyatni his qilgan holda adabiy jarayonga dadil kirib kelayotgan yoshlardan.

U sheʼr yozishga juda erta qiziqdi. "Orzularim bir olam”, "Istiqlolim – istiqbolim” sheʼrlar toʻplamlari koʻpchilikning sevimli kitobiga aylandi. Tumandagi yosh ijodkorlarning sara ijod namunalaridan tuzilgan "Jayxun jilgʻalari” nomli toʻplamdan uning ham sheʼrlari joy olgan.

Dinoraning qiziqishlari koʻlami keng. Shu boisdan ham oʻquvchilik davridayoq, "Yashil chiroq” teleoʻyinining, oʻtgan yili esa "Mahallaning eng orasta qizi” koʻrik-tanlovining mamlakat bosqichi gʻolibi boʻldi.

Vafo va sadoqat timsoli boʻlmish shoira Zulfiyaning ijodini Dinora oʻzgacha mehr, tashnalik bilan oʻqiydi, ayriliq dardida, Hamid Olimjondek hassos shoirning sevgisiga sadoqat bilan yashashni ham baxt deb bilgan, yillar armoni qalbini oʻrtasa-da, qaddini bukolmagan fidoyi ayolning dil qatidan toʻkilgan satrlarga hamdard boʻlib oʻqiydi.

Shoiraga izdosh boʻlishni havas qilmagan, undagi matonat va jasoratni oʻzida mujassam etishga harakat qilmagan qizlar juda kam topilsa kerak. Dinora ham bundan mustasno emas. U joriy yilda Zulfiya nomidagi Davlat mukofoti uchun nomzodlarni saralash bosqichlaridan muvaffaqiyatli oʻtdi va mamlakat bosqichida qatnashgan tumanimiz ilk vakilalaridan biri boʻldi.

– Bu yutugʻim menga yana ham oʻzgacha masʼuliyat bagʻishlaydi, – deydi Dinora – Men oʻqishda ham, ijodda ham Zulfiya ijodidan oʻzimga kuch olaman.

Ilm va ijod sari dadil intilayotgan tengdoshim Dinora Karimboyevaga kelgusida ham muvaffaqiyatlar yor boʻlaversin, deb qolaman.

Sevara ISMOILOVA, Amudaryo akademik litseyi oʻquvchisi.