Xalq deputatlari Amudaryo tuman Kengashining oʻttiz toʻrtinchi sessiyasi toʻgʻrisida AXBOROT

2017-yil 25-iyul kuni Xalq deputatlari Amudaryo tuman Kengashining oʻttiz toʻrtinchi sessiyasi boʻlib oʻtdi. Sessiyani tuman Kengashi raisi, tuman hokimi S.Yoʻldoshev ochdi va olib bordi.

Sessiya kun tartibiga "Oʻzbekiston Respublikasi Prezidenti Sh.M.Mirziyoyevning 2017-yil 12-iyulda boʻlib oʻtgan videoselektor yigʻilishidagi "Parlamentimiz haqiqiy demokratiya maktabiga aylanishi, islohotlarning tashabbuskori va asosiy ijrochisi boʻlishi kerak” deb nomlangan maʼruzasidan kelib chiqadigan ustuvor vazifalarni amalga oshirish toʻgʻrisida”gi, shuningdek, tuman ichki ishlar boʻlimi va tibbiyot birlashmasi boshliqlari, tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosarining hisobotlari haqidagi masalalar havola qilindi.

Sessiya avvalida 2017 yil 12-iyulda boʻlib oʻtgan videoselektor yigʻilishidan tayyorlangan lavha namoyish qilindi. Soʻngra tuman Kengashidagi har bir siyosiy partiyaning deputatlik guruhlari aʼzolari soʻzga chiqib, Prezidentimiz maʼruzasidan kelib chiqadigan vazifalarni samarali amalga oshirish boʻyicha xalq deputatlari Amudaryo tuman Kengashining chora-tadbirlar rejasini amalga oshirishda faollik koʻrsatishini aytib oʻtdilar.

Kun tartibidagi ikkinchi masala, yaʼni huquqbuzarliklar profilaktikasi va jinoyatchilikka qarshi kurashish sohasida tuman ichki ishlar boʻlimi tomonidan olib borilayotgan ishlar boʻyicha tuman ichki ishlar boʻlimi boshligʻi Q.Ismailov hisobot berdi.

Hisobotda taʼkidlanganidek, 2017-yilning birinchi yarmida tuman boʻyicha umumiy jinoyatchilik 92 tadan 90 taga kamaydi. 17 ta ovul va mahallalarda birorta ham jinoyat sodir etilmadi. Ammo, tumanda ayrim jinoyatlarning, jumladan, qasddan badanga ogʻir tan jarohati yetkazish, talonchilik, bezorilik, ogʻir oqibatli yoʻl-transport xodicasi, firibgarlik, qurol, oʻq-dori, portlovchi moddalar yoki portlash qurilmalariga qonunga xilof ravishda egalik qilish kabi jinoyatlar oʻsishiga yoʻl qoʻyilgan. Hisobotda bu kabi kamchiliklarning oldini olish boʻyicha amalga oshiriladigan ishlar haqida batafsil maʼlumot berildi.

Kun tartibidagi navbatdagi masala – aholiga tibbiy xizmat koʻrsatish borasida tumanda olib borilayotgan ishlar toʻgʻrisida tuman tibbiyot birlashmasi boshligʻining oʻrinbosari X.Tajimov hisobot berdi.

Hisobotda qayd qilinganidek, Prezidentimiz tomonidan belgilab berilgan tibbiyot sohasini isloh qilishning ustuvor vazifalarini samarali amalga oshirish maqsadida tumanda mavjud 19 ta qishloq vrachlik  punktlari keng jamoatchilik fakrini  inobatga olgan holda maqbullashtirilishi natijasida 7  ta qishloq oilaviy poliklinikasi tashkil etildi hamda 2 ta qishloq vrachlik punkti saqlanib qolindi.  Faoliyati tugatilgan 10 ta qishloq vrachlik punktlarining binolari xizmat uy-joyi sifatida vaqtinchallik shifokorlarga foydalanish uchun topshirildi. 7 ta qishloq oilaviy poliklinikalarida va 2 ta QVPda ijtimoiy dorixonalar tashkil qilindi. Ushbu dorixonalarda 116 nomdagi mahalliy va 227 turdagi chet elda ishlab chiqarilgan dori vositalarining cheklangan narxlarda sotilishi yoʻlga qoʻyilgan. 2017-2019-yillarda tumandagi qishloq oilaviy poliklinikalari binolarida jami 3 mlrd. 685 mln. soʻmlik taʼmirlash ishlarini amalga oshirish boʻyicha takliflar berildi.

Maʼruzada sohada amalga oshirilgan ijobiy ishlar bilan birga, yechimini kutayotgan masalalar ham borligi qayd etildi va ularni samarali hal qilish yoʻllari xususida soʻz yuritildi.

Kun tartibidagi toʻrtinchi masala – yoshlar bilan ishlash sohasida tumanda olib borilayotgan ishlar toʻgʻrisida tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari A.Yuldashev hisobot berdi.

Hisobotda bugungi kunda tumanimiz aholisining 55 613 nafari 30 yoshgacha boʻlgan yoshlar boʻlib, hozirda ularning 28 600 nafari yoshlar ittifoqiga aʼzo ekani qayd etib oʻtildi. Yangi tashkil qilingan Oʻzbekiston Yoshlar ittifoqiga barcha yoshlarni, ayniqsa uyushmagan yoshlarni aʼzo qilish, ularni davlat va jamiyat ishlarida faol ishtirok etishga jalb etish boʻyicha amalga oshirilayotgan ishlar xususida ham axborot berildi.

Sessiyada Qoraqalpogʻiston Respublikasi Ichki ishlar vazirining oʻrinbosari B.Kenjayev, Qoraqalpogʻiston Respublikasi Sogʻliqni saqlash vazirligi bosh mutaxassisi D.Bekbayevalar ishtirok etdi va nutq soʻzladi.

Kun tartibidagi barcha masalalar boʻyicha faol munozaralar, savol-javoblar boʻlib oʻtdi. Deputatlar tomonidan bildirilgan taklif, fikr va mulohazalarni inobatga olgan holda tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligining axborot xizmati.