Fan va taʼlim 29.11.2017 👁 5,222

Amudaryo qishloq xoʻjalik kasb-hunar kolleji oʻquvchilari katta yutuqlarga erishmoqda

Tumandagi Amudaryo qishloq xoʻjalik kasb-hunar kollejida turli yoʻnalishlar boʻyicha yoshlarga kasb va hunar oʻrgatilmoqda. Kollejda oʻquvchilarning qiziqqan hunarlari boʻyicha oʻqib-oʻrganishlari uchun zarur shart-sharoitlar yaratilgan. Oʻz navbatida oʻquvchilar ham yutuqlari bilan kollej nomini mamlakat miqyosida tanitmoqda.

Kollejning oshpazlik yoʻnalishi boʻyicha tahsil olayotgan oʻquvchilari yaqinda Moʻynoq tumanida oʻtkazilgan "Orol baliqlaridan 99 turli taomlar” gastronomik festivalida ishtirok etishga muvaffaq boʻldilar. Moʻynoq tumanining "Madeli” ovulidagi "Koʻksuv” koʻli boʻyida oʻtkazilgan gastronomik festivalda kollejning oshpazlik yoʻnalishida hunar oʻrganayotgan J.Fayzullayeva, R.Rustamov, X.Davlatboyeva, Sh.Qurbonboyeva hamda Oʻ.Qurbonovalar oʻzlarining baliqlardan tayyorlagan har xil taomlarini namoyish qildilar. Kollejning ishlab chiqarish taʼlimi ustasi R.Boltaboyevadan oshpazlik mahoratini oʻrgangan oʻquvchilar oʻzlari tayyorlagan taomlari bilan festivalda ishtirok etgan barcha kollejlar oʻrtasida 1-oʻringa, Oʻzbekiston Respublikasi miqyosida esa 3-oʻringa loyiq deb topildi. Gʻolib boʻlgan kollej oʻquvchilariga Oʻzbekiston Respublikasi Oshpazlar oʻquv departamenti boshligʻi, texnika fanlari nomzodi H.Nazarov qimmatbaho sovgʻa taqdim etdi.

– Bu bizni juda ruhlantirdi, – deydi quvonch bilan kollejning kasbiy taʼlim ishlari boʻyicha direktor oʻrinbosari Sh.Matirzayev. – Shu ruh bilan navbatdagi tanlovga ham qattiq tayyorgarlik koʻrdik. Mazkur tanlov kasb mahorati boʻyicha kollejlar oʻrtasida "Tikuv va tikuv-trikotaj buyumlarini ishlab chiqarish texnik-texnologi” va "Keng assortimentdagi kiyimlar modeler-konstruktori” yoʻnalishlari oʻquvchilari ishtirokida oʻtkazilishi eʼlon qilingan edi. Dizayner va tikuvchi qizlarimiz oʻzlariga ishonch bilan tumandagi kollejlar oʻrtasidagi tanlovda ishtirok etishdi hamda 1-oʻrinni qoʻlga kiritishdi.

"Milliy, etnografik va badiiy liboslar dizayneri” kasb mahorati koʻrik-tanlovining Qoraqalpogʻiston Respublikasi miqyosidagi bosqichi Nukus shahridagi Nukus politexnika kollejida boʻlib oʻtdi. Amudaryo qishloq xoʻjaligi kasb-hunar kolleji oʻquvchilari L.Xalillayeva, E.Tleuboyeva hamda S.Qodirovalar bu koʻrik-tanlovda milliy dizayn asosida folklor, eklektika va kantri uslublarida yaratgan 10 turdagi liboslari bilan ishtirok etdilar hamda Respublikadagi barcha kollejlar oʻquvchilari oʻrtasida 1-oʻrinni egalladilar.

– Oʻquvchilarimiz koʻrik-tanlovning Toshkent shahrida oʻtkaziladigan Oʻzbekiston Respublikasi miqyosidagi bosqichida ishtirok etishga muvaffaq boʻldilar. Turli viloyatlardagi kollejlarning tikuvchi va dizayner yoʻnalishi oʻquvchilari ishtirok etgan tanlovda bizning oʻquvchilarimiz ham oʻz mahoratlarini namoyish etdilar. Koʻrik-tanlovda oʻquvchimiz L.Xalillayeva «Eng yaxshi badiiy libos» nominatsiyasi gʻolibi deb topildi va sertifikat bilan taqdirlandi, – deydi faxr bilan kollejning ishlab chiqarish taʼlimi ustasi S.Mingboyeva.