Asriy orzular roʻyobi

Tarixdan maʼlumki, qaysi mamlakat biron-bir bosqinchilar tomonidan bosib olinsa, albatta, oʻsha mamlakatda ozodlik va istiqlol uchun kurash harakati boshlanadi. Chunki ozod tugʻilgan inson birovlarga qaram boʻlishni, boshqalarning zulmi ostida yashashni istamaydi. Bizning ajdodlarimiz, ota bobolarimiz qadim tariximiz davomida necha bor yovuz bosqinchilar hujumiga duch kelib, Vatanimiz ozodligi uchun kurash olib borganlar.

Oʻtgan asrning 80-yillari ikkinchi yarmidan boshlab Prezidentimiz Islom Karimov boshchiligida yurtimizda adolat, mustaqillik, tinch-osuda hayot uchun olib borilgan mardona harakatlar milliy ozodlik yoʻlidagi kurashlarning yorqin sahifasini tashkil etadi. Millat va xalq manfaatlarini oʻz diliga jo etgan respublikaning I.A.Karimov boshchiligidagi yangi rahbariyati mavjud ijtimoiy-siyosiy muammolarning mohiyatini anglab, ularning oqilona yechimini topish yoʻlida barcha kuch va imkoniyatlarini safarbar etdi. Avvalo aholining oʻtkir ijtimoiy masalalari hal etildi.

1989-yil 21-oktyabrda "Oʻzbek tiliga davlat tili maqomi berish toʻgʻrisida”gi Qonun qabul qilindi. Bu  Qonun qabul qilinishi mustaqillik yoʻlidagi salmoqli qadam boʻldi.

Oʻzbekistonda davlat mustaqilligini qoʻlga kiritish uchun haqiqiy kurash 1989-yildan boshlandi. Chunki bu davrda, sobiq tuzumning hamma xududlaridagi kabi Oʻzbekistonda ham ijtimoiy hayotning barcha sohalarida oʻta ogʻir vaziyat xukmron boʻlib, uni bartaraf etishga mustabid tuzum ojiz edi. Shu davrdan boshlab Oʻzbekistonda maʼnaviy hayotni rivojlantirish, madaniy merosdan foydalanish borasida ham dastlabki amaliy qadamlar qoʻyildi. Yurtimizning fidoyi farzandlari – Choʻlpon, Fitrat, Usmon Nosir, Abdulla Avloniy kabi adiblarning ijodiy merosini odilona oʻrganish olimlar oldiga muhim vazifa etib qoʻyildi.

1990-yilning 24-martida oʻzbek xalqi hayotida yana bir muhim voqea, mustaqillik yoʻlidagi tarixiy hodisa roʻy berdi. I.A.Karimov Oʻzbekiston Prezidenti etib saylandi. Respublikada sobiq markaz tazyiqiga qaramay, ittifoqdosh respublikalar orasida birinchi boʻlib prezidentlik boshqaruvi joriy etildi. Oʻzbekiston mustaqilligi yoʻlidagi yana bir muhim qadam 1990-yil 20-iyunda Oʻzbekiston SSR Oliy Kengashining XII chaqiriq ikkinchi sessiyasida Oʻzbekiston Respublikasi Mustaqillik  Deklaratsiyasi qabul qilinishi boʻldi.  Mustaqillik  Deklaratsiyasida yurtimizdagi har bir millat oʻz taqdirini oʻzi belgilashi kafolatlanishi taʼkidlandi.

1991-yil 31-avgustda I.A.Karimov tashabbusi bilan Respublika Oliy Kengashining XII chaqiriq navbatdan tashqari oltinchi sessiyasi chaqirilib, unda Prezidentimiz tomonidan Oʻzbekistonning Davlat mustaqilligi eʼlon qilindi. Sessiyada "Oʻzbekiston Respublikasi davlat mustaqilligi toʻgʻrisida”gi Oliy Kengash Bayonoti qabul qilindi. Mazkur sessiyada "Oʻzbekiston Respublikasi davlat mustaqilligini eʼlon qilish toʻgʻrisida”gi qaror qabul qilinib, 1-sentyabr Oʻzbekiston Respublikasining Mustaqillik kuni deb belgilandi va 1991-yildan boshlab bu kun umumxalq bayrami va dam olish kuni sifatida mamlakatimizda keng nishonlanib kelinmoqda. Shuningdek, Oliy Kengashning oʻsha sessiyasida "Oʻzbekiston Respublikasining Davlat mustaqilligi asoslari toʻgʻrisida”gi Qonun qabul qilindi. Oʻzbekiston Respublikasi Mustaqilligi haqidagi bu xujjatlar oʻzbek xalqining asriy orzusi roʻyobga chiqqanligining  huquqiy ifodasi edi.

Tarixiy orzu ushaldi. Xalqimiz siyosiy mutelik va mustabidlik asoratidan qutuldi. Dunyo xaritasida yana bir mustaqil, ozod, suveren davlat - Oʻzbekiston Respublikasi paydo boʻldi. Oʻzbekiston Davlat mustaqilligi xalqimizning uzoq yillar davomida olib borgan ogʻir, mashaqqatli kurashining qonuniy natijasi boʻldi. Oʻzbekiston xalqi oʻz mustaqilligini quvonch bilan kutib oldi. Xalqimizni yanada jipslashtirgan ana shu shodlik, oʻz elida oʻziga beklik tuygʻusi mamlakatimizni juda qisqa, 22-yil ichida taraqqiyotning zafarli yoʻllariga olib chiqdi.

Otabek XIDIRBOYeV,

NDPI qoshidagi 3-sonli Amudaryo akademik litseyi oʻqituvchisi.