Tuman Kengashi deputatlarini moddiy va maʼnaviy ragʻbatlantirish tizimi joriy etilmoqda

2018-yil 24-mart kungi xalq deputatlari Amudaryo tumani Kengashining 44-sessiyasi qarori bilan tuman Kengashi deputatlarini moddiy va maʼnaviy ragʻbatlantirish tizimini joriy etildi.

Endilikda tuman kengashi deputatlariga “Adolatli deputat”, “Xalqparvar deputat”, “Mehnatkash deputat” va “Faxriy deputat” nomlari  beriladi.

Bu ishlar xalq deputatlari Amudaryo tuman Kengashi deputatlarini moddiy va maʼnaviy ragʻbatlantirish toʻgʻrisidagi Nizom va shu maqsadda tuzilgan Komissiya xulosasiga asosan amalga oshiriladi.

“Adolatli deputat”, “Xalqparvar deputat” va “Mehnatkash deputat” nomlariga ega boʻlgan deputatlarga tuman Kengashi qarori bilan tasdiqlanadigan shakldagi sertifikat va esdalik sovgʻalar beriladi hamda bunday nomga munosib deb topilganlarni keyingi saylovlarda deputatlikka nomzod sifatida koʻrsatish siyosiy partiyalarga tavsiya etiladi.

“Faxriy deputat” nomi har yili deputatlik muddati tugagan bir sobiq deputatga beriladi.

Maʼlumot uchun:

“Adolatli deputat” nomi uchun asosiy talablar quyidagilardan iborat:

- tuman Kengashi sessiyalarida muhokamalarda doimiy va ahamiyatga molik masalalarni olib chiqishda faol qatnashish;

- tuman Kengashi va uning doimiy komissiyalari tomonidan muhokama qilinayotgan masalalar boʻyicha oʻzining asosli hamda taʼsirchan takliflarini ilgari surayotgan (maʼruza va muhokamalarda ishtirok qilish);

- qonunlarni aholi orasida targʻib kilish, ularning huquqiy madaniyatini oshirishda faollik koʻrsatish;

- turli xil munozarali huquqiy masalalarpi hal etishda qatiyatlilik koʻrsatish;

- qonunlar ijrosini va huquqni qoʻllash amaliyotini oʻrganishda oʻzining munosib hissasini qoʻshish.

Bunda, deputatlarning tashabbusi bilan tuman Kengashi sessiyalari muhokamasiga kiritilgan masalalar va Kengash sessiyalarida hisobotlari tinglangan mansabdor shaxslar soni, aholining huquqiy savodxonligini oshirish maqsadida oʻtkazilgan tashviqot ishlarining soni, ijrosi oʻrganilgan qonunlar, erishilgan amaliy natijalarining soni hisobga olinadi.

“Xalqparvar deputat” nomi uchun asosiy talablar quyidagilardan iborat:

- xalk manfaatlarini himoya kilishda faollik koʻrsatib, oʻz saylovchilari bilan doimiy muloqotda boʻlish;

 - murojaatlarni koʻrib chiqishda hududning rivojlanishiga toʻsqinlik qilayotgan muammolarni bartarf qilishda, fuqarolarning buzilgan huquq va qonuniy  manfaatlarini tiklashda  deputatlik nazoratidan keng foydalanish va amaliy natijalarga erishish.

Bunda, fuqarolarning koʻrib chiqilgan va yechilgan murojaatlari soni, deputatlar tomonidan yuborilgan deputatlik soʻrovlari soni, tuman Kengashi sessiyalari muhokamasiga kiritilgan masalalar boʻyicha hudud va saylovchilarning manfaatlaridan kelib chiqib bildirgan pozitsiya (bayonotlari) takliflari soni hisobga olinadi.

“Mehnatkash deputat” nomi  uchun asosiy talablar quyidagilardan iborat:

- oʻz vakolatlarini, belgilangan rejalarni toʻliq va sifatli amalga oshirish;

- oʻzining asosiy faoliyatidan tashqari turli komissiya, ishchi guruhlar va boshqa jamoatchilik ishlarida faol ishtirok etish;

- hududiy dasturlarning ishlab chiqilishida aniq takliflar bilan tashabbus koʻrsatish;

- qonun hujjatlarini, davlat va hududiy dasturlarni amalga oshirishda aniq natijalarga erishish;

- oʻz faoliyatini ommaviy axborot vositalari orqali doimiy ravishda yoritib borish.

Bunda, deputatlar tomonidan ommaviy axborot vositalarida eʼlon qilingan maqolalar soni, qonun hujjatlari va boshqada hujjatlarni ishlab chiqish va ularni takomillashtirish boʻyicha bildirilgan takliflar soni hisobga olinadi.

“Faxriy deputat”  nomi sidqidildan va natijali faoliyat yuritgan  hamda deputatlik muddati tugagan deputatlarga beriladi.

“Faxriy deputat” uchun asosiy talablar quyidagilardan iborat:

- tuman Kengashi faoliyatini rivojlantirishga ulkan hissa qoʻshish;

- ijtimoiy-siyosiy va ijtimoiy-iqtisodiy sohalardagi islohotlarni amalga oshirishda munosib hissa qoʻshish;

- jamiyatning ijtimoiy hayotidagi faolligi bilan aholi oʻrtasida munosib obroʻ-eʼtiborga erishish.

Gʻ.Yeshniyozov