Amudaryoda yil boshidan beri 49 ta kichik biznes subʼektlariga jami 3 mlrd. 937 mln. soʻm kredit mablagʻlari ajratildi

Hammamizga maʼlum, hozirgi davrda davlatning iqtisodiyotini rivojlantirish va barqarorligini taʼminlashda tadbirkorlik subʼektlari faoliyatining oʻrni alohida ahamiyatga ega.

Oʻzbekiston Respublikasi Prezidenti Sh.M.Mirziyoyevning 2017-yil 22-dekabr kungi Oliy Majlisga qilgan Murojaatida ham tadbirkorlik subʼektlariga nisbatan oʻtkazilayotgan noqonuniy tekshirishlar, xususiy biznes faoliyatiga asossiz aralashishga qarshi kurashni kuchaytirish kerakligi hamda shu maqsadda tadbirkorlik subʼektlari faoliyatini tekshirish tizimini tubdan qayta koʻrib chiqish lozimligini bildirdi.

Shuningdek, 2018-yilga “Faol tadbirkorlik, innovatsion gʻoyalar va texnologiyalarni qoʻllab-quvvatlash yili” deb nom berilganligi munosabati bilan barcha tadbirkorlik subʼektlarining moliyaviy-xoʻjalik faoliyatini tekshirishni 2-yilga toʻxtatilib, Bosh prokuror boshchiligida nazorat qiluvchi organlar rahbarlari har oyda namunali, faol tadbirkorlar bilan uchrashuvlar tashkil etib, ularni qiynayotgan muammolarni eshitish, qonuniy faoliyatiga toʻsqinlik qilayotgan kamchiliklarni aniqlash
va bartaraf etish choralarini koʻrib borishi talabi qoʻyildi.

Ushbu murojaatnomadan kelib chiqib, Amudaryo tumani prokuraturasi tashabbusi bilan tuman hududidagi tadbirkorlik subʼektlari bilan har oyda tumandagi mutasaddi idoralar rahbarlari ishtirokida uchrashuv va tadbirlar oʻtkazilib kelinmoqda.

Ushbu uchrashuvlarda tadbirkorlik faoliyati bilan shugʻullanish istagida boʻlgan fuqarolarga faoliyatni yoʻlga qoʻyish, ishlarni tashkil qilish hamda rasmiylashtirish yuzasidan tegishli idoralardan tushuntirish va takliflar bildirildi.

Shuningdek, faoliyati toʻxtatilgan va harakatsiz turgan korxonalar rahbarlari yakka tartibda suhbatlar oʻtkazilib kelinmoqda.

Tuman hududida qishloq xoʻjaligini rivojlantirish maqsadida “Jahon taraqqiyoti va tiklanish banki” krediti asosida 2018-2019-yillarga moʻljallangan 60 ta loyihalarni qoʻshimcha ravishda amalga oshirish rejalashtirilgan va ularga ajratiladigan imtiyozli kreditlar miqdori 13287 ming AQSh dollarini tashkil qiladi.

Bugungi kunda ushbu kreditlar asosida tumanda faoliyat yuritayotgan “Xoʻjakoʻl” hamda “Amudaryo sohili” fermer xoʻjaliklari tomonidan chorvachilikni rivojlantirish maqsadida 2 mlrd. 800 mln. soʻmlik kredit mablagʻlari hisobiga 132 ta naslli qora mollar Polsha Respublikasidan olib kelindi.

Shuningdek, “Oʻrta qalʼa chorvadori” agrofirmasi tomonidan “Asalarichilikni rivojlantirish” maqsadida 1 mlrd. 200 mln. soʻmlik shundan 1 mlrd. soʻmi bank krediti mablagʻlari hisobiga asalari oilalarini olib kelish va har bir hudud hamda fermer xoʻjaliklarida asalarchilikni rivojlantirish rejalashtirilgan.

Bundan tashqari, baliqchilik, zamonaviy muzlatkichli omborxonalarni tashkil qilish, meva-sabzavot mahsulotlarini yetishtirish va qayta ishlashni tashkil qilish yoʻnalishlarida loyihalar Davlat dasturiga kiritilgan.

Joriy yilda “Oʻzsanoatkurilishbank” Qoraqalpogʻiston filiali bilan 4 ta kam quvvatda ishlayotgan parrandachilik korxonalari boʻyicha manzilli dastur ishlab chiqilgan.

Tuman hududida boʻsh turgan, kam quvvatda ishlayotgan korxonalar faoliyatini qayta tiklash va kengaytirish yoki ular negizida yangi ishlab chiqarishlarni tashkil etish yuzasidan “Mangit” masʼuliyati cheklangan jamiyati tomonidan Umumiy ovqatlanish va savdo doʻkoni tashkil qilishga “Yoʻl xaritasi” ishlab chiqilib, joriy yilda ishga tushurilishi rejalashtirilgan.

Joriy yilning aprel oyi holatiga tumandagi tijorat banklari tomonidan 49 ta kichik biznes subʼektlariga jami 3 mlrd. 937 mln. soʻm miqdorida kredit mablagʻlari ajratilgan boʻlib, shundan tadbirkorlik  subʼektlarining aylanma mablagʻlarini shakllantirish maqsadida 28 nafar tadbirkorlarga 1 mlrd. 750 mln. soʻm, ishlab chiqarishni rivojlantirish maqsadida 3 nafar tadbirkorlarga 270 mln. soʻm kredit mablagʻi ajratilgan.

Shuningdek, tumandagi hunarmandlarni qoʻllab-quvvatlash maqsadida 15 nafar hunarmandlarga jami 503 mln. soʻm kredit mablagʻlari ajratilgan.

Tadbirkorlik subʼektlari bilan uchrashuvlar davom etmoqda.

I.I.RAZAKOV, Amudaryo tumani prokurorining ish oʻrganuvchi katta yordamchisi