FERMER – BIZNING BOSh TAYaNChIMIZ

Tumanimizdagi asosiy va yetakchi tarmoq - paxtachilik hisoblanadi. Paxtachilikni rivojlantirish, uni sanoat darajasiga yetkazish davlat ahamiyatiga ega boʻlgan muhim masala, dolzarb vazifadir. Tumanimizda bu borada koʻlamdor amaliy ishlar qilinmoqda, sohada davlat islohotlari davom ettirilmoqda, fermer xoʻjaliklarining tashkiliy jihatlari va boshqarish mexanizmi takomillashtirilmoqda. Bu boradagi muhtaram Prezidentimiz I.A.Karimovning Farmon va Qarorlari izchillik bilan amalga oshirilmoqda.

Tumanimizda faoliyat koʻrsatayotgan paxtachilikka ixtisoslashgan 261 ta fermer xoʻjaliklarida joriy 2013-yilda jami 16050 gektar yerga paxta ekilib, vegitatsiya davrida gʻoʻzalar agrotexnika qoidalariga muvofiq parvarish qilindi, oʻz vaqtida agrotexnik tadbirlar amalga oshirilib, meʼyorida oziqlantirildi va sharbat usulida sugʻorildi. Natijada kuzga kelib paxtadan moʻl hosil yetishtirildi. Bu albatta fidoyi paxtakor dehqonlarimiz va mexanizatorlarimizning peshona terlari, paxta maydonlarida butun yoz boʻyi qizgʻin mehnat qilganliklari tufaylidir.

Faqat bir-ikki soha, yaʼni paxtachilik, gʻallachilik va pillachilik bilangina shugʻullanib qolmasdan bogʻdorchilik, baliqchilik, chorvachilik, parrandachilik va asalarichilik bilan, shuningdek, madaniy-maishiy servis xizmat turlarini koʻpaytirish, tadbirkor kishilarni qoʻllab-quvvatlash fermerlar zimmasiga yuklatilgan vazifalardir. Tumanimizda koʻp tarmoqli fermer xoʻjaliklariga aylantirilgan fermer xoʻjaliklari 197 tani tashkil etadi. Shiddat bilan rivojlanish davom etayotgan hozirgi davrda fermer xoʻjaliklarini koʻp tarmoqli fermer xoʻjaliklariga aylantirish zarurati kuchaymoqda. Shu bois fermer xoʻjaliklarini tashkiliy jihatdan takomillashtirish, faoliyat doirasini kengaytirish kun tartibidagi kechiktirib boʻlmaydigan muhim hayotiy masaladir. Oʻz faoliyatlarini yaxshi yoʻlga qoʻygan koʻp tarmoqli fermer xoʻjaliklaridan "Amudaryo sohili”, "Amirxon”, "Amudaryo-Panasham”, "Hayitboy Otaxon”, "Yusufxoʻja”, "Polvonov Bahrom”, "Tursunboyeva Umida”, "Jumaboyev Jangaboy”, "Nurulla Rahimov”, "Yergulobod”, "Jumaboyev Sobir” va "Usta Olloyor” fermer xoʻjaliklari paxtachilik, gʻallachilik, pillachilik, chorvachilik, parrandachilik, baliqchilik va asalarichilikni rivojlantirishdan tashqari madaniy-maishiy va texnikaviy servis xizmat turlarini ham yoʻlga qoʻymoqdalar. Bu bilan qishloq xoʻjalik mahsulotlari ishlab chiqarishning koʻpayishi, xizmat turlarining ortishi hisobiga aholi bandligi muvaffaqiyatli hal qilinmoqda. Kelgusida ham fermer xoʻjaliklarini talab darajasidagi koʻp tarmoqli fermer xoʻjaliklariga aylantirish, bu sohani yanada takomillashtirish ishlari davom ettiriladi.

Ayni kunda tumanimizda paxta yigʻim-terimi ishlari qizgʻin davom ettirilmoqda. Fermer xoʻjaliklarining har birida bittadan, jami 261 ta yigʻim-terim otryadlari boshliqlari yigʻim-terim ishlarini uyushqoqlik bilan tashkil etib, terim surʼatining oshishini taʼminlamoqdalar. Shu bilan birga ular terimchilarning unumli mehnat qilishlari uchun dala boshida barcha qulay shart-sharoitlar yaratilishiga masʼuldirlar. Yigʻim-terim davrida fermer xoʻjaliklarining tijorat banklari bilan munosabatlari yanada faollashib, terimchilarning mehnat haqlarini oʻz vaqtida dala boshiga yetkazib berish muntazam ravishda tashkil etilmoqda. Masalan, tumanimizdagi eng yetakchi tijorat banki hisoblangan "Agrobank”ning tuman boʻlimi xodimlari ayni kunda faol ishlab, 95 ta fermer xoʻjaliklariga va Amudaryo melioratsiya va suv xoʻjaligi kasb-hunar kollejiga namunali moliyaviy xizmat koʻrsatmoqda. Bu bank xodimlari mazkur 95 ta fermer xoʻjaliklaridagi terimchilarning mehnat haqlari uchun shu kungacha 2 milliard soʻmga yaqin pul mablagʻlarini dala boshiga yetkazib terimchilarga tarqatib berdi. "Mikrokreditbank” "Xalq banki” va "Milliy bank” tuman boʻlimlari xodimlari ham terimchilarning mehnat haqlarini oʻz vaqtida yetkazib berishning uddasidan chiqmoqdalar. Terimchilar mehnatini munosib baholash esa ular kuchiga kuch, gʻayratiga gʻayrat qoʻshib, terim surʼatining oshishini taʼminlamoqda.

Paxtazorlarimizda hosil hali koʻp. Terimchilar yigʻim-terimda faol qatnashib, navbatdagi yuksak marra-43 ming tonnalik "oq oltin” xirmonini bunyod etish uchun oʻzlarining butun kuch-gʻayratlarini sarflamoqdalar. Paxta yigʻim-terimi qizgʻin davom etmoqda.

Otaxon QURBONIYoZOV,

tuman fermerlar Kengashi raisi.