OITSga qarshi kurashish yangi qonun bilan ham tartibga solinadi

Maʼlumki, ijtimoiy kasalliklar qatorida OIV va OITS xastaligi tobora avj olib borayotgan global muammolardan biri hisoblanadi. Ushbu kasallikning oldini olish borasida mamlakatimizda ham bir qator tizimli ishlar olib borilmoqda. 2013-yil 23-sentyabr kuni kuchga kirgan "Odamning immunitet tanqisligi virusi keltirib chiqaradigan kasallik (OIV infektsiyasi) tarqalishiga qarshi kurashish toʻgʻrisida”gi Oʻz-bekiston Respublikasining Qonuni ham shular jumlasidandir.

Qonunda OIV infektsiyasi tar-qalishiga qarshi kurashish sohasidagi davlat siyosatining asosiy yoʻnalishlari belgilab qoʻyilgan. Shuning bilan birga, OIV infektsiyasi tarqalishiga qarshi kurashish sohasida davlat boshqaruvi, OIV infektsiyasi tarqalishiga qarshi kurashish sohasidagi Vazirlar Mahkamasining, Oʻzbekiston Res-publikasi Sogʻliqni saqlash vazirligining, Ichki ishlar vazirligining, va Mahalliy davlat hokimiyati organlarining vakolatlari toʻliq belgilab berilgan.

Qonunga muvofiq OIVga tibbiy tekshiruvdan oʻtkazish ixtiyoriy, majburiy va gʻayriixtiyoriy ravishda amalga oshiriladi.

Qon, biologik suyuqliklar donorlari, ellik yoshgacha boʻlgan nikohlanuvchi shaxslar, homilador ayollar, inʼektsiya orqali giyohvandlik vositalarini isteʼmol etishda gumon qilinayotgan shaxslar, OIVni yuqtirib olgan onalardan tugʻilgan bolalar, oʻz faoliyatida qon, biologik suyuqliklar, odam organlari va toʻqimalari bilan ishlovchi tibbiyot xodimlari va jinsiy sherigida OIV aniqlangan shaxslar majburiy ravishda OIVga tibbiy tekshiruvdan oʻtkazilishi kerakligi belgilangan.

Gʻayriixtiyoriy ravishda OIVga tibbiy tekshiruvdan oʻtkazish qonun hujjatlarida belgilangan tartibda tekshiruvdan oʻtayotgan shaxsning roziligisiz yoki qonu-niy vakilining roziligisiz surishtiruvchining, tergovchining, prokurorning qaroriga yoki sud ajrimiga koʻra amalga oshiriladi.

Qonunda OIVni yuqtirib olganlarning huquq va majburiyatlari, ularni ijtimoiy muhofaza qilish, ularning huquqlari cheklanishiga yoʻl qoʻymaslik kabi choralar belgilangan.

Qabul qilingan mazkur qonun OITS xastaligiga chalingan bemorlarning huquqlari qonuniy himoya qilinishiga, kasallik tarqalishi boʻyicha epidemiologik holatning yaxshilanishiga hamda unga qarshi kurashish samaradorligini yanada oshirishga xizmat qiladi.

Ikrom YOʻLDOShEV,

xalq deputatlari tuman Kengashi deputati, tuman Tibbiyot birlashmasi kardiologiya boʻlimi mudiri.

(Foto - uzbekistonovozi.uz)