SPORT – JISMONIY VA MAʼNAVIY ChINIQISh MAKTABIDIR

Oʻtgan bir hafta, yaʼni 23-27-oktyabr kunlari bizning 40-sonli umumtaʼlim maktabimiz oʻquvchilari uchun qiziqarli taassurotlarga boy oʻtdi. Chunki tumanimiz miqyosida boʻlib oʻtayotgan sport haftaligida faol ishtirok etdik.

Sport haftaligining ilk musobaqalarini biz 31-sonli maktabda boshladik. Bu yerda hududlardan kelgan 8 ta umumtaʼlim maktablarining qiz bolalar voleybol jamoalari oʻrtasida doʻstlik uchrashuvlari, qizgʻin bellashuvlar oʻtkazildi. Garchi bizning qizlar jamoamiz gʻoliblikka erisha olmasa-da, xafa boʻlmadik. Chunki sport haftalagining birinchi kunida maktabimizning oʻgʻil bolalar jamoasi muvaffaqiyatli ishtirok etishdi. 23-oktyabr kuni esa basketbol boʻyicha oʻtkazilgan musobaqalarda 32-sonli maktab jamoasi 1-oʻrinni, 22-maktab jamoasi 2-oʻrinni egallashdi. Bizning 40-sonli maktab jamoasiga 3-oʻrin nasib etdi.

25-oktyabr kuni boʻlib oʻtgan sport musobaqalari yanada qiziqarli boʻldi. Amudaryo akademik litseyi sport maydonida oʻtkazilgan musobaqalarda maktabimiz gandbolchilari yana 3-oʻrinni egallashdi. 41-sonli maktab gandbolchilar jamoasi 1-oʻrin, 38-maktab yosh gandbolchilari 2-oʻrin sohiblari boʻlishdi.

Garchi biz boʻlib oʻtgan sport haftaligi musobaqalarida birinchi oʻrinni egallamasak-da, bu musobaqalardan olam-olam taassurotlar oldik. Tumanimizning turli hududlaridan kelgan tengdoshlarimiz bilan tanishib, doʻstlashdik.

Kelgusi sport musobaqalari uchun tajriba orttirdik, sportga oshnolik biz uchun nafaqat jismoniy, balki maʼnaviy chiniqish maktabi ekanligini his etdik.

Shohida JUMABOYeVA, 40-maktab oʻquvchisi.